ភ្នំពេញ៖ អន្តរក្រសួង សម្រេចចេញប្រកាសស្តីពីការកំណត់រូបមន្តសម្រាប់កែសម្រួលថ្លៃលក់រាយប្រេងឥន្ធនៈនៅកម្ពុជា ដើម្បីឱ្យថ្លៃប្រេងឥន្ធនៈឡើងចុះតាមតម្លៃប្រេងនៅលើទីផ្សារអន្តរជាតិ ដោយឱ្យអនុវត្តតែទៅលើការលក់រាយប្រេងឥន្ធនៈប៉ុណ្ណោះ។
ក្រសួងចំនួន៣ រួមមានក្រសួងសេដ្ឋកិច្ច និងហិរញ្ញវត្ថុ ,ក្រសួងពាណិជ្ជកម្ម និងក្រសួងរ៉ែ និងថាមពល កាលពីថ្ងៃទី២២ ខែមីនា ឆ្នាំ២០២២ បានចេញប្រកាសអន្តរក្រសួង ដែលមាន១២ប្រការ ដោយខ្លឹមសារសំខាន់នៃប្រកាសនេះ គឺការកំណត់យករយៈពេលដាក់តម្លៃប្រេងឥន្ធនៈពី១៥ថ្ងៃ មកត្រឹម១០ថ្ងៃវិញ ។នៅក្នុងនោះដែរនៅប្រការ៤នៃប្រកាសនេះ បានបញ្ជាក់ថា នាយកដ្ឋានអភិវឌ្ឍវិស័យឯនជន នៃក្រសួងពាណិជ្ជកម្ម ត្រូវគណនាថ្លៃលក់រាយប្រេងឥន្ធនៈនៅកម្ពុជា និងចេញថ្លៃលក់រាយជូនក្រុមហ៊ុនប្រេងឥន្ធនៈនៅរៀងរាល់ថ្ងៃទី០១ ,ទី១១ និងទី២១ នៃខែនីមួយ។
យោងតាមប្រកាសអន្តរក្រសួងថ្មីនេះ ក្រសួងពាណិជ្ជកម្ម អាចចេញសេចក្តីជូនដំណឹងភ្លាមៗ ដោយកំណត់ឱ្យចេញថ្លៃលក់រាយជូនក្រុមហ៊ុនប្រេងឥន្ធនៈ ក្នុងរយៈពេល១០ថ្ងៃ ឬ១៥ថ្ងៃ ម្តង តាមការចាំបាច់ដើម្បីឱ្យមានសមាមាត្រគ្នារវាងតម្លៃប្រេងឥន្ធនៈនៅលើទីផ្សារអន្តរជាតិ និងតម្លៃប្រេងឥន្ធនៈលក់រាយនៅកម្ពុជា ដើម្បីរក្សាស្ថិរភាពផ្គត់ផ្គង់ប្រេងនៅកម្ពុជា។
នៅក្នុងប្រកាសអន្តរក្រសួងថ្មីនេះ បានបញ្ជាក់ទៀតថា គ្រប់ស្ថានីយ៍ប្រេងឥន្ធនៈទាំងអស់ ត្រូវមានយ៉ាងតិចនូវផលិតផលប្រេងសាំងធម្មតានិងប្រេងម៉ាស៊ូត សម្រាប់លក់ជាប្រចាំ ហើយមិនអនុញ្ញាតឱ្យលក់ប្រេងស៊ុបពែរតែមួយមុខនោះទេ ។ក្នុងករណីល្មើសនឹងប្រកាសនេះ ត្រូវទទួលពិន័យអន្តរការណ៍ជាប្រាក់ ៤លានរៀល ហើយបើនៅបន្តប្រព្រឹត្តល្មើស ក្រសួងនឹងផ្អាកប្រតិបត្តិការអាជីវកម្មបណ្តោះអាសន្ន៕