ភ្នំពេញៈកម្ពុជានាំចេញគ្រាប់ស្វាយចន្ទីបានចំនួនជាង ៨៦ ម៉ឺនតោនក្នុងរយៈពេល ៧ ខែដើឆ្នាំ ២០២១ កើនជាង ៣០០ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ប្រទេសវៀតណាមគឺជាទីផ្សារចម្បងជាងគេសម្រាប់គ្រាប់ស្វាយចន្ទីរបស់កម្ពុជា។
របាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងរយៈពេល ៧ខែដើមឆ្នាំនេះ កម្ពុជាបាននាំចេញគ្រាប់ស្វាយចន្ទីបានចំនួន ៨៦៦ ២០៧,៧៧ តោន កើន ៣៤៥,២៩ ភាគរយ ធៀបនឹងរយៈពេលដូចគ្នាកាលពីឆ្នាំមុន។
របាយការណ៍បង្ហាញថា ក្នុងនោះ កម្ពុជាបាននាំចេញទៅវៀតណាមច្រើនជាងគេចំនួន ៨៥៩ ២៩០តោនចិនចំនួន ៣ ៦៣៩,៥តោន ថៃចំនួន ៣ ១៩៩,៤០តោន ព្រមទាំង ឥណ្ឌាចំនួន១៧តោន ជប៉ុនចំនួន ៣៤,៤៣តោន កូរ៉េចំនួន ៣,៩១តោន ឡាវចំនួន ២តោន អារ៉ាប់ចំនួន ១៤,៥១តោន តូហ្គោចំនួន ០,០១តោន អារ៉ាប់រួមចំនួន ០,០១ និងបង់ក្លាដែសចំនួន ៧តោន។
បច្ចុប្បន្ន រដ្ឋាភិបាលកម្ពុជាបាននិងកំពុងរៀបចំសេចក្តីព្រាងគោនយោបាយជាតិស្វាយចន្ទីក្នុងគោលបំណងដើម្បីពង្រឹងសមត្ថភាពដាំដុះ កែច្នៃ និងនាំចេញផលិតផលស្វាយចន្ទីទៅកាន់ទីផ្សារអន្តរជាតិឱ្យបានកាន់តែច្រើននាពេលអនាគត។
របាយការណ៍ក្រសួងកសិកម្ម រុក្ខាប្រមាញ់ និងនេសាទឱ្យដឹងថា ក្នុងឆ្នាំ ២០២០ កម្ពុជានាំចេញគ្រាប់ស្វាយចន្ទីចំនួន ២១៨ ៩៨១ តោនកើនឡើង ៨,២៤ ភាគរយពីចំនួន ២០២ ៣១៨ តោនក្នុងឆ្នាំ ២០១៩។
សព្វថ្ងៃនៅប្រទេសកម្ពុជាមានផ្ទៃដីចម្ការស្វាយចន្ទីប្រមាណជាង ៥០ ម៉ឺនហិកតា ដោយក្នុង ១ ហិកតា អាចផ្តល់ផលជាមធ្យម ១,៥ តោនក្នុង ១ ឆ្នាំ៕