ភ្នំពេញ៖ កម្ពុជានាំចេញផលិតផលម្រេច បានប្រមាណ ២៧ ៧៣០,០៧តោន នៅក្នុងរយៈពេល១១ខែ ឆ្នាំ២០២១ កើនឡើងចំនួន ៤៥៦,៥៣% ដោយក្នុងនោះមានទាំងម្រេចកំពត។
យោងតាមរបាយការណ៍ពីក្រសួងកសិកកម្ម ក្នុងចំណោមការនាំចេញទាំងម្រេចសំគាល់ភូមិសាស្រ្ត (GI) និងមិនសម្គាល់ភូមិសាស្រ្តិ (Non-GI) ក្រៅប្រទេសសរុបម្រេចនាំចេញទៅប្រទេសវៀតណាមចំនួន ប្រមាណ ២៦ ៨៨៧; អាល្លឺម៉ង់ចំនួនជាង ៤៩៧តោន; ថៃចំនួន ១៨០តោន និងនៅសល់តិចតួចនាំទៅកាន់ប្រទេសជាង២០ទៀត នៅលើពិភពលោក ។
ចំពោះតម្លៃវិញ លោកបានថ្លែងប្រាប់ថាឆ្នាំនេះ ទិន្នផលម្រេចបានច្រើន ហើយតម្លៃក៏នៅគួរសម ដោយម្រេចខ្មៅតម្លៃ១៥ដុល្លារ, ម្រេចក្រហម២៥ដុល្លារ, និងម្រេចស២៨ដុល្លារ ក្នុងមួយគីឡូក្រាម។
ប្រទេសកម្ពុជា មានខេត្តចំនួន១៨ ដែលមានការដាំដុះម្រេច នៅក្នុងនោះខេត្តដែលសម្បូរការដាំដុះម្រេចច្រើនដែរ រួមមាន មណ្ឌលគិរី រតនគិរី ត្បូងឃ្មុំ និងកំពតជាដើម។ ម្រេចកំពត ក្រោយពីបានក្លាយជាទំនិញសម្គាល់ភូមិសាស្រ្តនៅទីផ្សារសហភាពអឺរ៉ុបហើយ ម្រេចកំពតរបស់កម្ពុជា កាលពីដើមឆ្នាំ២០២០ ក៏ត្រូវបានចុះបញ្ជីការពារជាលក្ខណៈអន្តរជាតិ នៅបណ្តាប្រទេសចំនួន៣២ ក្រោមច្បាប់ទីក្រុងហ្សឺណែវ ស្តីពីកិច្ចព្រមព្រៀងទីក្រុងលីស្បោនអំពីឈ្មោះប្រភពដើមទំនិញ និងម៉ាកសម្គាល់ភូមិសាស្ត្រទំនិញផងដែរ៕