ភ្នំពេញ៖ កម្ពុជាបានដាក់ចេញនូវឯកសារយុទ្ធសាស្រ្តនៃជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ២០២១-២០២៣» ត្រូវបានដាក់ឱ្យដំណើការជាផ្លូវការ ក្នុងជំរុញកំណើនសង្គម-សេដ្ឋកិច្ចជាតិ ប្រកបដោយភាពធន់ក្នុង រយៈពេលធម្យម និងរយៈពេលវែង។
ថ្លែងនៅក្នុងពិធីផ្សព្វផ្សាយ ដាក់ឱ្យ អនុវត្តកម្មវិធីនេះនៅថ្ងៃទី ២២ ខែវិច្ឆិកា ឆ្នាំ ២០២១ នេះ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា ឯកសារដ៏មានសារៈសំខាន់នេះជាមូលដ្ឋានគ្រឹះ នឹងជាផែនទីបង្ហាញផ្លូវ សម្រាប់ការអនុវត្តយុទ្ធសាស្ត្រ និងវិធានការសកម្មភាពជាក់លាក់របស់ រាជរដ្ឋាភិបាលក្នុងពេលចំពោះមុខ និងរយៈពេល មធ្យម ។
លោកបានមានប្រសាសន៍ងបន្ថែទៀតថា ឯកសារក្របខណ្ឌយុទ្ធសាស្ត្រនេះ រាជរដ្ឋាភិបានៅតែយកចិត្តទុកដាក់លើការ រក្សាលំនឹងជីវភាពរស់នៅ របស់ប្រជាជន ក៏ដូចជា ការក្សាលំនឹងធុរកិច្ច របស់វិស័យឯកជន ដែលបាននឹងកំពុងបន្ត ទទួលរងនូវផលប៉ះពាល់ពី វិបត្តិកូវីដ ១៩ តាមរយៈការដាក់ចេញ និងជំរុញអនុវត្ត នូវវិធានការការអន្តរគមន៍ជាក់លាក់ បន្តពីវិធានការអន្តរាគមន៍ទាំងឡាយ ដែលត្រូវបានដាក់ចេញចំនួន ១០ ជុំ រួចមកហើយ ។
លោក អូន ព័ន្ធមុនីរ័ត្ន បានមានប្រសាសន៍បន្តថា រាជរដ្ឋាភិបាលក៏នឹងបន្ត ផ្តល់ការអនុគ្រោះផ្នែកពន្ធ ដូចដែលបានដាក់ចេញវិធានការទាំង ១០ ជុំកន្លងមក សម្រាប់ឆមាសទី១ ឆ្នាំ ២០២២ ដល់ប្រតិបត្តិការនៅក្នុងវិស័យទេសចរណ៍ និងវិស័យអាកាសចរណ៍ដែលបានរងនូវ ផលប៉ះពាល់ដោយសារវិបត្តិនៃជំងឺកូវីដ ១៩ ដើម្បីផ្តល់ការគាំទ្របន្ថែម ដល់ធុរជនពាក់ព័ន្ធ នឹងត្រៀមខ្លួនស្វាគមន៍ភ្ញៀវទេសចរជាតិ និងអន្តរជាតិ បន្ទាប់ពីកម្ពុជាបើកពេញលេញឡើងវិញ ចាប់ពីថ្ងៃទី១ ខែវិច្ឆិកា ២០២១ មក ។
រាជរដ្ឋាភិបាលក៏បានត្រៀមថវិការ២៥០ លានដុល្លារ នៅឆ្នាំ២០២២ សម្រាប់ផ្តល់ឥណទានដោយត្រង់ ទៅធនាគារ សហគ្រាសធុនតូច និងធម្យម និងធនាគារអភិវឌ្ឍកសិកម្ម ដែលមានអត្រាការប្រាក់ដែលលក្ខណៈប្រកួតប្រជែងក្នុងរង្វង់ពី៥ ទៅ ៥,៥% សម្រាប់វិស័យអាទិភាពសំខាន់ ៗ រួមមាន កសិកម្ម អេកូទេសចរណ៍ និងវិស័យអាទិភាពមួយចំនួនទៀត ៕