admin – Page 13 – Investing Cambodia

មាន KHQR Code របស់ធនាគារអេស៊ីលីដាមួយអាចធ្វើដំណើរដោយរីករាយជុំវិញពិភពលោក

Posted on October 27, 2021 by admin

កាន់តែអស្ចារ្យជាមួយKHQR Code របស់ធនាគារអេស៊ីលីដាដែលអនុញ្ញាតឱ្យអតិថិជនអាចធ្វើការ ស្កែន QR ជាមួយ Visa QR និង Master QR ជាលក្ខណះអន្តរជាតិដោយពុំចាំបាច់ខ្វល់ខ្វាយរឿងការ កាន់សាច់ប្រាក់ជាប់ខ្លួនឡើយសម្រាប់ការធ្វើដំណើរទៅក្រៅប្រទេសឡើយ។

លោកស្រី សុខ សោភា នាយិកាប្រតិបត្តិទីផ្សារ នៃធនាគារ អេស៊ីលីដាបានមានប្រសាសន៍ថា តាមរយះការស្កែត KHQR Code នេះ ជាមួយនិងអេស៊ីលីដាម៉ូបាល អ្នកប្រើប្រាស់មិនត្រឹមតែ ធ្វើការ ទូរទាត់បាននូវទូទាំងប្រទេសកម្ពុជាប៉ុណ្ណោះទេ ប៉ុន្តែថែមទាំងអាចស្កែន KHQR Code នេះ សម្រាប់ការទូទាត់នៅក្រៅប្រទេស ដូចជាប្រទេសថៃជាដើម។ ហើយក៏អាចស្កែនជាមួយ Visa QR Code ជាអន្តរជាតិផងដែរ។

លោកស្រីនាយិកាបានថ្លែងបញ្ជាក់យ៉ាងដូច្នេះថា៖«អេស៊ីលីដាជាធនាគារទី១ដែលដាក់ឱ្យដំណើការ QR ដែលមាន QR អេស៊ីលីដាតែមួយគឺគ្រប់គ្រាន់ដែលអាចទទួលយក QR code របស់ធនាគារផ្សេងៗបាន។ ដូច្នេះមិនថាធនាគារណាឬស្ថាប័នណាទេ គឺយើងលែងខ្វល់ខ្វាយ គ្រាន់តែមាន QR អេស៊ីលីដាតែមួយគឺគាត់ស្កែនភ្លាមគឺអាចធ្វើប្រតិបត្តិការបានដោយជោគជ័យហើយ។ នេះគឺជាមហ្ឆិតានៃការបម្រើសេវាជូនអតិថិជនឱ្យបានដិតដល់ បម្រើជូនអតិថិជនរបស់ស្ថាប័នដទៃៗទៀតដែលគាត់មិនមានលទ្ធអភិវឌ្ឍបម្រើអតិថិជនរបស់គាត់បានឬមួយក៏គាត់កំពុងតែអភិវឌ្ឍប៉ុន្តែអភិវឌ្ឍមិនទាន់បាន ដូច្នេះអេស៊ីលីដាមាន QR តែមួយគត់គឺគ្រប់គ្រាន់សម្រាប់គាត់អាចទទួលបាននៅទូទាំងប្រទេស»។

លោកស្រី សុខ សោភា បានថ្លែងបញ្ជាក់ទៀតថា៖«ខ្ញុំក៏ចង់បញ្ជាក់ជូនដែរតាមរយះ អេស៊ីលីដាម៉ូបាល និង អេស៊ីលីដា QR នេះ គឺសព្វថ្ងៃនេះយើងអាចស្កែនបាននៅប្រទេសថៃគឺយើងអាចស្កែនទៅវិញទៅមកបាន និងចាយជាលុយរៀល និងមួយទៀតគឺយើងអាចស្កែនបានជាមួយ Visa QR និង Master QR ជាលក្ខណះអន្តរជាតិតែម្តង។ អញ្ចឹងមានតែអេស៊ីលីដាម៉ូបាលមួយគឺគ្រប់គ្រាន់ក្នុងការធ្វើដំណើរជុំវិញសកលលោកដោយរីករាយ»។

ធនាគារ អេស៊ីលីដា ភីអិលស៊ី«ប្រជាធនាគារដែលលោកអ្នកជឿទុកចិត្ត» គឺជាធនាគារពាណិជ្ជទីមួយក្នុងប្រទេសកម្ពុជាបានអភិវឌ្ឍ និងបានដាក់ឲ្យប្រើប្រាស់នូវសេវាទូទាត់តាមKHQR Codeក្រោមកិច្ចផ្តួចផ្តើម និងដឹកនាំរបស់ធនាគារជាតិនៃកម្ពុជាកាលពីថ្ងៃទី២៥ ខែតុលាកន្លងមកនេះ។

សម្រាប់អតិថិជននៅធនាគារឬស្ថាប័នណាក៏ដោយ គ្រាន់តែមាន KHQR Codeរបស់អេស៊ីលីដា ដែលជាស្តង់ដារឃ្យូអរកូដតែមួយ សម្រាប់គ្រឹះស្ថានធនាគារនិងហិរញ្ញវត្ថុ និងគ្រឹះស្ថានផ្តល់សេវាទូទាត់សងប្រាក់ ដាក់ឲ្យអតិថិជនប្រើប្រាស់ដើម្បីការទូទាត់ថ្លៃទំនិញ និងសេវាកម្មផ្សេងៗនៅក្នុងប្រទេសកម្ពុជា តាមរយៈអេស៊ីលីដាម៉ូបាល (ACLEDA Mobile) កម្មវិធីបាគង (Bakong App) និងអាចស្កែន KHQR Code របស់ធនាគារផ្សេងៗបាន៕

កម្ពុជានឹងអនុញ្ញាត្តឱ្យចរាចរណ៍សាច់ និងមុខទំនិញបង្កកនាំចូលពីអាចលក់លើទីផ្សារឆាប់ៗ

Posted on October 25, 2021 by admin

ភ្នំពេញៈ រដ្ឋាភិបាលនឹងអនុញ្ញាតឱ្យបញ្ចេញលក់សាច់បង្កក និងមុខទំនិញបង្កកពីប្រទេសមានហានិភ័យខ្ពស់នៅលើទីផ្សារកម្ពុជាឆាប់ៗនេះ បន្ទាប់ពីគណៈកម្មការចំពោះកិច្ចទប់ស្កាត់ការរីករាលដាលជំងឺឆ្លងកូវីដ១៩បានធ្វើតេស្តឃើញថា លទ្ធផលនៃការធ្វើតេស្តរកវីរុសកូវីដ១៩ គឺមានកម្រិត“វិជ្ជមាន”តិចតួចបំផុត ។

ក្នុងកិច្ចប្រជុំនៃគណៈកម្មការចំពោះកិច្ចទប់ស្កាត់ការរីករាលដាលនៃជំងឺឆ្លងកូវីដ១៩ពាក់ព័ន្ធនឹងការនាំចូលទំនិញមានហានិភ័យខ្ពស់ មានប្រភពពីប្រទេសមានការរីករាលដាលខ្លាំងនូវជំងឺឆ្លងកូវីដ១៩ ដែលធ្វើឡើងតាមប្រព័ន្ធវីដេអូ (Zoom) កាលពីថ្ងៃទី២០ ខែតុលាលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា និងជាប្រធានគណៈកម្មការចំពោះកិច្ច បានលើកឡើងថាក្នុងចំណោមទំនិញសាច់បង្កកនាំចូលចំនួន ១៥០ កុងតែន័រ ដែលជាមុខសញ្ញាធ្វើតេស្តរកវីរុសកូវីដ១៩ កន្លងមក គឺមានតែ ៣ កុងតឺន័រប៉ុណ្ណោះដែលបានរកឃើញ«វិជ្ជមាន» និងត្រូវបានដុតបំផ្លាញចោលកាលពីចុងខែកក្កដា ឆ្នាំ២០២១។

លោកបន្តថា ទន្ទឹមនឹងនេះក្រុមការងារតាមដាននិងវាយតម្លៃពីស្ថានភាពនៃការរីករាលដាលជំងឺកូវីដ១៩ នៅប្រទេសសំខាន់ៗ ដែលនាំចេញមុខទំនិញសាច់បង្កកមកកម្ពុជា ក៏បានធ្វើរបាយការណ៍ដោយបញ្ជាក់ថា អត្រានៃការឆ្លងនៅប្រទេសទាំងនោះបានធ្លាក់ចុះយ៉ាងច្រើន ដែលជាកត្តាកាត់បន្ថយហានិភ័យនៃវត្តមានវីរុសកូវីដ១៩ លើសាច់បង្កកនាំចូលមកកម្ពុជា។

ជាលទ្ធផលអង្គប្រជុំបានឯកភាព និងសម្រេចធ្វើសំណើស្នើសុំការសម្រេចជាគោលការណ៍ពីថ្នាក់ដឹកនាំលើចំណុចមួយចំនួនដូចជា ដកចេញការតម្រូវឱ្យយកសំណាកសាច់បង្កកនាំចូលមកពីប្រទេសឥណ្ឌាទៅធ្វើតេស្តរកវីរុសកូវីដ១៩,រក្សាការតម្រូវឱ្យមានវិញ្ញាបនបត្រឬលិខិតបញ្ជាក់ថា គ្មានវីរុសកូវីដ១៩ លើសាច់បង្កកចេញដោយអាជ្ញាធរមានសមត្ថកិច្ចនៃប្រទេសឥណ្ឌា,បន្តអនុវត្តត្រឹមវិធានការអនាម័យ និងវិធានការសុខាភិបាលលើទំនិញត្រជាក់ និងទំនិញបង្កកនាំចូលពីប្រទេសជិតខាង ដោយបាញ់ថ្នាំសម្លាប់មេរោគលើសំបកវេចខ្ចប់ និងមធ្យោបាយដឹកជញ្ជូនទំនិញ, និងវិធានការកែសម្រួលនេះនឹងអនុវត្តចាប់ពីថ្ងៃទី២៥ ខែតុលា ឆ្នាំ២០២១ តទៅ។

កិច្ចប្រជុំក៏បានសម្រេចទៀតថា ក្នុងករណីស្ថានភាពនៃការឆ្លងរាលដាលជំងឺកូវីដ១៩ នៅប្រទេសនាំចេញកាន់តែធូរស្រាល វិធានការខាងលើនេះនឹងអាចដកចេញទាំងស្រុងចាប់ពីថ្ងៃទី០១ ខែមករា ឆ្នាំ២០២២ តទៅ ។

ប្រទេសកម្ពុជា កាលពីថ្ងៃទី១ ខែឧសភា ឆ្នាំ២០២១ បានសម្រេចផ្អាកការនាំចូលសាច់គោនិងទំនិញដែលបង្កទុកបានយូរពីប្រទេសឥណ្ឌា។ បម្រាមនេះធ្វើឡើងបន្ទាប់ពីមានការរកឃើញប្រភេទសាច់បង្កក និងទំនិញបង្កកមួយចំនួនតូចមានវត្តមានវីរុសកូវីដ១៩ ពេលដឹកមកដល់ប្រទេសកម្ពុជា គ្រាដែលប្រទេសឥណ្ឌាកំពុងផ្ទុះរាលដាលកូវីដ១៩ធ្ងន់ធ្ងរ។

ទោះយ៉ាងណា លិខិតមួយរបស់អគ្គនាយកដ្ឋានគយ និងរដ្ឋាករកម្ពុជាកាលពីថ្ងៃទី ១៩ ខែមិថុនា បានសរសេរថា យោងតាមស្ថានភាពធូរស្រាលនៃការឆ្លងរាលដាលជំងឺកូវីដ១៩ នៅប្រទេសឥណ្ឌា និងលទ្ធផលអវិជ្ជមាននៃការធ្វើតេស្តលើសាច់បង្កកកន្លងមក រដ្ឋាភិបាលសម្រេចលើកលែងបម្រាមលើការនាំចូលសាច់បង្កក និងមុខទំនិញបង្កក ដែលអាចមានហានិភ័យផ្សេងទៀតមានប្រភពមកពីឥណ្ឌា ដោយដាក់មកជំនួសវិញនូវវិធានការបណ្តោះអាសន្នមួយចំនួន។

កម្ពុជាបាននាំចូលសាច់ក្របីតម្លៃ ១៧,៧ លានដុល្លារ ពីឥណ្ឌាកាលពីឆ្នាំ ២០២០ កើនឡើង ១៧០ ភាគរយធៀបនឹងឆ្នាំ ២០១៩៕

កម្ពុជាអនុម័តគម្រោងចំណាយថ្នាក់ជាតិសម្រាប់ឆ្នាំ២០២២ចំនួន ៨ ៧០១លានដុល្លារ

Posted on October 25, 2021 by admin

ភ្នំពេញៈ រដ្ឋាភិបាលកម្ពុជាបានសម្រេចអនុម័តកញ្ចប់ថវិកាថ្នាក់ជាតិឆ្នាំ២០២២ ចំនួនជាង ៨,៧ពាន់លានដុល្លារ កើនឡើង ៦,៨ភាគរយបើធៀបនឹងឆ្នាំ២០២១ ខណៈការប្រមូលចំណូល គ្រោងនឹងឱ្យបានចំនួន ៥ ៧៧១លានដុល្លារ។

បើយោងតាមសេចក្តីប្រកាសព័ត៌មានស្តីពីលទ្ធផលនៃកិច្ចប្រជុំពេញអង្គគណៈរដ្ឋមន្ត្រីកាលពីថ្ងៃទី២២ ខែតុលា ឆ្នាំ២០២១ ឱ្យដឹងថា តាមការវាយតម្លៃពាក់កណ្តាលឆ្នាំកន្លងមក សេដ្ឋកិច្ចកម្ពុជានៅឆ្នាំ២០២១ ត្រូវបានប៉ាន់ស្មានថា នឹងមានកំណើនក្នុងអត្រា២,៤ភាគរយ ហើយត្រូវបានព្យាករថានឹងងើបឡើងវិញនៅឆ្នាំ២០២២ ដោយត្រូវបានព្យាករថានឹងសម្រេចបានកំណើនក្នុងរង្វង់ ៤,៨ភាគរយ ដែលធ្វើឱ្យផ.ស.ស.ថ្លៃបច្ចុប្បន្នស្ថិតក្នុងរង្វង់ ៣០ ៥៤៤លានដុល្លារ ស្របពេល ផ.ស.ស. សម្រាប់មនុស្សម្នាក់ត្រូវរំពឹងនឹងកើនឡើងដល់ ១ ៨៤១ដុល្លារ បើប្រៀបធៀបនឹង ១៧៣០ដុល្លារក្នុងឆ្នាំ២០២១។

យោងតាមសេចក្តីប្រកាសព័ត៌មាន តាមផែនការគម្រោងចំណាយថវិកាថ្នាក់ជាតិ ឆ្នាំ២០២២ ត្រូវបានគ្រោងចំនួន ៨ ០១៣លានដុល្លារ ត្រូវជា ២៦,២៤ភាគរយនៃផ.ស.ស. កើនឡើង ៦,៨ភាគរយធៀបនឹងឆ្នាំ២០២១។ ចំណែកចំណូលថវិកាថ្នាក់ជាតិ គ្រោងរកឱ្យបានចំនួន ៥ ៧៧១លានដុល្លារ ត្រូវជា ១៨,៩ភាគរយនៃផ.ស.ស ដែលកើនឡើង ១៧,៧ភាគរយធៀបឆ្នាំ២០២១។

សេចក្តីប្រកាសព័ត៌មានរបស់កិច្ចប្រជុំគណៈរដ្ឋមន្ត្រីបានលើកឡើងទៀតថា ដើម្បីសម្រេចបានកំណើនសេដ្ឋកិច្ចក្នុងរង្វង់៤,៨ភាគរយ ក្នុងបរិបទនៃការកើនឡើងនូវភាពមិនប្រាកដប្រជាទាំងក្នុងនិងក្រៅប្រទេស រដ្ឋាភិបាលកម្ពុជានឹងជំរុញអនុវត្តយុទ្ធសាស្ត្រស្តារនិងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ១៩ តាមគន្លងប្រក្រតីភាពថ្មី ដោយមិនត្រឹមតែផ្តោតលើការស្តារសេដ្ឋកិច្ចនិងជីវភាពប្រជាជនឱ្យបានឆាប់រហ័សប៉ុណ្ណោទេ ប៉ុន្តែថែមទាំងដើម្បីធានាឱ្យបាននូវការអភិវឌ្ឍសេដ្ឋកិច្ចប្រកបដោយសមធម៌ និរន្តរភាព និងបរិយាបន្ន ក្នុងរយៈពេលវែងផងដែរដោយឈរលើសសរស្តម្ភចំនួនបីគឺការស្តារការកែទម្រង់ និងការកសាងភាពធន់។

សេចក្តីប្រកាសព័ត៌មានបានអះអាងថា៖«ក្នុងន័យនេះ ថវិកាឆ្នាំ២០២២ អាចប្រសិទ្ធនាមបានថាជា«ថវិកាសម្រាប់បន្តការប្រយុទ្ធប្រឆាំង និងការកសាងសមត្ថភាពរស់នៅជាមួយកូវីដ១៩ តាមកន្លងប្រក្រតីថ្មី ដើម្បីបន្តប្រយុទ្ធ ការពារអាយុជីវិតប្រជាជន រក្សាលំនឹងសង្គម-សេដ្ឋកិច្ច និងជីវភាពរស់នៅរបស់ប្រជាជន ព្រមជាមួយនឹងការតម្រង់ធនធានឆ្ពោះទៅស្តារ និងជំរុញកំណើនសេដ្ឋកិច្ចឡើងវិញ»៕

MV « វាក់សាំងមនុស្សក្បត់» របស់ផលិតកម្មដាវីត្រាកំពុងផ្ទុះខ្លាំងនៅលើTik Tok

Posted on October 25, 2021 by admin

ពិតជាអស្ចារ្យមែន! ត្រឹមតែប៉ុន្មានថ្ងៃសោះ MV « វាក់សាំងមនុស្សក្បត់» របស់ផលិតកម្មដាវីត្រាកំពុងផ្ទុះការគាំទ្រយ៉ាងខ្លាំងនៅក្នុងបណ្តាញសង្គមដោយមានអ្នកចូលមើលជិត១លាននាក់ ជាពិសេសអ្នកដែលលេងTiktok បានចូលមើលជាងកន្លះលាននាក់ និងយកទៅត្រាប់តាមជាង១០K ខណះដែលនៅក្នុង Youtube ជាង៣០លាននាក់។

MV « វាក់សាំងមនុស្សក្បត់» គឺច្រៀងរៀបរាប់អំពីស្នេហាខកចិត្តរបស់នារីអភ័ព្វស្នេហ៍ម្នាក់ដែលតែងតែជួបរឿងរ៉ាវស្នេហាមិនសមប្រកបជួបតែប្រុសសាវាម្តងហើយម្តងទៀត ដែលធ្វើឱ្យរូបនាងស្ទើរតែរលែងហ៊ានប្រលូកក្នុងរៀងស្នេហា។ អ្វីដែលកាន់តែចាប់អារម្មណ៍នោះគឺនាងសួរថាតើលើកលោកនេះមានវាក់សាំងណាចាក់ដើម្បីកុំឱ្យមានមនុស្សប្រុសក្បត់ចិត្តដែរទេ? ព្រោះនាងមិនចង់ជួបបុរសចិត្តសាវាទៀតឡើយ។

បើចង់ស្តាប់កំសាន្តនិងទស្សនានូវ MV « វាក់សាំងមនុស្សក្បត់» នេះសូមចូលទៅកាន់តំណរភ្ជាប់ខាងក្រោមនេះ។

លោកអ្នកក៏អាចទាញយកកម្មវិធីអេប«App Komsan» របស់ផលិតកម្មដាវីត្រារីករាយសណ្តាប់និងទស្សនាMVs នានាបានដោយមិនគិតថ្លៃផងដែរ៕

ពត៌មានបន្ថែមសូមទំនាក់ទំនងលេខ 0968888811

កាន់តែពិសេស! ធនាគារអេស៊ីលីដាដាក់ឲ្យដំណើរការនូវសេវាទូទាត់តាមខេអេចឃ្យូអរកូត(KHQR Code)

Posted on October 25, 2021 by admin

ភ្នំពេញ៖ ជាកាបោះជំហ៊ានថ្មីមួយទៀត ធនាគារ អេស៊ីលីដា បានអភិវឌ្ឍ និងបានដាក់ឲ្យប្រើប្រាស់នូវសេវាទូទាត់តាម KHQR Codeក្រោមកិច្ចផ្តួចផ្តើម និងដឹកនាំរបស់ធនាគារជាតិនៃកម្ពុជា។

KHQR Codeជាស្តង់ដារឃ្យូអរកូតតែមួយ សម្រាប់គ្រឹះស្ថានធនាគារនិងហិរញ្ញវត្ថុ និងគ្រឹះស្ថានផ្តល់សេវាទូទាត់សងប្រាក់ ដាក់ឲ្យអតិថិជនប្រើប្រាស់ដើម្បីការទូទាត់ថ្លៃទំនិញ និងសេវាកម្មផ្សេងៗនៅក្នុងប្រទេសកម្ពុជា តាមរយៈអេស៊ីលីដាម៉ូបាល (ACLEDA Mobile) កម្មវិធីបាគង (Bakong App) និងអាចស្កែន KHQR Code របស់ធនាគារផ្សេងៗបាន។

លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ីបានមានប្រសាសន៍ថា ដោយសង្កេតឃើញថានៅតាមបញ្ជរហាងទំនិញ និងអ្នកផ្តល់នូវសេវាកម្មនានាបានដាក់ឃ្យូអរកូតសម្រាប់ទូទាត់របស់គ្រឹះស្ថានធនាគារ និងហិរញ្ញវត្ថុជាច្រើន មានភាពចង្អៀត ដែលធ្វើឲ្យអ្នកប្រើប្រាស់មានការលំបាកក្នុងការជ្រើសរើសដើម្បីទូទាត់។

លោកបណ្ឌិត បានមានប្រសាសន៍បញ្ជាក់ថា៖«ធនាគារ អេស៊ីលីដា ភីអិលស៊ី រួមទាំងគ្រឹះស្ថានធនាគារ និងហិរញ្ញវត្ថុសរុបចំនួន៥៤ បានធ្វើការអភិវឌ្ឍរួមគ្នានូវសេវា “KHQR” ដែលជាប្រព័ន្ធទូទាត់ស្វ័យប្រវត្តិកម្មរួមបញ្ចូលគ្នានូវ ឃ្យូអរកូតសម្រាប់វិស័យធនាគារនិងហិរញ្ញវត្ថុដើម្បីធ្វើប្រតិបត្តិការទូទាត់រវាងគ្រឹះស្ថានធនាគារនិងហិរញ្ញវត្ថុ និងគ្រឹះស្ថានផ្តល់សេវាទូទាត់សងប្រាក់ ដែលជាសមាជិកសំដៅផ្តល់នូវភាពងាយស្រួលជូនអ្នកប្រើប្រាស់ប្រកបដោយប្រសិទ្ធភាព ទាន់សម័យ មានសុវត្ថិភាព និងទំនុកចិត្តខ្ពស់»។

លោកបានថ្លែងបន្តទៀតថា៖ ការបង្កើត”KHQR” ក្នុងវិស័យធនាគារនេះស្ថិតក្រោមគំនិតផ្តួចផ្តើម និងការគាំទ្រពីធនាគារជាតិនៃកម្ពុជា ជាពិសេសលោកជំទាវបណ្ឌិត ជា សេរី ឧបការីទេសាភិបាល និងជាអគ្គនាយកបច្ចេកទេស ធនាគារជាតិនៃកម្ពុជា និងជាស្ថាបនិកប្រព័ន្ធបាគង ដែលជាប្រព័ន្ធទូទាត់កន្លោង និងប្រើបច្ចេកវិទ្យា Blockchain។

លោកជំទាវបណ្ឌិត ជា សេរី ឧបការីទេសាភិបាល និងជាអគ្គនាយកបច្ចេកទេស ធនាគារជាតិនៃកម្ពុជាបានមានប្រសាសន៍ថា បច្ចុប្បន្ន ការរីកចម្រើននៃបច្ចេកវិទ្យា និងការប្រកួតប្រជែងក្នុងវិស័យហិរញ្ញវត្ថុបានផ្តល់ឱកាសនិងជំរុញឱ្យគ្រឹះស្ថានធនាគារនិងហិរញ្ញវត្ថុដាក់ចេញនូវឧបករណ៍និងសេវាទូទាត់ប្រកបដោយនវានុវត្តន៍ដល់សាធារណជន ដូចជាការទូទាត់តាមប្រព័ន្ធអ៊ីនធើណែត តាមទូរស័ព្ទចល័ត និងតាមឃ្យូអរកូត ជាដើម។

លោក ជំទាវបានថ្លែងបញ្ជាក់យ៉ាងដូច្នេះថា៖«ទោះជាយ៉ាងនេះក៏ដោយ ការទូទាត់តាមឃ្យូអរកូតកន្លងមកនៅពុំទាន់មានប្រសិទ្ធភាព និងផ្តល់ភាពងាយស្រួលសម្រាប់អតិថិជននៅឡើយ ព្រោះអតិថិជនមិនអាចធ្វើការទូទាត់សងប្រាក់ឆ្លងគ្រឹះស្ថានទៅវិញទៅមកបាន»។

»ដើម្បីឆ្លើយតបទៅនឹងបញ្ហានេះ និងដើម្បីអនុវត្តស្របតាមយុទ្ធសាស្ត្រអភិវឌ្ឍន៍វិស័យហិរញ្ញវត្ថុរបស់រាជរដ្ឋាភិបាលកម្ពុជា ធនាគារជាតិ នៃកម្ពុជាបានដាក់ចេញនូវប្រកាសស្តីពីគំរូបរិច្ឆិនភាពបច្ចេកទេសខេអេចឃ្យូអរកូត (KHQR Code) សម្រាប់ទូទាត់សងប្រាក់ កាលពីថ្ងៃទី២៦ ខែមិថុនា ឆ្នាំ២០២០កន្លងមក» នេះបើយោងតាមការថ្លែងបញ្ជាក់របស់លោកជំទាវបណ្ឌិត ជា សេរី ៕

កម្ពុជាអះអាងថាខ្លួនជាម្ចាស់ស្របច្បាប់នៃប្រេងកាតចំនួន ២៩៥ ០០០បារ៉ែល

Posted on September 30, 2021 by admin

ភ្នំពេញ៖ រដ្ឋាភិបាលកម្ពុជាបញ្ជាក់ថា ប្រេងឆៅចំនួន ២៩៥ ០០០បារ៉ែលដែលត្រូវបានក្រុមនាវិកនៃនាវា MT Strovolos ដែលត្រូវបានចាប់ខ្លួនដោយអាជ្ញាធរឥណ្ឌូនេស៊ីនោះ គឺជាកម្មសិទ្ធស្របច្បាប់របស់ព្រះរាជាណាចក្រកម្ពុជា ។

យោងតាមក្រសួង ម្ចាស់នាវា អ្នកគ្រប់គ្រង និងក្រុមនាវិកនៃនាវា MT Strovolos ត្រូវបានជូនដំណឹងអំពីកម្មសិទ្ធិលើប្រេងកាត និងការបំពានច្បាប់កម្ពុជាតាំងពីប៉ុន្មានខែមុនមកម៉្លេះ ។ ពួកគេ មិនត្រឹមតែមិនបានធ្វើសកម្មភាពណាមួយក្នុងការបង្វិលសងប្រេងកាតមកព្រះរាជាណាចក្រកម្ពុជាវិញទេ ប៉ុន្តែ ពួក គេថែមទាំំងធ្វើដំណើរទៅកាន់កំពង់ផែជាច្រើននៅក្នុងប្រទេសថៃ និង ប្រទេសឥណ្ឌូនេស៊ីជាដើម ដោយពួកគេបានបន្តបិទប្រព័ន្ធកំណត់អត្តសញ្ញាណស្វ័យប្រវត្តិរបស់នាវាក្នុងរយៈពេលយូរ ពេលដែល ពួកគេធ្វើដំណើរ រួមទាំងពេល៖ ចាកចេញពីដែនទឹកកម្ពុជាដោយគ្មានការអនុញ្ញាត ចាកចេញពីដែនទឹកប្រទេសថៃ និងចូលទៅកាន់ដែនទឹកប្រទេសឥណ្ឌូនេស៊ី។

ជាមួយគ្នានេះដែរ ក្រសួងបានពន្យល់ថា ពេលដែលនាវា MT Strovolos ចាកចេញពីដែនទឹកកម្ពុជាដោយខុសច្បាប់ នាវានេះត្រូវបានជួលដោយក្រុមហ៊ុន KrisEnergyដែលក្រុមហ៊ុនទទួលបានកិច្ចសន្យាក្នុងការអភិវឌ្ឍជម្រកប្រេងកាតកម្ពុជា ។ វិវាទរវាងម្ចាស់នាវានិងអ្នកគ្រប់គ្រងនាវា និងក្រុមហ៊ុន KrisEnergyពាក់ព័ន្ធនឹងការជួលនាវា ប្រហែលជាបានកើតឡើង ប៉ុន្តែបញ្ហានេះ មិនពាក់ព័ន្ធដល់ព្រះរាជាណាចក្រកម្ពុជាឡើយ ។

ក្រសួងបានថ្លែងថា៖« ប្រេងកាត មិនអាចក្លាយជាកម្មវត្ថុនៃការទាមទាររបស់ម្ចាស់នាវា និងអ្នកគ្រប់គ្រង នាវាMT Strovolos ឡើយ ព្រោះថាប្រេងកាតទាំងនេះ មិនមែនជាកម្ម សិទ្ធិរបស់អ្នកជួលនាវា (ក្រុមហ៊ុន គ្រីសអេនើជី) ទេ។ ដូចបញ្ជាក់កន្លងមក ប្រេងកាតជាទ្រព្យសម្បត្តិ របស់ព្រះ រាជាណាចក្រកម្ពុជា។ គ្មានការទាមទារណាមួយក្រោមកិច្ចព្រមព្រៀងជួលនាវាអាចផ្តល់ ហេតុផល សមរម្យ ឬ អនុញ្ញាតឲ្យនាវាMT Strovolos ចាកចេញពីដែនទឹកកម្ពុជាដោយខុសច្បាប់ ឬ អនុញ្ញាតឲ្យមានរការរំលោភបំពានកម្មសិទ្ធិប្រេងកាតរបស់កម្ពុជាឡើយ ។

ម្ចាស់នៃនាវា MT Strovolosបានថ្លែងការណ៍ថាខ្លួនយកចិត្តទុកដាក់ដល់សុខមាលភាពរបស់ក្រុមនាវិកនៅក្នុងសេចក្តីប្រកាសព័ត៌មានរបស់ខ្លួន។ ប៉ុន្តែសេចក្តីថ្លែងការណ៍នេះ គឺផ្ទុយទៅនឹងការពិតដែល ក្រុមនាវិករបស់ពួកគេមិនបានគោរពគោលការណ៍សុវត្ថិភាពនៅលើលំហសមុទ្រឡើយពួក គេបានបិទប្រព័ន្ធ អត្តសញ្ញាណស្វ័យប្រវត្តិរបស់នាវាក្នុងពេលពួកគេធ្វើដំណើរ ហើយផ្ទុយនឹងការណ៍ដែលពួកគេ ចាកចេញពីដែនទឹកកម្ពុជាដោយគ្មានការអនុញ្ញាត ឬ ដោយគ្មានសិទ្ធិលើប្រេងកាតរបស់ព្រះរាជាណាចក្រកម្ពុជា» ៕

កសស បានសម្រេចការកែសម្រួលរយៈពេលស្តុកកុងតឺន័រនាំចេញដោយគិតថ្លៃ១សប្តាហ៍

Posted on September 29, 2021 by admin

ភ្នំពេញៈកំពង់ផែស្វយ័តក្រុងព្រះសីហនុ(កសស) បានសម្រេចការកែសម្រួលរយៈពេលស្តុកកុងតឺន័រនាំចេញនៅកំពង់ផែស្វយ័តក្រុងព្រះសីហនុ ដោយគិតថ្លៃរហូតដល់រយៈពេល១សប្តាហ៍ដែលនឹងអនុវត្តនៅខែក្រោយនេះតទៅ។

សេចក្តីជូនដំណឹងរបស់កំពង់ផែស្វយ័តក្រុងព្រះសីហនុ បានឱ្យដឹងថា សេចក្តីសម្រេចនេះគឺយោងតាមស្មារតីអង្គប្រជុំរវាង កសស និងតំណាងក្រុមហ៊ុននាវា កាលពីថ្ងៃទី ៣០ ខែសីហា ឆ្នាំ២០២១ កន្លងមក។

សេចក្តីជូនដំណឹងចុះហត្ថខេលាដោយ លោក ថៃ ឫទ្ធី អគ្គនាយករង កសស បន្តថា ដើម្បីចូលរួមចំណែកក្នុងកិច្ចសម្របសម្រួលពាណិជ្ជកម្ម ក្នុងវិស័យដឹកជញ្ជូន និងភស្តុភារកម្ម ក្នុងគោលដៅសម្រួលដល់ការធ្វើធុរៈកិច្ច និងការធ្វើពាណិជ្ជកម្មរបស់ធុរជន កំពង់ផែស្វយ័តក្រុងព្រះសីហនុ សូមធ្វើការកែសម្រួលរយៈពេលស្តុកកុងតឺន័រនាំចេញ ពីការអនុគ្រោះមិនគិតថ្លៃស្តុកក្នុងរយៈពេល ៥ថ្ងៃ មកអនុគ្រោះមិនគិតថ្លៃស្តុកក្នុងរយៈពេល ៧ថ្ងៃ គិតចាប់ពីថ្ងៃដែលកុងតឺន័រចូលដល់ទីលានរហូតដល់ថ្ងៃ នាវាចេញដំណើរ។

ប៉ុន្តែប្រសិនបើហួសពីរយៈពេលកំណត់ខាងលើចាប់ពីថ្ងៃទី៨ គឺគិតថ្លៃស្តុកចំនួន ១ថ្ងៃ និងកំណើនជាលំដាប់តាម ចំនួនថ្ងៃស្តុក។ចំពោះរយៈពេលស្តុកកុងតឺន័រ កែសម្រួលថ្មីនេះ នឹងត្រូវអនុវត្តចាប់ពីថ្ងៃទី ០១ ខែ តុលា ឆ្នាំ ២០២១ តទៅ។

របាយការណ៍របស់កំពង់ផែស្វយ័តក្រុងព្រះសីហនុ បង្ហាញថា ក្នុងឆ្នាំ ២០២០ បរិមាណកុងតឺន័រឆ្លងកាត់ កសស មានចំនួន ៦៤១ ៨៤២ TEUs កើន ០,៤១ បើធៀបនឹងឆ្នាំ ២០១៩ ដែលមានចំនួន ៦៣៩ ២១១ TEUs។

ទិន្នន័យ បានឱ្យដឹងទៀតថា ក្នុងឆ្នាំ ២០២០ កសស ទទួលបានប្រាក់ចំណូលសរុបចំនួន ៣១១ ៨១៣ ៧៦៩ ០០០ រៀល ធ្លាក់ចុះ ៦,៦២ ភាគរយ និងប្រាក់ចំណេញសុទ្ធក្រោយបង់ពន្ធចំនួន ២៦ ៦០៧ ៥៩៤៤ ០០០ រៀល ថយចុះ ៣៨,៧៨ ភាគរយ បើធៀបនឹងឆ្នាំ ២០១៩៕

ភ្ញៀវទេសចរដើរកម្សាន្តក្នុងស្រុកកើនឡើងជិត ៣០ភាគរយ

Posted on September 28, 2021 by admin

ភ្នំពេញៈ ភាពល្អប្រសើរនៃអត្រាចំនួនប្រជាជនចាក់វ៉ាក់សាំងប្រឆាំងនឹងជំងឺកូវីដ១៩ និងការចូលរួមអនុវត្តន៍បានខ្ជប់ខ្ជួននូវវិធានការរបស់ក្រសួងទេសចរណ៍ និងសុខាភិបាល បានធ្វើឱ្យចលនានៃការធ្វើដំណើរកម្សាន្តក្នុងស្រុកចាប់ផ្តើមមានសម្ទុះជាបន្តបន្ទាប់ ជាក់ស្តែងចំនួនភ្ញៀវទេសចរដើរកម្សាន្តនាថ្ងៃចុងសប្តាហ៍ទី៤ ខែកញ្ញា នេះបានកើនឡើងជិត ៣០ភាគរយ បើធៀបនឹងចុងសប្តាហ៍ទី៣។

ទិន្នន័យក្រសួងទេសចរណ៍ បង្ហាញថា រយៈពេល៣ថ្ងៃចុងសប្តាហ៍ទី៤ ខែកញ្ញា (ថ្ងៃទី២៤-២៥-២៦) ភ្ញៀវទេសចរផ្ទៃក្នុង ដែលចេញដើរទស្សនាកម្សាន្តទូទាំងប្រទេស មានចំនួន ១០២ ០៦៣នាក់ ក្នុងនោះភ្ញៀវជាតិ ១០០ ៥១២នាក់ និងភ្ញៀវបរទេស(ផ្ទៃក្នុង) ១ ៥៥១នាក់។ តួលេខនេះ បានកើនឡើងប្រមាណ ២៩,១៦ភាគរយបើធៀបនឹងសប្តាហ៍ទី៣ ខែកញ្ញា។

បើតាមក្រសួងទេសចរណ៍ គោលដៅទេសចរណ៍ក្នុងរាជធានីភ្នំពេញ មានចំនួន ៣២ ៧៩៣នាក់, កំពត ២៤ ៣២៩នាក់, ព្រះសីហនុ ៨ ១៩៨នាក់, កែប ៦ ៧៥០នាក់, កំពង់ស្ពឺ ៥ ៦០៧នាក់, តាកែវ ៤ ៥៩៨នាក់, មណ្ឌលគិរី ៤ ២៦២នាក់ និងខេត្តពោធិ៍សាត់ ៣ ៦៣១នាក់។

រដ្ឋមន្ត្រីក្រសួងទេសចរណ៍ លោក ថោង ខុន បានឱ្យដឹងថា ការកើនឡើងនៃចំនួនប្រជាពលរដ្ឋដើរកម្សាន្តនៅពេលនេះ គឺដោយសារប្រជាជនមួយចំនួនបានយកចង្ហាន់ និងគ្រឿងឧបភោគបរិភោគ ទៅប្រគេនព្រះសង្ឃនៅតាមវត្ត រួចបន្តដំណើរទៅដើរលេងកម្សាន្ត ។ ចលនានៃការធ្វើដំណើរកម្សាន្តក្នុងស្រុកកំពុងមានសម្ទុះកើនឡើងវិញហើយ បន្ទាប់ពីធ្លាក់ចុះយ៉ាងគំហុកដោយសារការឆ្លងរាលដាលជំងឺកូវីដ១៩។ លោកបន្តថា ព្រមជាមួយគ្នានេះ ក្រសួងទេសចរណ៍ ក៏ដូចជាអាជ្ញាធរពាក់ព័ន្ធក៏បាននឹងកំពុងសហការគ្នាចុះជំរុញការអនុវត្តវិធាន ៣ការពារ ៣កុំ សុវត្ថិភាពទេសចរណ៍ និងនីតិវិធីស្តង់ដាអប្បបរមា (SOP)នៅតាមមូលដ្ឋានអាជីវកម្ម និងរមណីយដ្ឋានទេសចរណ៍ទូទាំងប្រទេសផងដែរ។

លោកថ្លែងថា៖«នៅតាមគោលដៅទេសចរណ៍នានា ភ្ញៀវទេសចរ និងប្រជាពលរដ្ឋបានចូលរួមអនុវត្តកាន់តែសកម្មនូវវិធានការ «៣កុំ និង ៣ការពារ» ពិសេសបានពាក់ម៉ាស់ជាប្រចាំ និងការជ្រើសរើសដំណើរកម្សាន្តទៅកាន់តំបន់ធម្មជាតិ សហគមន៍ និងអេកូទេសចរណ៍»។

បើតាមលោក ថោង ខុន គោលដៅទេសចរណ៍ខេត្តតំបន់ឆ្នេរសមុទ្រ និងគោលដៅទេសចរណ៍ធម្មជាតិ និងអេកូទេសចរណ៍នៅខេត្តកំពង់ស្ពឺ មណ្ឌលគិរី និងខេត្តពោធិ៍សាត់ បានក្លាយជាគោលដៅពេញនិយមសម្រាប់ការដើរកម្សាន្តនាសប្តាហ៍កន្លងមក លើកលែងតែតំបន់សៀមរាបអង្គរ ដែលកំពុងបិទខ្ទប់។

លោកនាយករដ្ឋមន្ត្រីហ៊ុន សែន ក្នុងឱកាសបើកយុទ្ធនាការចាក់វ៉ាក់សាំងប្រឆាំងនឹងជំងឺកូវីដ១៩ ដល់កុមារអាយុចាប់ពី ៦-១២ឆ្នាំ កាលពីពេលថ្មីៗនេះបានបង្ហើបថា កម្ពុជាមានផែនការនឹងបើកទទួលភ្ញៀវទេសចរអន្តរជាតិចាក់វ៉ាក់សាំងរួច ឱ្យចូលមកកម្សាន្តក្នុងពេលខាងឆាប់ៗ ដោយអាចចាប់ផ្តើមពីភ្ញៀវទេសចរចិន ដែលជាប្រទេសមានការគ្រប់គ្រងជំងឺកូវីដ១៩ បានល្អជាងគេ៕

សេដ្ឋកិច្ចកម្ពុជាមានកំណើនត្រឹម២,២ភាគរយក្នុងឆ្នាំ២០២១នេះ

Posted on September 28, 2021 by admin

ភ្នំពេញ ៖ កំណើនសេដ្ឋកិច្ចកម្ពុជាក្នុងឆ្នា២០២១ នឹងមានកំណើនត្រឹម២,២ភាគរយប៉ុណ្ណោះ ដោយធ្លាក់ចុះពីកម្ពុជា៤ភាគរយនេះការព្យាករណ៍ដើមឆ្នាំដោយសារតែការរិករាលដាលនៃជំងឺកូវីដ១៩នៅបន្តអូសបន្លាយ ។ នេះបើយោងតាមការព្យាករថ្មីរបស់ធនាគារពិភពលោក។

លោកលី សូដេត សេដ្ឋវិទូជាន់ខ្ពស់នៃធនាគារពិភពលោកប្រចាំកម្ពុជាបានមានប្រសាសន៍ក្នុងសន្និសីទសារព័ត៌មានតាមប្រព័ន្ធអនឡាញកាលពីព្រឹកថ្ងៃទី២៨ កញ្ញា២០២១នេះថា ស្ថានភាពកូវីដ១៩ បន្តអូសបន្លាយនិងធ្វើឱ្យប៉ះពាល់ដល់វិស័យមួយចំនួនទៀត ទើបធនាគារពិភពលោកបានព្យាករជាថ្មីចំពោះកំណើនសេដ្ឋកិច្ចកម្ពុជាមកនៅត្រឹម២,២ភាគរយនៅឆ្នាំ២០២១ ខុសពីការព្យាករកាលពីដើមឆ្នាំ២០២១ ។

លោកថា៖«យើងសង្កេតឃើញថាការនាំចេញរបស់កម្ពុជាក្នុងឆ្នាំ២០២១នេះមានការងើបឡើងវិញធៀបនឹងឆ្នាំ២០២០ កន្លងទៅ ក្នុងនោះដែរវិស័យកសិកម្មក៏ជាវិស័យស្នួលនិងសំខាន់ក្នុងកំណើនសេដ្ឋកិច្ចកម្ពុជា នៅឆ្នាំ២០២១នេះ » ។

លោកបន្ត វិស័យទេសចរណ៍នៅកម្ពុជាសឹងតែដួលរលំទាំងស្រុងទៅហើយ ហើយការត្រៀមបើកទទួលស្វាគមន៍ភ្ញៀវទេសចរអន្តរជាតិឡើងវិញរបស់រាជរដ្ឋាភិបាលគឺជាការជួយដល់សេដ្ឋកិច្ច ជួយដល់វិស័យទេសចរណ៍កម្ពុជាឱ្យមានសកម្មភាពឡើងវិញ៕

វោវ! Video Lyrics”នឹកស្រុក មិនអាចទៅបាន” របស់ផលិតកម្មដាវីត្រាកំពុងអន្ទងចិត្តទស្សនិកជនយ៉ាងខ្លាំង

Posted on September 27, 2021 by admin

ភ្នំពេញ៖ឥឡូវនេះផលិតកម្មមួយនេះបញ្ចេញ Video Lyricsថ្មីគឺបទ«នឹកស្រុកតែមិនអាចទៅបាន» ធ្វើឱ្យមហាជនភាគច្រើនស្ដាប់ហើយ មានអារម្មណ៍ថាកម្សត់ លន្លង់លន្លោចចង់បង្ហូរទឹកភ្នែក ព្រោះតែភ្ជុំឆ្នាំនេះ ត្រូវបានរំខានដោយកូវីត១៩ផ្ទុះខ្លាំងផងដែរ។

ភ្នំពេញ៖ បន្ទាប់ពីបានបង្ហាញខ្លួនវាយលុកនៅក្នុងវិស័យចម្រៀង ផលិតកម្មដាវីត្រា Davitra មិនត្រឹមតែសម្ញ៉ែងស្ទីឌីយោលំដាប់អន្តរជាតិ ជាលើកដំបូងធ្វើ អោយមានការភ្ញាក់ផ្អើលតែម្យ៉ាងទេ ផលិតកម្មមួយនេះ ក៏បានប្រមូល ផ្ដុំតារាចម្រៀង អ្នកនិពន្ធ និង អ្នកឯកទេសផ្នែកផលិតចម្រៀងបង្កើតស្នាដៃ លេចធ្លោតែក្នុងរយៈពេលខ្លី ធ្វើអោយមានការចាប់អារម្មណ៍ផងដែរ។

Video Lyrics«នឹកស្រុកតែមិនអាចទៅបាន» នេះបានទាញអារម្មណ៍អ្នកស្ដាប់អោយនឹក ដល់ ម៉ែពុក នឹក ភូមិឋានស្រុកកំណើតដែលបានឃ្លាតឆ្ងាយទៅធ្វើការនៅក្រៅប្រទេសដែលឃ្លាតលោកឪពុកអ្នកម្តាចចាស់ជរារាប់ខែឆ្នាំ ហើយអត្ថន័យក្នុងមួយបទនេះ ក៏ឆ្លុះបញ្ចាំងត្រូវនឹងសង្គមកម្ពុជា នាអំឡុងខែភ្ជុំនេះផងដែរ។

ខាងក្រោមនេះ សាច់រឿង Video Lyrics «នឹកស្រុកតែមិនអាចទៅបាន» ។ លោកអ្នកក៏អាចទាញយកកម្មវិធីអេប«App Komsan» របស់ផលិតកម្មដាវីត្រារីករាយសណ្តាប់និងទស្សនាMVs នានាបានដោយមិនគិតថ្លៃផងដែរ៕

ពត៌មានបន្ថែមសូមទំនាក់ទំនងលេខ 0968888811