admin – Page 17 – Investing Cambodia

ពិសេសណាស់! បានលេខហុងស៊ុយ លេខគណនីពិសេស មិនចំណាយប្រាក់ជាមួយ អេស៊ីលីដាម៉ូបាល!

Posted on September 2, 2021 by admin

ទាំងខ្ញុំទាំងគេង មិនថាឡើយចាប់លេខធ្វើអ្វីមួយ លេខទូរសព្ទ ឬក៏បើកគណនីយធនាគារនោះទេ គឺតែងតែចង់បាននូវលេខហុងស៊ុយ ឬលេខពិសេសដែលនាំសំណាង។ ឥឡូវនេះអស់កង្វល់ជាមួយធនាគារអេស៊ីលីដា យើងអាចយកលេខគណនីពិសេសៗ ដែលជាលេខទូរសព្ទដៃរបស់ខ្លួន ទោះជាលេខការ៉េក៏ដោយ ក៏មិនចាំបាច់ចំណាយប្រាក់ទិញដែរ ដោយគ្រាន់តែទាញយកកម្មវិធីអេស៊ីលីដាម៉ូបាល លេខទូរសព្ទដៃពិសេសរបស់អ្នក គឺជាលេខគណនីអេស៊ីលីដាវ៉លឡែត (អេស៊ីលីដាម៉ូបាល) តែម្តង។

លោកស្រី សុខ សោភា នាយិកាប្រតិបត្តិជាន់ខ្ពស់ទីផ្សារ បានមានប្រសាសន៍ថាដោយសង្កេតឃើញថាអតិថិជនតែងតែចង់បាននូវគណនីលេខពិសេសៗ ឬដាក់លេខទូរសព្ទដៃជាលេខគណនីនោះ ធនាគារអេស៊ីលីដាបានធ្វើទំនើបកម្មបច្ចេកវិទ្យារបស់ខ្លួនដែលអនុញ្ញាត្តិឱ្យអតិថិជនកំណត់លេខពិសេស ឬដាក់លេខទូរសព្ទដៃរបស់ខ្លួនសម្រាប់បង្កើតគណនីដោយមិនគិតកម្រៃសេវាទៀតផង។

លោកស្រីនាយិកាបានមានប្រសាសន៍យ៉ាងដូច្នេះថា៖«អតិថិជនប្រើប្រាស់អេស៊ីលីដាម៉ូបាលមិនបារម្ភរើសលេខពិសេស ឬចំណាយលុយសម្រាប់លេខគណនីពិសេសៗនោះទេ លេខទូរសព្ទដៃរផ្ទាល់ខ្លួនគឺជាលេខគណនីអេស៊ីលីដាម៉ូបាលរបស់អតិថិជន ហើយសំខាន់អេស៊ីលីដាម៉ូបាលមានសេវាកម្មជាច្រើនដែលអាចបំពេញតម្រូវការរបស់គាត់ប្រើប្រាស់យ៉ាងងាយស្រួល និងមិនអស់ថ្លៃសេវា» ។

វិធីងាយៗដោយគ្រាន់តែអតិថិជន និងសាធារណជន ចូលទៅទាញយកកម្មវិធីអេស៊ីលីដាម៉ូបាលនេះ តាមរយៈ App Store, Play Store, App gallery នោះអ្នកនឹងទទួលបានការប្រើប្រាស់សេវាកម្មយ៉ាងច្រើនតាមសេចក្តីត្រូវការ និងដោយមិនអស់ថ្លៃសេវា ។

ប្រសិនបើមានចម្ងល់ ឬសំណូមពរផ្សេងៗ សូមទូរសព្ទទៅកាន់លេខ៖ ០២៣ ៩៩៤ ៤៤៤, ០១៥ ៩៩៩ ២៣៣ (បម្រើសេវា ២៤ម៉ោង) ឬផ្ញើសារអ៊ីមែល ទៅកាន់ ៖ emailinquiry@acledabank.com.kh ៕

កម្ពុជានឹងជម្រុញការលក់ផលិតផលខ្មែរទៅក្រៅប្រទេសកាន់តែច្រើនឡើង

Posted on September 2, 2021 by admin

ភ្នំពេញៈ រដ្ឋាភិបាលកម្ពុជាតាមក្រសួងក្រសួងពាណិជ្ជកម្មបានប្តេជ្ញាជំរុញការលក់ផលិតផលខ្មែរដែលមានសក្តានុពលនៅក្នុងនិងក្រៅប្រទេសក្នុងបរិបទនៃការរីករាលដាលជំងឺកូវីដ១៩។

រដ្ឋមន្រ្តីក្រសួងពាណិជ្ជកម្ម លោក ប៉ាន សូរស័ក្តិ បានដឹកនាំកិច្ចប្រជុំលើកទី១ នៃក្រុមការងារដោះស្រាយបញ្ហាប្រឈម និងជំរុញការលក់ផលិតផលខ្មែរនៅក្នុងប្រទេសនិងនាំចេញទៅក្រៅប្រទេស កាលពីថ្ងៃទី ៣០ ខែសីហា។

ក្នុងកិច្ចប្រជុំនេះ លោកបានលើកឡើងពីការខិតខំប្រឹងប្រែងរបស់ក្រសួងពាណិជ្ជកម្ម ក្នុងកិច្ចការជំរុញចរាចរផលិតសក្តានុពលរបស់កម្ពុជាទាំងលើទីផ្សារក្នុងស្រុក និងទីផ្សារក្រៅប្រទេស នាពេលកន្លងមក តាមរយៈការដាក់ចេញ និងចូលរួមអនុវត្តនូវគោលនយោបាយ និងយុទ្ធសាស្រ្ត។

លោករដ្ឋមន្រ្តី បានឱ្យដឹងទៀតថា ក្រសួងបាននិងកំពុងបន្តលើកកម្ពស់ភាពប្រកួតប្រជែងតាមរយៈការកសាងច្បាប់ និងបទដ្ឋានគតិយុត្ត ក្នុងនោះ មានច្បាប់ស្តីពីពាណិជ្ជកម្មតាមប្រព័ន្ធអេទ្បិចត្រូនិក ច្បាប់ស្តីពីកិច្ចការពារអ្នកប្រើប្រាស់ និងច្បាប់ស្តីពីការប្រកួតប្រជែង ជាដើម ហើយការធ្វើកំណែទម្រង់ស្ថាប័ននៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ និងការបង្កើតក្រុមការងារជាសសរស្តម្ភក្រោមក្រសួងពាណិជ្ជកម្ម។

ព្រមទាំង ការដាក់ដំណើរការគម្រោងឌីជីថល Go4Cam និង CambodiaTrade.com ដើម្បីតភ្ជាប់ទៅនឹងសហគ្រាសមីក្រូ តូច និងមធ្យម។ ពិសេសការចរចាបង្កើតទីផ្សារបន្ថែមតាមរយៈការបង្កើតកិច្ចព្រមព្រៀងពាណិជ្ជកម្មសេរីទ្វេភាគី និងតំបន់ ដូចជា កិច្ចព្រមព្រៀងពាណិជ្ជកម្មភាពជាដៃគូគ្រប់ជ្រុងជ្រោយតំបន់ (RCEP) កិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) កម្ពុជា-កូរ៉េ (CKFTA) និងអាចឈានដល់កិច្ចព្រមព្រៀងពាណិជ្ជកម្មសេរីទ្វេភាគីមួយចំនួនទៀត។

លើសពីនេះ ក្រសួងបន្តអនុវត្តយុទ្ធនាការលើកស្ទួយផលិតកម្ពុជាតាមរយៈការតាំងពិព័រណ៍ពាណិជ្ជកម្ម(តាមអនឡាញ) ដើម្បីជំរុញផលិតផលជាតិក្នុងអំទ្បុងពេលបិទខ្ទប់។

លោកថ្លែងថា៖ «តាមរយៈការបន្តអនុវត្តនូវយន្តការខាងលើនេះ ក្រសួងពាណិជ្ជកម្ម បានបង្កើតក្រុមការងារនេះទ្បើង ដើម្បីចូលរួមដោះស្រាយបញ្ហាប្រឈមនានាឱ្យកាន់តែរលូន និងមានប្រសិទ្ធភាពខ្ពស់ សំដៅជំរុញការលក់ផលិតផលខ្មែរទាំងលើទីផ្សារក្នុងស្រុក និងការនាំចេញទៅក្រៅប្រទេសឱ្យបានកាន់តែទូលំទូលាយ»។

ក្រុមការងារនេះបង្កើតឡើងក្នុងគោលបំណងចម្បង ដើម្បី ជួយដល់ប្រជាកសិករក្នុងការដាក់លក់ផលិតផលនៅលើទីផ្សារក្នុងស្រុក និងការនាំចេញទៅក្រៅប្រទេស និងជួយដល់អ្នកប្រើប្រាស់ សំដៅធ្វើយ៉ាងណាឱ្យទទួលបានទំនិញប្រកបដោយគុណភាព និងក្នុងតម្លៃកាន់តែប្រសើរ ព្រមទាំងជួយដល់ក្រុមហ៊ុនធុរកិច្ច និងអាជីវកម្មនានា ដើម្បីអាចធ្វើពាណិជ្ជកម្មបានយ៉ាងរលូន និងមានភាពប្រកួតប្រជែង អនុលោមតាមច្បាប់ និងបទដ្ឋានគតិយុត្តជាធរមាន។

លោករដ្ឋមន្រ្តី បានអះអាងថា ដើម្បីពង្រឹងប្រសិទ្ធិភាពលើកិច្ចការនេះ លោកបានផ្តល់អនុសាសន៍ណែនាំមួយចំនួន ដល់ក្រុមការងារដើម្បីជាទិសដៅអនុវត្ត រួមមាន ក្រុមការងារតាមវិស័យនីមួយៗ ត្រូវបន្តសហការ និងគាំទ្រគ្នា (cross-learning) ដើម្បីអាចឱ្យការងារកាន់តែមានភាពប្រទាក់ក្រទ្បាគ្នា និងបំពេញបន្ថែមគ្នាទៅវិញទៅមក។

អនុវត្តឱ្យបានម៉ឺងម៉ាត់នូវអនុសាសន៍ណែនាំ និងពិសេស លទ្ធផលនៃកិច្ចពិភាក្សា ដោយក្នុងបរិការណ៍នេះ គ្រប់សមាជិកនៃក្រុមការងារសុទ្ធតែមានបទពិសោធន៍ឆ្លងកាត់ និងដោះស្រាយបញ្ហានានាក្នុងអំទ្បុងពេលនៃវិបត្តិកូវីដ១៩ហើយបរិយាកាសទីផ្សារមានការវិវត្តយ៉ាងឆាប់រហ័សដែលបង្កទ្បើងដោយភាពមិនប្រាកដប្រជានៃវិបត្តិជំងឺឆ្លង និងការប្រកួតប្រជែងគ្នានៃមហាអំណាចសេដ្ឋកិច្ច៕

កម្ពុជាដាក់ឱ្យប្រើប្រាស់ជាផ្លូវការនូវប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានដំណាក់កាលទី២ ដោយបញ្ចូលក្រសួង-ស្ថាប័នចំនួន ៤ បន្ថែមទៀត

Posted on September 2, 2021 by admin

ភ្នំពេញៈ រាជរដ្ឋាភិបាលកម្ពុជាបានសម្ពោធដាក់ឱ្យប្រើប្រាស់ជាផ្លូវការនូវប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន(Single Portal)ហើយចាប់ពីថ្ងៃទី១ ខែកញ្ញាតទៅដោយបានបញ្ចូលក្រសួង-ស្ថាប័នចំនួន ៤ បន្ថែមទៀត ដើម្បីពង្រីកវិសាលភាពផ្តល់អាជ្ញាបណ្ណដល់វិស័យអាទិភាពសម្រាប់គាំទ្រកំណើនសេដ្ឋកិច្ចជាតិក្នុងអំឡុងពេលវិបត្តិកូវីដ១៩។

ក្នុងកម្មវិធីប្រកាសដាក់ឱ្យដំណើរការជាផ្លូវការដំណាក់កាលទី ២ ដែលធ្វើឡើងតាមប្រព័ន្ធអនឡាញ នៅថ្ងៃពុធនេះ លោក អូន ព័ន្ធមុនីរ័ត្ន ឧបកនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានថ្លែងថា ក្រសួង-ស្ថាប័នទាំង ៤ រួមមាន ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ក្រសួងទេសចរណ៍ ក្រសួងប្រៃសណីយ៍ និងទូរគមនាគមន៍ និងនិយ័តករអាជីវកម្មអចលនវត្ថុ និងបញ្ចាំនៃអាជ្ញាធរសេវាកម្មហិរញ្ញវត្ថុមិនមែនធនាគារ។

លោកបានថ្លែងទៀតថា ការដាក់ឱ្យដំណើរការប្រព័ន្ធ Single Portal ធ្វើឡើងក្នុងគោលបំណងដើម្បីកែប្រែបរិយាកាសធុរកិច្ច និងវិនិយោគក្នុងទិសដៅលើកកម្ពស់ភាពប្រកួតប្រជែងរបស់កម្ពុជា ជាពិសេសចូលរួមចំណែករក្សានិរន្តរភាពសេដ្ឋកិច្ចក្នុងបរិការណ៍នៃការរីករាលដាលជំងឺកូវីដ១៩ តាមរយៈការធ្វើឌីជីថលរូបនីយកម្មលើសេវាសាធារណៈ។

លោកបានលើកឡើងថា៖ «ការដាក់ឱ្យដំណើរការ Single Portal ដំណាក់កាលទី២នេះ បានបង្ហាញយ៉ាងច្បាស់ថា ការកែទម្រង់របស់រាជរដ្ឋាភិបាលក្នុងការលើកកម្ពស់បរិយាកាសធុរកិច្ចនិងវិនិយោគនៅកម្ពុជាបានសម្រេចនូវលទ្ធផលដូចការគ្រោងទុក»។

ក្នុងដំណាក់កាលទី១ រាជរដ្ឋាភិបាលកម្ពុជាបានដាក់ឱ្យដំណើរការប្រព័ន្ធ Single Portal កាលពីថ្ងៃទី ១៥ ខែមិថុនា ឆ្នាំ ២០២០ ដែលមាន ក្រសួង និងស្ថាប័នចំនួន ៦ រួមមាន ក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម និងក្រសួងការងារ និងបណ្ដុះបណ្ដាលវិជ្ជាជីវៈ អគ្គនាយកដ្ឋានពន្ធដារ និងក្រុមប្រឹក្សាអភិវឌ្ឍន៍កម្ពុជា៕

កម្ពុជានឹងដាក់ដំណើការប្រព័ន្ធចុះបញ្ជីតាមថ្នាលបច្ចេកវិទ្យា (Single Portal) ដំណាក់កាលទី២ស្អែកនេះ

Posted on August 31, 2021 by admin

ភ្នំពេញៈរដ្ឋាភិបាលកម្ពុជានឹងដាក់ឱ្យដំណើរការប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន (Single Portal)ដំណាក់កាលទី២ ជាផ្លូវការ នៅថ្ងៃទី១ ខែកញ្ញា ឆ្នាំ២០២១។នេះបើតាមសេចក្តីប្រកាសព័ត៌មានរបស់ក្រសួងនេះ។

សេចក្តីប្រកាសព័ត៌មានបន្តថា កម្មវិធីនេះ ក្រោមអធិបតិភាពលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងមានការចូលរួមពីក្រសួង-ស្ថាប័ន សមាគម អង្គការសង្គមស៊ីវិល ដៃគូអភិវឌ្ឍន៍ ស្ថានទូត និងគ្រឹះស្ថានសិក្សាមួយចំនួនទៀត។

សេចក្តីប្រកាសព័ត៌មានបញ្ជាក់ថា ក្នុងដំណាក់កាលពី២នេះ ប្រព័ន្ធនេះនឹងពង្រីកវិសាលភាពដល់ការស្នើសុំអាជ្ញាបណ្ណ ឬលិខិតអនុញ្ញាតផ្សេងៗតាមអនឡាញទៅតាមសកម្មភាពអាជីវកម្មពីក្រសួង-ស្ថាប័នជំនាញដែលមានតួនាទីត្រួតពិនិត្យផ្នែកបច្ចេកទេសតាមវិស័យ។ ក្រសួង-ស្ថាប័នទាំង ៤ រួមមាន ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ក្រសួងទេសចរណ៍ ក្រសួងប្រៃសណីយ៍ និងទូរគមនាគមន៍ និងនិយ័តករអាជីវកម្មអចលនវត្ថុ និងបញ្ចាំនៃអាជ្ញាធរសេវាកម្មហិរញ្ញវត្ថុមិនមែនធនាគារដែលទើបនឹងបង្កើតកាលថ្មីនេះ។

សេចក្តីប្រកាសព័ត៌មានបន្តថា៖«នេះគឺជាការកែទម្រង់មុតស្រួច ជាកញ្ចប់របស់ប្រមុខរាជរដ្ឋាភិបាលកម្ពុជា ដែលបានដាក់ចេញ ក្នុងវេទិការាជរដ្ឋាភិបាល-ផ្នែកឯកជនលើកទី១៨ កាលពីថ្ងៃទី២៩ ខែមីនា ឆ្នាំ២០១៩ កន្លងទៅ»។

រដ្ឋាភិបាលកម្ពុជាបានដាក់ឱ្យដំណើរការការចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន(Single Portal) កាលពីថ្ងៃទី ១៥ ខែមិថុនា ឆ្នាំ ២០២០។ ក្រសួង និងស្ថាប័នរដ្ឋចំនួន ៦ ដែលចុះបញ្ជីក្នុងប្រព័ន្ធនេះ រួមមានក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម និងក្រសួងការងារ និងបណ្ដុះបណ្ដាលវិជ្ជាជីវៈ អគ្គនាយកដ្ឋានពន្ធដារ និងក្រុមប្រឹក្សាអភិវឌ្ឍន៍កម្ពុជា។

គិតត្រឹមថ្ងៃទី ១៤ ខែមិថុនាដែលមានរយៈពេល១ឆ្នាំគត់ ពាក្យស្នើសុំចំនួន ៦ ១៦៤ ត្រូវបានអនុម័តជាមួយនឹងទំហំដើមទុនសរុប ២ ៦៣១ លានដុល្លារ។នេះបើតាមក្រសួងសេដ្ឋកិច្ច និងហិរញ្ញវត្ថុ៕

ផ្សារទំនើបលក់រាយ 7-Eleven បើកជាផ្លូវការនៅកម្ពុជាជាលើកដំបូង

Posted on August 31, 2021 by admin

ភ្នំពេញ៖ CP All Pcl របស់ ថៃ បានបើកដំណើរការហាងលក់រាយ 7-Eleven លើកដំបូងរបស់កម្ពុជា ក្នុងការចាប់យកនូវកំណើននៃតម្រូវការនៅក្នុងប្រទេសអាស៊ានមួយនេះ។

ហាងលក់រាយ 7-Eleven លើកដំបូងត្រូវបានចាប់ផ្ដើមដំណើរការជាផ្លូវការកាលពីថ្ងៃទី៣០ ខែសីហា នៅក្នុងវិស័យដែលចង្អៀតបំផុត និងផ្លូវពាណិជ្ជកម្មនៅជ្រោយចង្វារ តាមបណ្ដោយផ្លូវជាតិលេខ៦។

យោងតាមសេចក្ដីប្រកាសព័ត៌មានរបស់ក្រុមហ៊ុន «ហាងលក់រាយ7-Elevenលើកដំបូងនៅកម្ពុជា ត្រូវបានបើកដំណើរការជាផ្លូវការហើយ។ នេះគឺជាជំហានដ៏សំខាន់មួយសម្រាប់ក្រុមហ៊ុន CP ALL ក្នុងការពង្រីកទៅក្នុងតំបន់អាស៊ាន ដែលបញ្ជាក់ពីភាពខ្លាំងនៃសេវាកម្មពីប្រទេសថៃ ចំពោះអតិថិជនកម្ពុជា ដែលផ្តោតការយកចិត្តទុកដាក់លើការធ្វើអាជីវកម្មស្របជាមួយនឹងការបង្កើតតម្លៃសម្រាប់សង្គម «បង្កើតនិងចែករំលែកឱកាស»។

លោក Mr.Chairoj Tiwatmunoharoen អនុប្រធានជាន់ខ្ពស់ក្រុមហ៊ុន CP All បានឱ្យដឹងថា ALL (Cambodia) Co., Ltd ជាក្រុមហ៊ុនបុត្រសម្ព័ន្ធរបស់ក្រុមហ៊ុន CP ALL បានចុះកិច្ចព្រមព្រៀងសិទ្ធិធ្វើអាជីវកម្មក្រុមហ៊ុន 7-Eleven Inc កាលពីឆ្នាំមុន ដើម្បីប្រតិបត្តិការហាងលក់រាយ7-Eleven Stores នៅក្នុងប្រទេសកម្ពុជា។

លោក Chairoj ថ្លែងថា៖ «ការបើកដំណើរការហាងលក់រាយ 7-Eleven លើកដំបូងនៅកម្ពុជានៅថ្ងៃនេះ វាជាសញ្ញាដ៏សំខាន់មួយនៃមិត្តភាព និងទំនាក់ទំនងដ៏ល្អរវាងប្រទេសទាំងពីរ ទាំងកម្រិតរដ្ឋាភិបាល និងប្រជាជន និងគុណភាពសេវា»។

លោកលើកឡើងថា៖ «អ្វីដែលសំខាន់ដើម្បីបញ្ជាក់គឺថា ការគោរពច្បាប់ និងការអនុវត្តរបស់សង្គមដែលយើងគឺជាផ្នែកមួយ។ ជាមួយគ្នានេះដែរ យើងបានទទួលយកដំណោះស្រាយដូចគ្នានឹងប្រទេសថៃ។ ក្រៅពីគុណភាពផលិតផល និងសេវា យើងនឹងខិតខំរួមចំណែកក្នុងការផ្តល់តម្លៃដល់ការចែកចាយ ការអភិវឌ្ឍធនធានមនុស្ស ការលើកកម្ពស់សហគ្រាសខា្នតតូច និងការធ្វើអាជីវកម្មដោយគិតគូរពីបរិស្ថាន ដើម្បីលើកកម្ពស់សេដ្ឋកិច្ចកម្ពុជា។ យើងសង្ឃឹមថា នឹងទទួលបានការគាំទ្រយ៉ាងល្អពីប្រជាជនកម្ពុជា»។

លោកអ៊ូក សោភ័ណ បានប្រាប់PlusOne ថា ការសម្ពោធសាខាហាងលក់រាយ 7-Eleven បានបញ្ជាក់ថា ការវិនិយោគរបស់ក្រុមហ៊ុនCP All នៅក្នុងប្រទេសកម្ពុជា គឺស្របជាមួយនឹងគំនិតផ្តួចផ្ដើមជាយុទ្ធសាស្ដ្រការទូតសេដ្ឋកិច្ចកម្ពុជា និងអនុវត្តដោយលោកប្រាក់ សុខុន រដ្ឋមន្ដ្រីក្រសួងកិច្ចការបរទេស និងសហប្រតិបត្តិការអន្តរជាតិ ដោយមានការគាំទ្រពីលោកនាយករដ្ឋមន្ដ្រី ហ៊ុន សែន។

7-Eleven ជាប្រតិបត្តិករសិទ្ធិធ្វើអាជីវកម្មដែលចុះបញ្ជីនៅទីក្រុងបាងកក ដែលជាសាខាលក់រាយរបស់ក្រុមហ៊ុន Charoen Pokphand Group Co Ltd បានផ្ដល់សិទ្ធិធ្វើអាជីវកម្មដល់ក្រុមហ៊ុន CP All (Cambodia) Co Ltd ក្នុងរយៈពេល៣០ឆ្នាំក្នុងការបង្កើត និងប្រតិបត្តិការសាខា 7-Eleven។ នេះបើយោងតាមរបាយការណ៍ប្រព័ន្ធព័ត៌មានក្នុងស្រុករបស់ប្រទេសថៃ។

របស់មន្ដ្រីនៅក្រុមហ៊ុនCP Allនៅប្រទេសថៃដែលលើកឡើងថា ក្រុមហ៊ុន CP All គ្រោងនឹងបើកដំណើរការហាងលក់រាយយ៉ាងហោចណាស់ ៦ទៀតនៅឆ្នាំនេះ ៕

ទោះបីកម្ពុជាកំពុងប្រយុទ្ធប្រឆាំងនឹងជំងឺកូវីដ១៩ រដ្ឋាភិបាលនៅបន្តធ្វើការកំណែទម្រង់សេដ្ឋកិច្ចដ៏ស៊ីជំរៅ

Posted on August 26, 2021 by admin

ក្រុងបាងកក៖ លោកអ៊ូក សោភ័ណ ឯកអគ្គរាជទូតកម្ពុជាប្រចាំទីក្រុងបាងកក បានប្រាប់មេដឹកនាំ ធុរកិច្ចជនរបស់ប្រទេសកម្ពុជា ឡាវ មីយ៉ាន់ម៉ា វៀតណាម និងថៃ (CLMVT) ថា រដ្ឋាភិបាលកម្ពុជា បានធ្វើកំណែទម្រង់សេដ្ឋកិច្ចស៊ីជម្រៅ ចំពេលការរីករាលដាលជំងឺកូវីដ១៩ ដើម្បីរក្សាកំណើនសេដ្ឋកិច្ចរួមក្នុងរយៈពេលវែង។

លោក សោភ័ណ ថ្លែងនៅក្នុងវេទិកាCLMVT Forum 2021 ស្ថិតក្រោមប្រធានបទ «ការបង្កើនល្បឿនការស្ទុះងើបឡើងវិញដ៏រឹងមាំ» ដែលត្រូវបានរៀបចំឡើងដោយក្រសួងពាណិជ្ជកម្មថៃ កាលពីថ្ងៃទី២៤ខែសីហា។

លោកបានឲ្យដឹងថា កម្ពុជាបានធ្វើការកំណែទម្រង់និងវិធានការផ្តោតការយកចិត្តទុកដាក់ជាបន្តបន្ទាប់ ដែលរួមមានការបង្ហាញច្បាប់វិនិយោគថ្មីនិងការធានាឥណទានរបស់រដ្ឋាភិបាលការអនុម័តច្បាប់ពាណិជ្ជកម្មអេឡិចត្រូនិក និងយុទ្ធសាស្ត្ររបស់ខ្លួន សេចក្តីព្រាងច្បាប់ស្តីពីភាពជាដៃគូសាធារណៈ-ឯកជន ការចុះឈ្មោះអាជីវកម្មអនឡាញ និងគំនិតផ្តួចផ្តើមសេដ្ឋកិច្ចឌីជីថលមួយចំនួន។

ជាមួយគ្នានេះដែរ លោកបានឲ្យដឹងថា រដ្ឋាភិបាលក៏បានដាក់ចេញនូវការទូតសេដ្ឋកិច្ច ចាប់តាំងពីឆ្នាំ២០១៨ ហើយបន្ទាប់មកគឺ ការអនុម័ត «យុទ្ធសាស្ដ្រការទូតសេដ្ឋកិច្ច (EDS)» កាលពីដើមឆ្នាំនេះ សំដៅផ្លាស់ប្តូរការទូតធម្មតាទៅជាការទូតប្រភេទថ្មី និងរឹងមាំមួយ ដើម្បីជំរុញបន្ថែមការផ្លាស់ប្តូរពាណិជ្ជកម្មអន្តរជាតិ ការវិនិយោគផ្ទាល់បរទេស ទេសចរណ៍ វប្បធម៌ និងកីឡា តាមរយៈការប្រែក្លាយបញ្ហាប្រឈមទៅជាកាលានុវត្តភាពសម្រាប់កម្ពុជា។

លោកថ្លែងថា៖ «ទាំងនេះមានគោលបំណង ដើម្បីលើកកម្ពស់សមត្ថភាពប្រកួតប្រជែងរបស់ខ្លួន និងជួយសម្រួលបរិយាកាសអំណោយផលសម្រាប់ធុរកិច្ច និងការវិនិយោគនៅក្នុងប្រទេសនេះ»។ លោកបន្តថា នៅពេលនេះរដ្ឋាភិបាលកំពុងត្រៀមខ្លួន ដើម្បីដាក់ចេញផែនការស្ទុះងើបឡើងវិញនៃសេដ្ឋកិច្ចឆ្នាំ២០២១-២០២៣ ដើម្បីលើកស្ទួយសេដ្ឋកិច្ចចេញផុតពីជំងឺកូវីដ១៩។

លោកលើកឡើងថា៖ «រដ្ឋាភិបាលប្ដេជ្ញាចិត្តថា នឹងប្រែក្លាយវិបត្តិនេះទៅជាកាលានុវត្តភាពមួយសម្រាប់កំណើន ក្នុងអំឡុងពេល និងក្រោយដំណាក់កាលជំងឺកូវីដ១៩ ដើម្បីបង្កើតប្រព័ន្ធសង្គមសេដ្ឋកិច្ចកាន់តែរឹងមាំមួយដែលធន់នឹងវិបត្តិដែលកើតឡើងនៅពេលអនាគត»។

លោកបញ្ជាក់ថា៖ «ខ្ញុំជឿជាក់ថា វេទិកានេះនឹងផ្ដល់ឱកាសដល់អ្នកចូលរួមទាំងអស់ ដើម្បីផ្លាស់ប្តូរទស្សនៈ ចែលរំលែកគំនិត និងផ្ដល់អនុសាសន៍ដើម្បីការស្ដារសេដ្ឋកិច្ច របស់កម្ពុជា ឡាវ មីយ៉ាន់ម៉ា វៀតណាម និងថៃ លើដំណើរផ្លូវដ៏រឹងមាំនៅក្នុងតំបន់»។ លោកបន្តថា៖ «តំបន់ដែលយើងកំពុងស្ថិតនៅក្នុងគ្រួសារមេគង្គ។ យើងមានទីតាំងស្ថិតនៅចំកណ្តាលដីគោកអាស៊ានដែលមានចំនួនកម្លាំងពលកម្មផលិតភាពខ្ពស់ និងមូលដ្ឋានផលិតកម្មសំខាន់ៗសម្រាប់សេដ្ឋកិច្ចពិភពលោក”។

លោក សោភ័ណ បញ្ជាក់ថា៖ «រហូតមកដល់ពេលនេះ យើងទទួលបានជោគជ័យក្នុងការធានាឲ្យប្រាកដថា ប្រជាជនទទួលបានសន្ដិភាព ស្ថិរភាព សន្ដិសុខ និងការអភិវឌ្ឍជាប្រចាំ។ ជាអកុសល ផលប៉ះពាល់យ៉ាងធ្ងន់ធ្ងរដោយសារតែការរីករាលដាលជំងឺកូវីដ១៩ ចាប់តាំងពីដើមឆ្នាំមុន ភាគច្រើនបានរុញច្រានសេដ្ឋកិច្ចក្នុងតំបន់និងពិភពលោកឱ្យធ្លាក់ចូលក្នុងការដើរថយក្រោយនៃសេដ្ឋកិច្ច និងបណ្តាលឱ្យមានការលំបាកយ៉ាងខ្លាំងដល់ជីវិតមនុស្ស»។

បើយោងតាមក្រសួងសេដ្ឋកិច្ច និងហិរញ្ញវត្ក្នុងឆ្នាំ ២០២១ ការផ្ទុះឡើងការឆ្លងក្នុងសហគមន៍២០កុម្ភៈ គួបផ្សំជាមួយនឹងការមកដល់វីរុសវ៉ារ្យង់Delta និងការកើនឡើងករណីឆ្លងដែលនាំចូលនៅពេលថ្មីៗ បានបណ្ដាលឲ្យកម្ពុជាកែតម្រូវការព្យាករកំណើនសេដ្ឋកិច្ចរបស់ខ្លួនសម្រាប់ឆ្នាំ២០២១ មកនៅត្រឹម២,៤ភាគរយធ្លាក់ចុះពី៤,០ភាគរយកាលពីដើមឆ្នាំនេះ ហើយកំណើនសេដ្ឋកិច្ចរបស់កម្ពុជា នឹងមានចំនួន៤,៨ភាគរយសម្រាប់ឆ្នាំ២០២២ នៅពេលដែលវីរុសកូរ៉ូណាធូរស្រាល៕

ធនាគារអេស៊ីលីដាដាក់ឲ្យដំណើការ «សេវាកម្មធនាគារស្វ័យប្រវត្តិ» ១២ ទីតាំងនៅភ្នំពេញ និង១ទីតាំងក្នុងខេត្តសៀមរាប

Posted on August 26, 2021 by admin

ជាមួយនិងការនិយមប្រើប្រាស់បច្ចេកវិទ្យាទំនើបៗ និងដើម្បីបង្កលក្ខណ:ងាយស្រួលអតិថិជនជាពិសេសអំឡុងពេលនៃការរីករាលដាលជំងឺកូវីដ១៩ ធនាគារអេស៊ីលីដាបានធ្វើឲ្យប្រសើរឡើងផ្នែកហេដ្ឋារចនាសម្ព័ន្ធឌីជីថល ដោយធនាគារដាក់ឲ្យដំណើរ ការទីតាំង«សេវាកម្មធនាគារស្វ័យប្រវត្តិ» (Banking Self-Service) នៅទីតាំងចំនួន ១២ នៅក្នុងរាជធានីភ្នំពេញ និង១ទីតាំងនៅខេត្តសៀមរាបក្នុងការផ្តល់ជាជម្រើសកាន់តែសម្បូរបែប និងងាយស្រួល ដល់អតិថិជនសម្រាប់ការប្រើប្រាស់សាច់ប្រាក់ទៅតាមតម្រូវការ បន្ថែមពីលើការប្រើប្រាស់តាម អេស៊ីលីដាម៉ូបាល ។

លោកស្រី សុខ សោភា នាយិកាប្រតិបត្តិជាន់ខ្ពស់ទីផ្សារ នៃធនាគារ អេស៊ីលីដា បានមានប្រសាសន៍យ៉ាងថា ៖ «ធនាគារ អេស៊ីលីដា កំពុងបំពាក់បំពាក់ម៉ាស៊ីនទំនើបៗ ប្រកបដោយបច្ចេកវិទ្យាដោយបង្កើតនូវភាពលេចធ្លោនិងទាន់សម័យសម្រាប់អតិថិជន, សាធារណជន និងបណ្តាដៃគូពាណិជ្ជកម្មរបស់យើង ដែលរួមមាន ម៉ាស៊ីនដាក់ប្រាក់-ដកប្រាក់, ម៉ាស៊ីនដកប្រាក់, ម៉ាស៊ីនបើកគណនី, ម៉ាស៊ីនបើកគណនីមានកាលកំណត់ និងម៉ាស៊ីនដាក់កាបូបប្រាក់សម្រាប់ដៃគូដែលមានការចរាចរក្រដាសប្រាក់ច្រើនប្រភេទទៀត ។

លោកស្រីនាយិកាបានបន្ថែមថា ៖ «អត្ថប្រយោជន៍ គឺការធានាបាននូវសេចក្តីត្រូវការរបស់អតិថិជន ក្នុងការប្រើប្រាស់សាច់ប្រាក់ទៅតាមពេលវេលាដែលគាត់ត្រូវការ មិនថាពេលណា ឬកន្លែងណាទេ គឺងាកឃើញៗគ្រប់កន្លែង បើហួសមួយកន្លែង ដល់មួយកន្លែងទៀត ដោយមិនចាំបាច់ត្រឡប់ក្រោយឡើយ ។ គម្រោងរបស់យើងនឹងមានផែនការបង្កើតឲ្យមានទីតាំងរបៀបនេះរហូតដល់ ៥០ទីតាំង នៅទូទាំងប្រទេស។»

លោកស្រីបានបន្ថែមទាំងទៀតថា៖« យើងទាំងអស់គ្នា ដែលបំរើការនៅធនាគារ អេស៊ីលីដា មានមោទនភាពណាស់ដែលមានឱកាសក្នុងការបម្រើសេវាកម្មហិរញ្ញវត្ថុជូនអតិថិជន, សាធារណជន គ្រប់ជាតិសាសន៍ ប្រកបដោយកាយវាចារចិត្តស្មោះស្ម័គ្រ និងមានក្រមសីលធម៌វិជ្ជាជីវៈខ្ពស់បំផុត» ។

ជាមួយទីតាំងសេវាកម្មធនាគារស្វ័យប្រវត្តិ (Banking Self Service) របស់ធនាគារ អេស៊ីលីដា លោកអ្នកអាចធ្វើសេវាកម្មធនាគារដោយខ្លួនឯងបាន ២៤ម៉ោងលើ២៤ម៉ោង តាមតម្រូវការ ដូចជា ការដាក់ប្រាក់ ផ្ទេរប្រាក់ ឬបើកគណនី ជាដើម ។

គួរកត់សម្គាល់ថា ធនាគារ អេស៊ីលីដា មកដល់ពេលនេះ មានម៉ាស៊ីន អេធីអឹមសម្រាប់បំរើអតិថិជនទាំងយប់ថ្ងៃ ២៤/២៤ ចំនួន៧៩២ ម៉ាស៊ីនឆូតកាតចំនួន ៤,៣២១ម៉ាស៊ីន។ កាលពីដើមឆ្នាំ២០២១នេះ ធនាគារ អេស៊ីលីដា បានធ្វើទំនើបកម្មនិងអភិវឌ្ឍ អេស៊ីលីដាម៉ូបាល របស់ខ្លួន កាន់តែទំនើប មានពហុមុខងារច្រើនសម្បូរបែប ដែលធ្វើឲ្យអតិថិជនកាន់តែទទួលបានអត្ថប្រយោជន៍យ៉ាងច្រើន និងងាយស្រួលប្រើ ដែលមកដល់ពេលនេះ អេបមួយនេះមានចំនួនអ្នកប្រើប្រាស់២លាននាក់ ៕

លោកអ្នកអាចស្វែងរកទីតាំងសេវាកម្មធនាគារស្វ័យប្រវត្តិទាំង១៣ទីតាំងដូចខាងក្រោម ៖

១- BSS (ផ្លូវកម្ពុជាក្រោម) (ចន្លោះពីស្តុបដេអិន ដល់ផ្លូវមុនីវង្ស)

២-BSS (ផ្លូវលេខ ២០០៤) (ចន្លោះពីស្តុប Nokia ដល់បុរីអរគីដេរ)

៣- BSS (ផ្លូវកម្ពុជាក្រោម) (ចន្លោះពីផ្លូវស្ពានអាកាស៧មករា ដល់ស្តុបសាលាសន្ធរម៉ុក)

៤- BSS (ផ្លូវទេពផន) (ចន្លោះពីកែងផ្សារដេប៉ូ ដល់សំណង់១២)

៥- BSS (ផ្លូវលេខ ១៦៣) (ចន្លោះពីផ្សារទួលទំពូង ដល់រង្វង់មូលផ្សារដើមថ្កូវ)

៦- BSS (ផ្លូវជាតិលេខ ២) (WB ចាក់អង្រែក្រោម)

៧- BSS (ផ្លូវលេខ ២០១១) (ម្តុំផ្សារឈូកមាស)

៨- BSS (ផ្លូវមុនីវង្ស) (ពីស្តុបពេទ្យចិន ដល់ស្តុបបឹងត្របែក

៩- BSS (GREEN COMMUNITY MALL)

១០- BSS (CAMKO)

១១- BSS (វិថីស៊ីវត្ថា (ស្របផ្លូវ ២ធ្នូ)(ខេត្តសៀមរាប)

១២- BSS (ផ្លូវមាត់ទន្លេ) (ចន្លោះពីផ្សាររាត្រី ដល់ស្តុបវត្តឧណ្ណាលោម)

១៣- BSS (ផ្លូវលេខ ៣១០) (ចន្លោះពីស្តុបអនុវិទ្យាល័យទួលស្លែង ដល់ផ្លូវមុនីវង្ស)

លោកឧកញ្ញា គិត ម៉េង៖ សម្រេចចុះបញ្ជីក្រុមហ៊ុន Telcotech លើផ្សារហ៊ុនកម្ពុជា

Posted on August 26, 2021 by admin

ថ្ងៃនេះ ខ្ញុំមានសេចក្តីសោមនស្សរីករាយ សូមប្រកាសអំពីកិច្ចព្រមព្រៀងដែលបានចុះហត្ថលេខារវាង ក្រុមហ៊ុន Ezecom និងទីភ្នាក់ងារធានាឥណទាន Credit Guarantee and Investment Facility (“CGIF”) ជាមួយក្រុមហ៊ុនមូលបត្រ SBI Royal Securities ដែលជាអ្នករៀបចំ សម្រាប់ការលក់មូលបត្របំណុលទាំងអស់នេះដែលរំពឹងថានឹងចេញនៅត្រីមាសទី៣ ឆ្នាំនេះ។

Ezecom រួមជាមួយ Telcotech គឺជាក្រុមហ៊ុនខ្មែរ១០០% ដែលបានប្តេជ្ញាចិត្តក្នុងការផ្តល់ជូននូវវិសាលភាពគ្របដណ្តប់ និងការតភ្ជាប់អ៊ិនធឺណិតប្រកបដោយគុណភាព និងប្រសិទ្ធភាពខ្ពស់សម្រាប់ប្រជាជនកម្ពុជា។ក្នុងនាមខ្ញុំជាប្រធាន ខ្ញុំមានមោទនភាពយ៉ាងខ្លាំងដែលក្រុមហ៊ុនរបស់យើងបានចូលជាមូលបត្របំណុលដំបូងគេបង្អស់របស់ CGIF។

CGIF មានលក្ខខណ្ឌតម្រូវនិងស្តង់ដារខ្ពស់ នៅពេលដែលចេញផ្សាយការធានាឥណទាននេះ ដូច្នេះ ខ្ញុំមានមោទនភាពយ៉ាងខ្លាំងចំពោះក្រុមហ៊ុន Ezecom ដែលជាក្រុមហ៊ុនខ្មែរសុទ្ធសាធដំបូងគេបង្អស់ ដែលមានគ្រប់លក្ខខណ្ឌគ្រប់គ្រាន់ និងលើសកម្រិតស្តង់ដារដែលបានទាមទារក្នុងការឆ្លើយតប និងស្តង់ដារកម្រិតខ្ពស់ទាំងនេះ។នេះគឺជាកិច្ចព្រមព្រៀងដែលបានចុះហត្ថលេខាជាមួយទីភ្នាក់ងារធានាឥណទាន Credit Guarantee and Investment Facility (“CGIF”) ដែលជាទីភ្នាក់ងារធានាឥណទានបង្កើតឡើងដោយធនាគារអភិវឌ្ឍន៍អាស៊ី និងសមាជិកអាស៊ានបូក ៣ រួមមាន ប្រទេសជប៉ុន ប្រទេសកូរ៉េខាងត្បូង និងប្រទេសចិន។ការបោះផ្សាយមូលបត្របំណុលនេះនឹងផ្តល់លទ្ធភាពឱ្យយើង បន្តដឹកនាំឆ្ពោះទៅមុខបន្តទៀត ក្នុងការបង្កើតអនាគតឌីជីថលរបស់កម្ពុជា តាមរយៈការវិនិយោគលើបច្ចេកវិទ្យាទំនើបៗ និងយុទ្ធសាស្រ្តឌីជីថល ក៏ដូចជាការបង្កើតផែនទីបង្ហាញផ្លូវ ការបោះផ្សាយគំរូ និងការអនុវត្តល្អបំផុតនៃការបោះផ្សាយមូលបត្របំណុល ជាឯកជនសម្រាប់ទីផ្សារមូលធនកម្ពុជាផងដែរ។ ខ្ញុំទន្ទឹងរង់ចាំអនាគតឌីជីថលដែលនឹងកាន់តែរីកចម្រើន ដោយសារមូលបត្របំណុលនេះ។

Today, I am pleased to announce the agreement signed between Ezecom and Credit Guarantee and Investment Facility (“CGIF”) with SBI Royal Securities as the Arranger for the sale of all of the bonds which are expected to be issued in Q3 this year. Ezecom together with Telcotech are 100% Khmer companies dedicated to bringing the highest levels of access and connectivity to Cambodians.

As Chairman, I am extremely proud that this is the first ever bond to be issued by a wholly Cambodian owned company and the fact that is guaranteed by CGIF. CGIF has high requirements and standards when issuing guarantees, so I am very proud of the Company that it has met and exceeded these standards. The signed agreement with the Credit Guarantee and Investment Facility (“CGIF”), a credit guarantee agency established by the Asian Development Bank and ASEAN+3 members including Japan, South Korea and China.

The issuance of the bond will enable us to continue to lead the way in shaping Cambodia’s digital future through investments in the latest technologies and digital strategies, as well as to build the roadmap, the model, and the best practices of private placements for the Cambodian capital market. I look forward to an increasingly digital future enabled by this bond.#kithmeng #royalgroup

វិស័យរោងចក្រកាត់ដេរនៅកម្ពុជាចាប់ផ្តើមបង្កើនការអនុវត្តថាមពលដោយសន្សំសំចៃ

Posted on August 26, 2021 by admin

ភ្នំពេញ៖ ក្រុមការងាររបស់ Switch Garment រួមជាមួយនឹង វិទ្យាស្ថាន ថាមពលនិងធនធាន (TERI) ព្រមទាំងវិទ្យាស្ថានបច្ចេកវិទ្យាកម្ពុជា បានចាប់ផ្តើម សវនកម្មថាមពល រយៈពេលវែង តាមបណ្តារោងចក្រកាត់ដេរ នៅក្នុងប្រទេសកម្ពុជាចាប់ពីថ្ងៃទី២៤ខែសីហានេះតទៅ។

សវនកម្មថាមពល របស់គម្រោង Switch Garment នឹងវិភាគអំពី ការប្រើប្រាស់ថាមពល នៅក្នុងរោងចក្រកាត់ដេរ ព្រមទាំងស្វែងយល់ពី ឱកាសក្នុងការសន្សំសំចៃ និងការបង្កើនប្រសិទ្ធភាពផលិតកម្ម។

តាមរយៈគម្រោង Switch Garment សវនកម្មថាមពល នឹងជួយបំភ្លឺ វិថីឆ្ពោះទៅកាន់ការវិនិយោគផ្នែកថាមពលស្អាត តាមបណ្តារោងចក្រនានា។ ក្នុងនោះផងដែរ សវនកម្មថាមពលក៏នឹងជួយកំណត់ វគ្គ បណ្តុះបណ្តាលដែលចាំបាច់នានា សម្រាប់ជួយពង្រីកសមត្ថភាពរោងចក្រក្នុងការប្រើប្រាស់ ថាមពលប្រកបដោយចីរភាព។

នាពេលបច្ចុប្បន្ននេះ ដោយមើលឃើញពីតម្រូវការរបស់អ្នកប្រើប្រាស់សម្លៀកបំពាក់ដែលចង់កាត់បន្ថយផលប៉ះពាល់ទៅកាន់បរិស្ថាន មកពីការប្រើប្រាស់ប្រើប្រាស់សម្លៀកបំពាក់ រោងចក្រចំនួន៣០ បានចូលរួមជាដៃគូជាមួយនឹងគម្រោងSwitch Garment ហើយ គម្រោងនេះនឹងជ្រើសរើស ២០ រោងចក្រទៀត នៅចុងឆ្នាំនេះ។

លោក លី តេកហេងអគ្គនាយក សមាគមរោងចក្រកាត់ដេរនៅកម្ពុជា ដែលកំពុងដឹកនាំ ការចូលរួមរបស់រោងចក្រនៅក្នុងសវនកម្មនេះ បានមានប្រសាសន៍ថា៖ «នាពេលឥឡូវនេះ ម៉ាកអន្តរជាតិជាច្រើនដែលទទួលទិញ សម្លៀកបំពាក់ពីរោងចក្រនៅកម្ពុជា ផ្តោតជាពិសេសទៅលើ ចីរភាពនៃទំនិញ ដោយសារតែកំណើននៃការយល់ដឹងពីបរិស្ថានរបស់អ្នកប្រើប្រាស់។ ដូច្នេះ ដើម្បីរក្សាភាពប្រកួតប្រជែង វិស័យកាត់ដេរត្រូវតែដើរអោយទាន់ និន្នាការរបស់អ្នកប្រើប្រាស់។»

ជារោងចក្រដំបូងមួយដែលបានចូលរួមនៅក្នុងគម្រោង Switch Garment នាយកគ្រប់គ្រងនៃPPSEC លោកRobert Hwang បានមានប្រសាសន៍ថា៖«ថ្លៃអគ្គិសនីខ្ពស់និងការកើនឡើងនៃតម្រូវការផ្នែកចីរភាពរបស់អ្នកប្រើប្រាស់ គឺជាចំនុចប្រឈម របស់រោងចក្រកាត់ដេរនៅកម្ពុជា។ហើយ ពួកយើងបានចូលរួមក្នុងគម្រោងមួយនេះ ពីព្រោះការគ្រប់គ្រងថាមពលអោយបានល្អមានសារៈសំខាន់ដើម្បីជួយអោយរោងចក្រកាត់ដេរ នៅតែអាចបន្តការប្រកួតប្រជែងនៅលើទីផ្សារបាន។»

យោងតាមធនាគារពិភពលោកឧស្សាហកម្មកាត់ដេរសកល ផលិតដល់ទៅ ១០ % នៃទំហំឧស្ម័នកាបូនសកលប្រចាំឆ្នាំ។នៅប្រទេសកម្ពុជាGGGI បានធ្វើការប៉ាន់ប្រមាណថាការធ្វើឱ្យប្រសើរឡើងនូវការអនុវត្តថាមពលក្នុងការផលិតសម្លៀកបំពាក់អាចចូលរួមកាត់បន្ថយ ការបញ្ចេញឧស្ម័នផ្ទះកញ្ចក់រហូតដល់ទៅ១៧%៕

ABA រកបានប្រាក់ចំណូល ៩៣លានដុល្លារ នៅដើមឆ្នាំនេះ

Posted on August 19, 2021 by admin

ភ្

នំពេញ៖ABA Bank ដែលជាធនាគារចុះបញ្ជីភាគហ៊ុនរបស់កម្ពុជា បានរាយការណ៍កំណើនប្រតិបត្តិការដ៏រឹងមាំ នៅត្រីមាសទី២ឆ្នាំនេះ ទោះបីជាការរីករាលដាលដោយសារតែព្រឹត្តិការណ៍ សហគមន៍២០កុម្ភៈ កំពុងរំខានដល់សកម្មភាពសេដ្ឋកិច្ចក៏ដោយ។

យោងតាមរបាយការណ៍របស់ធនាគារ ដែលផ្ញើទៅក្រុមហ៊ុនផ្សារមូលបត្រកម្ពុជា (CSX) កាលពីថ្ងៃទី១៨ខែសីហា សម្រាប់ត្រីមាសទី២ ឆ្នាំ២០២១ ធនាគារវឌ្ឍនៈអាស៊ី ចំកាត់ ទទួលបានចំណូលពីការប្រាក់សរុបចំនួន ៤៤៣.៩៣៨ លានរៀល ដែលកើនឡើង ប្រមាណ ២៩ភាគរយ និង ប្រាក់ចំណេញចំនួន ១៩៥.២៤៨ លានរៀល ដែលកើនឡើងប្រមាណ ៤២ភាគរយ ធៀបនឹងត្រីមាសទី២ ឆ្នាំ២០២០។

ប្រាក់ចំណេញសុទ្ធរបស់ធនាគារនេះ បន្តកើនឡើងជាប្រចាំ ដែលកត់ត្រាប្រាក់ចំណូលសរុបចំនួន ៩៣លានដុល្លារ ចាប់តាំងពីដើមឆ្នាំនេះ។

លោក Yves Jacquot ប្រធានរបស់ធនាគារ ABA បានឲ្យដឹងនៅក្នុងរបាយការណ៍នេះថា នៅត្រីមាសទី២ឆ្នាំ២០២១ ស្ថានការរីករាលដាលជំងឺកូវីដ១៩នៅកម្ពុជា កាន់តែធ្ងន់ធ្ងរជាងមុន ដោយសារព្រឹត្តិការណ៍ «សហគមន៍២០កុម្ភៈ» បណ្ដាលឲ្យមានកំណើនយ៉ាងឆាប់រហ័សនៃករណីឆ្លងរីករាលដាល។

លោកថ្លែងថា៖ « ព្រឹត្តិការណ៍នេះបណ្ដាលឲ្យមានការបិទខ្ទប់នានានៅរាជធានីភ្នំពេញ និងក្រុងតាខ្មៅរយៈពេល៣សប្ដាហ៍ ដែលបានប៉ះពាល់ធ្ងន់ធ្ងរដល់បរិស្ថានអាជីវកម្មទាំងស្រុង។ កតា្តទាំងនេះ បានបន្តបង្កផលប៉ះពាល់ដល់អាជីវកម្មក្នុងស្រុក ជាពិសេសវិស័យបដិសណ្ឋារកិច្ច ទេសចរណ៍ កាត់ដេរ និងសំណង់»។

យោងតាមលោក Jacquot គិតត្រឹមត្រីមាសទី២ឆ្នាំ២០២១ កម្ចីដែលបានរៀបចំឡើងវិញមានចំនួន ១៣ ៨០៦ ជាទឹកប្រាក់ចំនួន ៧០៤លានដុល្លារអាមេរិក។ ចំណែកនៃកម្ចីដែលរៀបចំឡើងវិញនៅក្នុងផលបត្រកម្ចីសរុបមាន១៦ភាគរយ។ ទន្ទឹមនឹងនេះដែរ កម្ចីដែលបានរៀបចំឡើងវិញ ជាកម្ចីដែលមានគុណភាពខ្ពស់ ដោយសារ ៧៥ភាគរយក្នុងចំណោមនោះ បានស្នើសុំរយៈពេលអនុគ្រោះ សម្រាប់ការបង់ប្រាក់ដើម និងបន្តបង់តែការប្រាក់។

លោកលើកឡើងថា៖ «ធនាគារ ABA នឹងបន្តជួយដល់អតិថិជនកម្ចីរបស់ខ្លួន ក្នុងការជម្នះពេលវេលាដ៏លំបាកនេះតាមរយៈគោលនយោបាយរៀបចំកម្ចីឡើងវិញ។ បន្ថែមលើការរៀបចំកម្ចីឡើងវិញ ធនាគារបានបន្តផ្ដល់កម្ចីថ្មីៗដល់អតិថិជនរបស់ខ្លួន ដោយសារការទទួលបានដើមទុន ពិតជាមានសារៈសំខាន់សម្រាប់ប្រជាពលរដ្ឋ និងអាជីវកម្មនានា មិនត្រឹមតែនៅពេលសេដ្ឋកិច្ចកំពុងរីកចម្រើនប៉ុណ្ណោះទេ ប៉ុន្តែថែមទាំងក្នុងគ្រាមានវិបត្តិផងដែរ»។ លោកបន្ថែមថា៖«ក្នុងត្រីមាសទី២ឆ្នាំ២០២១ កម្ចីមានចំនួន ៧ ៨២៨ គិតជាទឹកប្រាក់ចំនួន២៧១,២លានដុល្លារអាមេរិក ត្រូវបានផ្កល់ជូនអតិថិជន។ កម្ចីនេះបានបង្កើនផលបត្រកម្ចីដុល របស់ធនាគារប្រមាណ៦ភាគរយ គិតជាទឹកប្រាក់សរុបចំនួន ៤,៥ពាន់លានដុល្លារអាមេរិក។

ធនាគារABA បន្តចូលរួមក្នុងគម្រោង សហហិរញ្ញប្បទានទ្រទ្រង់សហគ្រាសធុនតូច និងមធ្យមឆ្នាំ ២០២០ (SCFS) ដែលជាគំនិតផ្តួចផ្ដើមរបស់រាជរដ្ឋាភិបាលកម្ពុជា ក្នុងគោលបំណងផ្ដល់កម្ចីដែលមានអត្រាការប្រាក់សមរម្យ ដល់សហគ្រាសធុនតូច និងមធ្យម។ ក្រោមគម្រោងផ្ដល់កម្ចីនេះ ធនាគារបានផ្ដល់កម្ចីជាចំនួនទឹកប្រាក់ ២,៣លានដុល្លារអាមេរិក សម្រាប់ចំណាយដើមទុន និងទុនបង្វិលដែលមានអត្រាការប្រាក់ពិសេស ៧ភាគរយ ក្នុងមួយឆ្នាំ និងមានរយៈពេលរហូតដល់៧ឆ្នាំ៕