admin – Page 23 – Investing Cambodia

ធនាគារ ABA និងក្រុមហ៊ុន UnionPay សហការគ្នាពង្រឹងប្រព័ន្ធទូទាត់របស់កម្ពុជា

Posted on July 8, 2021 by admin

ភ្នំពេញ៖ ធនាគារ ABA ជាធនាគារពាណិជ្ជឈានមុខនៅកម្ពុជាប្រកាសពីការពង្រីក និងពង្រឹងកិច្ចសហប្រតិបត្តិការក្នុងការទទួលយកពាណិជ្ជករជាមួយក្រុមហ៊ុនUnionPayដែលជាបណ្តាញទូទាត់សកលដែលផ្តល់សេវាកាតទូទាត់ធំជាងគេបំផុតនៅលើសកលលោក។

ធនាគារ ABA បានដាក់ឲ្យប្រើប្រាស់ម៉ាស៊ីនទូទាត់ចរន្តជិតContactless POS ជាង 1,000 ម៉ាស៊ីន នៅតាមពាណិជ្ជករUnionPay នៅតាមហាងអាហារ និងភេសជ្ជៈ ទីកន្លែងកម្សាន្ត និងហាងទំនិញនានានៅទូទាំងប្រទេសកម្ពុជា។ ធនាគារនេះជាធនាគារចេញកាតច្រើនបំផុតមួយនៅកម្ពុជាហើយបាននិងកំពុងចេញកាត UnionPay ចាប់តាំងពីឆ្នាំ 2015។ ធនាគារ ABA ក៏បាននិងកំពុងទទួលយកពាណិជ្ជករសម្រាប់ក្រុមហ៊ុន UnionPay ចាប់តាំងពីឆ្នាំ 2016 និងជាធនាគារដែលទទួលយកពាណិជ្ជករ UnionPayដ៏ច្រើនបំផុតមួយនៅប្រទេសកម្ពុជាផងដែរ។

លោកស្រីលាង ចិន្តា អ្នកគ្រប់គ្រងប្រចាំប្រទេសកម្ពុជារបស់ក្រុមហ៊ុន UnionPay International នៅតំបន់អាស៊ីអាគ្នេយ៍ បានសង្កេតឃើញថា ប្រជាពលរដ្ឋកម្ពុជាបានចាប់យកផលិតផលទូទាត់នវានុវត្តន៍ ដូចជា ការទូទាត់ចរន្តជិត (Contactless) ការទូទាត់អនឡាញ និងការទូទាត់តាមកូដQR ពីរបីឆ្នាំកន្លងមកនេះ។ ក្រុមហ៊ុន UnionPay ខិតខំផ្តល់នូវផលិតផល និងសេវាទូទាត់ដែលឆ្លើយតបនឹងការផ្លាស់ប្តូរតម្រូវការសេវាទូទាត់របស់អតិថិជន និងអាជីវកម្មក្នុងប្រទេស។

លោកស្រីថ្លែងថា៖« យើងមានសេចក្តីសោមនស្សរីករាយដែលអាចពង្រីក និងពង្រឹងកិច្ចសហប្រតិបត្តិការរបស់យើងជាមួយដៃគូដែលមានចិត្តដូចគ្នា និងធនាគារឈានមុខក្នុងវិស័យហិរញ្ញវត្ថុឌីជីថលដូចជាធនាគារ ABA ដើម្បីពន្លឿនការផ្លាស់ប្តូររបស់ប្រទេសកម្ពុជាទៅរកសង្គមឌីជីថលមួយ។”

លោកSanzhar Abdullayev នាយកគ្រប់គ្រងកាត និងសេវាទូទាត់អេឡិកត្រូនិករបស់ធនាគារABA បានមានប្រសាសន៍ថា៖“គំនិតផ្តួចផ្តើមក្នុងការដាក់ឲ្យប្រើប្រាស់ម៉ាស៊ីនទូទាត់ចរន្តជិត(Contactless)និងកូដ QR របស់ UnionPay នៅតាមពាណិជ្ជករនានា ប្រាកដជាមានផលប៉ះពាល់វិជ្ជមានដល់ការរស់នៅរបស់អតិថិជនទូទាំងប្រទេសកម្ពុជា។ លោកថ្លែងថា៖«យើងជឿជាក់ថា គំនិតផ្តួចផ្តើមនេះនឹងបង្កើននូវការប្រើប្រាស់សេវាហិរញ្ញវត្ថុដ៏ទំនើប និងលើកទឹកចិត្តឲ្យប្រើប្រាស់សេវាទូទាត់អេឡិកត្រូនិកកាន់តែច្រើន ជាពិសេសអំឡុងពេលការរីករាលដាលវីរុសកូវីដ-19 នេះ»។

ធនាគារ ABA បាននិងកំពុងដាក់ឲ្យប្រើប្រាស់កូដQR របស់ UnionPay សម្រាប់ការទូទាត់នៅតាមពាណិជ្ជករជាង 1,000 ទីតាំង នៅហាងជួញដូររាយ ហាងអាហារ និងភេសជ្ជៈ ទីកន្លែងកម្សាន្ត និងទីតាំងផ្សេងៗជាច្រើនទៀតនៅប្រទេសកម្ពុជា។ ម៉្យាងវិញទៀត ធនាគារ ABA ចាប់ផ្តើមសេវាទទួលយកពាណិជ្ជករសម្រាប់ក្រុមហ៊ុន UnionPay International នៅលើប្រព័ន្ធទូទាត់អនឡាញ PayWay របស់ខ្លួននៅខែវិច្ឆិកា ឆ្នាំ 2019៕

រដ្ឋនឹងសហការជាមួយវីងដើម្បីការតភ្ជាប់ប្រព័ន្ធទូទាត់តាមបែបឌីជីថលជាមួយថ្នាលទីផ្សារអេឡិចត្រូនិករបស់ខ្លួន

Posted on July 7, 2021 by admin

ភ្នំពេញ៖ក្រសួងពាណិជ្ជកម្ម នឹងសហការជាមួយធនាគារវីង(ខេមបូឌា)ដើម្បីធ្វើការតភ្ជាប់ប្រព័ន្ធទូទាត់តាមបែបឌីជីថលជាមួយថ្នាលទីផ្សារអេឡិចត្រូនិក Cambodiatrade.com របស់ក្រសួង ដើម្បីបង្កើនភាពងាយស្រួល និងកាត់បន្ថយពេលវេលាជូនអតិជន និងសហគ្រាសធុនតូច និងមធ្យម ក្នុងការធ្វើពាណិជ្ជកម្មតាមប្រព័ន្ធអេឡិចត្រូនិកនៅប្រទេសកម្ពុជា។

ផែនការនៃកិច្ចសហការនេះត្រូវបានធ្វើឡើងកាលពីព្រឹកថ្ងៃទី៧ ខែកក្កដា ឆ្នាំ២០២១ ក្នុងជំនួបរវាងលោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម និងលោក Manu Rajan នាយកប្រតិបត្តិនៃធនាគារវីង តាមរយៈប្រព័ន្ធវីដេអូ (Zoom) ដើម្បីពិភាក្សាគ្នាក្នុងការស្វែងរកលទ្ធភាពរៀបចំកិច្ចសហប្រតិបត្តិការអំពីការតភ្ជាប់ប្រព័ន្ធទូទាត់តាមបែបឌីជីថលរបស់ធនាគារវីង។

លោកស្រី តឹករ៉េត កំរង បានថ្លែងអំណរគុណដល់ធនាគារ វីង(ខេមបូឌា) ដែលមានបំណងធ្វើកិច្ចសហប្រតិបត្តិការជាមួយក្រសួងពាណិជ្ជកម្មតាមរយៈការតភ្ជាប់ប្រព័ន្ធទូទាត់តាមបែបឌីជីថលរបស់ធនាគារវីង និងថ្នាលអេឡិចត្រូនិករបស់ក្រសួងពាណិជ្ជកម្ម Cambodiatrade.com។

លោកស្រីក៏បានលើកឡើងពីសមិទ្ធិផលសំខាន់ៗរបស់ក្រសួងពាណិជ្ជកម្មដែលសម្រេចបានកន្លងមករួមមាន ច្បាប់កិច្ចការការពារអ្នកប្រើប្រាស់ ច្បាប់ពាណិជ្ជកម្មតាមប្រព័ន្ធអេឡិចត្រូនិក សេចក្តីព្រាងច្បាប់ស្តីពីការប្រកួតប្រជែង ការបញ្ចប់កិច្ចព្រមព្រៀងពាណិជ្ជកម្មសេរីកម្ពុជា-ចិន ការបញ្ចប់កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ និងសមិទ្ធផលនៃការអនុវត្ថគម្រោងដែលមានការគាំទ្រពីដៃគូអភិវឌ្ឍន៍ ដូចជាយុទ្ធសាស្ត្រសមាហរណកម្មពាណិជ្ជកម្មកម្ពុជា ឆ្នាំ២០១៩-២០២៣ យុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក និងគម្រោង Go4eCAM។

លោកស្រីថ្លែងថា៖«ក្រសួងពាណិជ្ជកម្មក្នុងការធ្វើសហប្រតិបត្តិការជាមួយធនាគារវីង និងស្នើឱ្យក្រុមការងារបច្ចេកទេសទាំងពីរសហការគ្នាឱ្យបានល្អដើម្បីធានាឱ្យបាននូវការតភា្ជប់ប្រព័ន្ធទូទាត់តាមបែបឌីជីថលរបស់ធនាគារវីង និងថ្នាលអេឡិចត្រូនិក CambodiaTrade ឱ្យទទួលបានជោគជ័យ៕

កម្ពុជាទទួលចំណួលជាង២០០លានដុល្លារពីការនាំអង្ករចេញក្នុងឆមាសទី១ឆ្នាំនេះ

Posted on July 2, 2021 by admin

ភ្នំពេញ៖ ប្រទេសកម្ពុជាបាននាំអង្ករចេញប្រមាណ២៨០ ៤៥០តោន មានតម្លៃស្មើនឹង ២០២.៦៧ លានដុល្លារសហរដ្ឋអាមេរិកក្នុងឆមាសទី១ ឆ្នាំ២០២១នេះទៅកាន់ទីផ្សារគោលដៅចំនួន៤៩ នៅលើសកលលោកជាពិសេសទីផ្សារចិន។

យោងតាមរបាយការណ៍របស់ក្រសួងកសិកម្ម ការនាំចេញក្នុងឆមាសទី១នេះ បានធ្លាក់ចុះប្រមាណជា ២៩.៤៧% ធៀបរយៈពេលដូចគ្នាក្នុងឆ្នាំ២០២០ ខណះដែរចំនួនទឹកប្រាក់នៃការនាំចេញក៏បានធ្លាក់ចុះចំនួន ២៣.៧១% ផងដែរ ដែលឆ្នាំ២០២០ ក្នុងឆមាសទី១ ទទួលបានទឹកប្រាក់ ២៦៥.៦៦លានដុល្លារ មកត្រឹម២០២.៦៧លានដុល្លារនៅឆមាសទី១ ឆ្នាំ២០២១នេះ ។

ទីផ្សារសំខាន់ៗដែលកម្ពុជា បាននាំចេញគឺរួមមាន ទី១). ប្រទេសចិន និងតំបន់ស្វយ័តហុងកុង ម៉ាកាវ ដែលបានស្រូបទាញប្រមាណ ៥១.០៩% ស្មើនឹង ១៤៣ ២៩៣ តោន ទី២). ប្រទេសបារាំង ១០.៥០% ស្មើ ២៩ ៤៣៤ តោន ទី៣). ប្រទេសហ្កាប៊ុង ៧.៩៣% ស្មើនឹង ២២ ២២៨តោន ទី៤). ប្រទេស ម៉ាឡេស៊ី ៦.៧៩% ស្មើនឹង ១៩ ០៣០តោន និងទី៥). ប្រទេសហូឡង់ ៣.៥៤% ស្មើ ៩ ៩២១ តោន។

សម្រាប់ប្រភេទអង្ករនាំចេញក្នុងឆមាសទី១ ឆ្នាំ២០២១នេះដែរ ឃើញថា អង្ករក្រអូបប្រណីតមាន៣៧.៣៥% អង្ករក្រអូបធម្មតាមាន២៨.៥៦% អង្ករសគ្រាប់វែងមាន២៦% អង្ករចំហុយមាន២% អង្ករសរីរាង្គមាន២% អង្ករបាក់ ៣% អង្ករដំណើប ១.២២ %៕

កម្ពុជាបានកំណត់យកប្រព័ន្ធឌីជីថល ក្នុងការកាត់បន្ថយផលប៉ះពាល់ពីជំងឺកូវីដ-១៩មកលើសេដ្ឋកិច្ច

Posted on June 30, 2021 by admin

សៀមរាប៖ លោកស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងថាប្រព័ន្ធឌីជីថលបានដើរតួនាទីយ៉ាងសំខាន់ក្នុងការជួយកាត់បន្ថយផលប៉ះពាល់ពីជំងឺកូវីដ-១៩មកលើសេដ្ឋកិច្ច និងជាដំណោះស្រាយប្រកបដោយប្រសិទ្ធភាព ដើម្បីទ្រទ្រង់សកម្មភាពសាធារណៈ និងពាណិជ្ជកម្ម។

ការលើកឡើងរបស់រដ្ឋមន្រ្តីរូបនេះ អំឡុងពេលដែលលោកបានដឹកនាំគណៈប្រតិភូក្រសួង ចូលរួមវេទិកាសេដ្ឋកិច្ចពិភពលោក តាមប្រព័ន្ធវីដេអូពីចម្ងាយ ក្រោមប្រធានបទ៖ “ការងើបឡើងវិញនៃសកម្មភាពពាណិជ្ជកម្ម៖ ការលើកកម្ពស់សេដ្ឋកិច្ចតំបន់ឡើងវិញ ជាមួយនឹងខ្សែសង្វាក់ផ្គត់ផ្គង់ប្រកបដោយភាពធន់” កាលពីថ្ងៃអង្គារ ទី២៩ ខែមិថុនា ។

លោកបានថ្លែងអំពីការត្រៀមខ្លួនរបស់កម្ពុជាឆ្ពោះទៅរកសេដ្ឋកិច្ចឌីជីថលតំបន់ ទៅកាន់មេដឹកនាំមកពីជុំវិញពិភពលោកអញ្ជើញចូលរួមក្នុងវេទិកានោះ ដោយលោកស៊ុន ចាន់ថុល បានគូសបញ្ជាក់ពីសារសំខាន់នៃប្រព័ន្ធឌីជីថល ក្នុងការកាត់បន្ថយផលប៉ះពាល់ពីជំងឺកូវីដ-១៩ និងជាដំណោះស្រាយប្រកបដោយប្រសិទ្ធភាព ដើម្បីទ្រទ្រង់សកម្មភាពសាធារណៈ និងពាណិជ្ជកម្ម។

លោកថ្លែងយ៉ាងដូច្នេះថា៖« ប្រព័ន្ធឌីជីថល វាអាចជួយឱ្យរដ្ឋជាសមាជិកអាស៊ានធ្វើការរួមគ្នា ដើម្បីលើកកម្ពស់អាស៊ានជាសហគមន៍តភ្ជាប់ប្រព័ន្ធឌីជីថលតែមួយ និងជំរុញការតភ្ជាប់របស់ខ្លួន ដើម្បីពន្លឿនការងើបឡើងវិញនៃការអភិវឌ្ឍសេដ្ឋកិច្ច និងសង្គម»។

លោកក៏ បានគូសបញ្ជាក់បន្ថែមទៀតថា៖ «កម្ពុជាបានកំណត់អាទិភាពរបស់ខ្លួនក្នុងការជំរុញប្រព័ន្ធឌីជីថលនៅកម្ពុជា ដើម្បីធានាបាននូវលំហូរដោយរលូននៃទំនិញ សេវា ការងារជំនាញ មូលធន និងទិន្នន័យ។ ដូច្នេះកម្ពុជាចាំបាច់ត្រូវផ្តោតជាសំខាន់កិច្ចសហប្រតិបត្តិការច្បាប់ និងស្ថាប័ន ដើម្បីសម្របខ្លួនទៅនឹងបដិវត្តឌីជីថល សម្រាប់ពាណិជ្ជកម្ម ការវិនិយោគ កិច្ចសម្រួលពាណិជ្ជកម្ម សហគ្រាសខ្នាតតូច និងមធ្យម និងការអភិវឌ្ឍជំនាញកាន់តែមានប្រសិទ្ធភាពជាងមុន»។

ជាមួយគ្នានេះផងដែរ លោករដ្ឋមន្ត្រី រូបនេះក៏បានសង្កត់ធ្ងន់ថា៖ ដើម្បីសម្រេចចក្ខុវិស័យឆ្ពោះទៅរក សេដ្ឋកិច្ចឌីជីថលតំបន់ កម្ពុជាបានប្តេជ្ញាចាប់ផ្តើមអនុវត្តប្រព័ន្ធគយ ASYCUDA គម្រោងតភ្ជាប់ប្រព័ន្ធស្វយ័តប្រវត្តិកម្ម Port EDI ជាមួយប្រព័ន្ធ ASYCUDA ដើម្បីសម្រួលដល់ការដឹកជញ្ជូន និងពាណិជ្ជកម្ម ប្រកបដោយប្រសិទ្ធភាព បានអនុម័តច្បាប់ស្តីពីការធ្វើពាណិជ្ជកម្មតាមប្រព័ន្ធអេឡិចត្រូនិច បានដាក់ឱ្យ ដំណើរការជាផ្លូវការប្រព័ន្ធចុះបញ្ជីពាណិជ្ជកម្មតាមអនឡាញ ច្រកចេញចូលតែមួយរបស់អាស៊ាន (Asean Single Window) ហើយជាពិសេសក្នុងពេលថ្មីៗកន្លងទៅនេះ កម្ពុជាបានប្រកាសជាផ្លូវការនូវ ការអនុវត្តក្របខណ្ឌគោលនយោបាយសង្គម និងសេដ្ឋកិច្ចឌីជីថលកម្ពុជាឆ្នាំ២០២១-២០៣៥ផងដែរ៕

ទូតកម្ពុជាទទួលបានសមាជិកភាពមួយជីវិត ពីក្រុមប្រឹក្សាអង្គទូតពិភពលោក

Posted on June 30, 2021 by admin

បាងកក៖ លោក អ៊ូក សោភ័ណ អគ្គរាជទូតកម្ពុជាប្រចាំប្រទេសថៃត្រូវបានក្រុមប្រឹក្សាអង្គទូតសាកល (DC) ដែលប្រមូលផ្តុំដោយឥស្សរជនឆ្នើម និងធុរជនល្បីៗលើពិភពលោក ធ្វើការផ្តល់ជូនសមាជិកភាពពេញមួយជីវិត សម្រាប់បេសកកម្មដ៏ពិសិដ្ឋ ក្នុងបុព្វហេតុពង្រឹងទំនាក់ទំនងអន្តរជាតិ ជាពិសេសការទូតសេដ្ឋកិច្ច។

ពិធីប្រគល់ និងទទួលប័ណ្ណសមាជិកភាព បានធ្វើឡើងកាលពីរសៀលថ្ងៃអង្គារ៍ ទី២៩ ខែមិថុនា ឆ្នាំ២០២១ ដោយលោកបណ្ឌិត Dato’ Steve Cheah ទីប្រឹក្សាជាន់ខ្ពស់ក្រុមហ៊ុន Berli Jucker PCL (ប្រតិបត្តិករផ្សារទំនើប Big C) និងជាប្រមុខបេសកកម្ម DC ប្រចាំប្រទេស CLMTV (កម្ពុជា-ឡាវ-មីយ៉ាន់ម៉ា-ថៃឡង់ដ៏-វៀតណាម)។

នៅក្នុងឱកាសនោះ លោក អ៊ូក សោភ័ណ បានថ្លែងអំណរគុណដល់លោកបណ្ឌិត Dato’ Steve Cheah និងបានចាត់ទុកសមាជិកភាព DC គឺជាមោទនភាពរួមរបស់មន្ត្រីការទូតកម្ពុជា ដែលកំពុងបំពេញភារកិច្ចជូនប្រទេសជាតិ ប្រកបដោយស្មារតីទទួលខុសត្រូវខ្ពស់។

ទាក់ទងនឹងការជំរុញសេដ្ឋកិច្ចការទូត លោកឯកអគ្គរាជទូត និងលោកបណ្ឌិត Dato’ Steve Cheah បានឯកភាពនឹងរៀបចំជំនួបធុរកិច្ច និងទស្សនកិច្ចសិក្សាសម្រាប់អង្គទូត និងធុរជននៅថៃ ទៅកាន់ខេត្តតំបន់ឆ្នេរសមុទ្រនៃប្រទេសកម្ពុជា ដោយសហការជាមួយក្រុមប្រឹក្សាធុរកិច្ចកម្ពុជានៅក្នុងប្រទេសថៃ (CBC)។

សូមជម្រាបថា ក្រុមប្រឹក្សាអង្គទូត (DC) គឺជាក្រុមឥស្សរជនឆ្នើម ដែលមានការទទួលស្គាល់ពីក្រុមប្រឹក្សាសង្គម និងសេដ្ឋកិច្ចនៃអង្គការសហប្រជាជាតិ (UN) ក្នុងឋានៈជាក្រុមពិគ្រោះយោបល់ពិសេស លើវិស័យការទូត និងធុរកិច្ច។ ក្រុមប្រឹក្សានេះ បង្កើតឡើងដំបូងនៅទីក្រុង Hague នៃប្រទេសហូឡង់ ហើយបច្ចុប្បន្នមានទីស្នាក់ការកណ្តាលនៅទីក្រុង Wiesbaden ប្រទេសអាល្លឺម៉ង់៕

ខ្លាពពកត្រូវបានចុះក្នុងបញ្ជីក្រហម IUCN ថាជាប្រភេទងាយរងគ្រោះថ្នាក់នៅក្នុងពិភពលោក

Posted on June 29, 2021 by admin

ភ្នំពេញ៖ ខ្លាពពកស្ថិតក្នុងក្រុមជិតផុតពូជ និងមានចុះក្នុងបញ្ជីឧបសម្ព័ន្ធសាយតេស។ ប្រភេទនេះទទួលរងនូវការគំរាមកំហែងដោយសារតែការបរបាញ់ និងការបាត់បង់ទីជម្រកដែលវាធ្លាប់ស្វែងរកចំណី និងរស់នៅ។ ខ្លាពពកត្រូវបានចុះក្នុងបញ្ជីក្រហម IUCN ថាជាប្រភេទងាយរងគ្រោះថ្នាក់នៅក្នុងពិភពលោក។ នេះបើយោងតាមក្រសួងបរិស្ថាន។

ខ្លាពពកចូលចិត្តរស់នៅក្នុងព្រៃស្រោង ព្រៃពាក់កណ្តាលស្រោង និងព្រៃចម្រុះ។ ខ្លាពពកជាសត្វរាត្រីចរ ច្រើនរស់នៅជាគូលើដើមឈើ។ ជាធម្មតា វាចាប់ចំណីដោយលោតពីលើដើមឈើសង្គ្រប់លើសត្វនៅដីដូចជាខ្លារខិន ដែរ។ អាហាររបស់វាមានបក្សី ពស់ ជ្រូកព្រៃ ឈ្លូស ប្រើស ស្វាជាដើម។ ខ្លាពពកប្រើក្រញ៉ាំជើងមុខមុតសម្រាប់សង្កត់ចាប់ចំណី រួចទើបខាំជាក្រោយ។ ខ្លាពពកអាចបង្កើតកូនម្តងបានពី ២ ទៅ ៤ ក្បាល បន្ទាប់ពីពពោះអស់រយៈពេលប្រហែល ៩០ ទៅ៩៥ ថ្ងៃ។

ចំពោះរបាយរស់នៅ ខ្លាពពកមានភូមិភាគឥសាន និរតី និងភាគខាងជើងនៃប្រទេសកម្ពុជា។ វាត្រូវបានរកឃើញនៅប្រទេសបូតាន ចិន ឥណ្ឌា ឥណ្ឌូនេស៊ី (កោះស៊ូម៉ាត្រា) ឡាវ ម៉ាឡេស៊ី សារ៉ាវ៉ាក់ ភូមា នេប៉ាល់ ថៃនិងប្រទេសវៀតណាម។ ខ្លានេះបានផុតពូជនៅប្រទេសបង់ក្លាដេស សិង្ហបុរី និងតៃវ៉ាន់។

ខ្លាពពកមានមាឌធំជាងខ្លាភ្ញីថ្មកែវ មានសម្បុរពណ៌ក្រម៉ៅប្រផេះនៅលើ ដងខ្លួនមានផ្ទាំងៗដូចពពកធំៗ នៅផ្នែកខាងក្រោយនៃផ្ទាំងនេះមានពណ៌ខ្មៅខណ្ឌជាកំណាតើដុំផ្ទាំងនីមួយៗ។

ដុំផ្ទាំងនេះរីកធណំនៅផ្នែកខាងក្រោយស្មា ដែលចាប់ផ្តើមពីលើខ្នងរហូតស្ទើរដល់ក្រោមពោះ។ ច្រមុះមានពណ៌ស និងនៅលើថ្ងាសមានស្នាមអិចតូចៗ។ វាមានកន្ទុយវែង អុចៗនៅផ្នែកខាងគល់ និងបន្ទះៗនៅផ្នែកខាងចុង។ វាមានជើងខ្លី ប្រអប់ជើងធំងាយស្រួលក្នុងការប្រតោងមែកឈើ។ ខ្លាពពកងាយក្នុងការចំណាំណាស់ គឺយើងគ្រាន់តែក្រឡេកមើលនៅលើដងខ្លួនរបស់វាមាន ផ្ទាំងដុំសណ្ឋានដូចដុំពពករាយពាសពេញដងខ្លួន៕

កម្ពុជាទទួលវ៉ាក់សាំងការពារកូវីដ១៩ ស៊ីណូវ៉ាក់(Sinovac Vaccine) ចំនួន១លានដូសទៀតពីចិន

Posted on June 29, 2021 by admin

ភ្នំពេញ៖ នៅព្រឹកថ្ងៃចន្ទ ទី២៨ ខែមិថុនា ឆ្នាំ២០២១នេះ វ៉ាក់សាំងប្រយុទ្ធប្រឆាំងជំងឺកូវីដ១៩ ស៊ីណូវ៉ាក់ (Sinovac Vaccine) ចំនួន១លានដូសទៀត ដែលកម្ពុជាបានបញ្ជាទិញពីប្រទេសចិន ត្រូវបានដឹកមកដល់ប្រទេសកម្ពុជាទៀតហើយ។ នេះបើយោងតាមការសរសេររបស់លោកនាយរដ្ឋមន្ត្រី ហ៊ុន សែន នៅលើទំពរ័ហ្វេសប៊ុកផ្លូវការ។
លោកបានសរសេរថា៖« ការរកវ៉ាក់សាំងមកចាក់ជូនប្រជាពលរដ្ឋ គឺជាដំណោះស្រាយជាយុទ្ធសាស្ត្រមួយរបស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងនឹងជំងឺកូវីដ១៩។

វ៉ាក់សាំងបានក្លាយទៅជាវិធានការយុទ្ធសាស្ត្ររបស់រាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងជំងឺកូវីដ១៩ និងជួយការពារអាយុជីវិតប្រជាពលរដ្ឋពីជំងឺឆ្លងសាកលមួយនេះ។ វត្តមានវ៉ាក់សាំងជាបន្តបន្ទាប់នេះ នឹងជួយឱ្យកម្ពុជាសម្រេចផែនការចាក់វ៉ាក់សាំងជូនប្រជាពលរដ្ឋប្រមាណ ១៣លាននាក់ ឱ្យបានលឿន និងទៅតាមការគ្រោងទុក។
គិតត្រឹមខែមិថុនា កម្ពុជាទទួលបានវ៉ាក់សាំងពីក្រុមហ៊ុនចិន រហូតដល់ទៅ ៥លានដូស ហើយនៅខែកក្កដាខាងមុខ វ៉ាក់សាំងប្រមាណ ៣លានដូសទៀត ក៏នឹងត្រូវដឹកពីប្រទេសចិន មកកាន់កម្ពុជាបន្ថែមទៀតផងដែរ។

គិតចាប់ពីថ្ងៃទី១០ ខែកុម្ភៈ រហូតដល់ថ្ងៃទី២៦ ខែមិថុនា កម្ពុជាចាក់វ៉ាក់សាំងជូនប្រជាពលរដ្ឋ និងជនបរទេសរស់នៅ និងធ្វើការនៅកម្ពុជា បានចំនួនជិត ៤លាននាក់ ស្មើនឹងជិត ៤០ភាគរយហើយ។ ការចាក់វ៉ាក់សាំងជូនប្រជាពលរដ្ឋរួចរាល់តាមផែនការ នឹងជួយឱ្យកម្ពុជាអាចគ្រប់គ្រងការរីករាលដាលជំងឺកូវីដ១៩បានល្អ ដែលជាបុព្វហេតុមួយជួយឱ្យកម្ពុជាឈានទៅសម្រេចបានស្ថានភាពភាពសេដ្ឋកិច្ចល្អប្រសើរផងដែរ៕

ក្រុមហ៊ុន Axiata និងក្រុមហ៊ុនNINE ផ្តល់ជូនស្វ័យប្រវត្តិកម្មគេហដ្ឋានតាមរយៈឧបករណ៍IoT ថ្មីៗ

Posted on June 29, 2021 by admin

ភ្នំពេញ ថ្ងៃទី២៨ ខែមិថុនា ឆ្នាំ២០២១៖ គ្រប់គេហដ្ឋានទាំងអស់ឥឡូវនេះអាចក្លាយជាផ្ទះឆ្លាតវៃ ជាមួយនឹងឧបករណ៍អិុនធឺណិត Internet of Thing(IoT)ទំនើប ដែលអាចរកទិញបាននៅតាមហាងSmartShopមួយចំនួន។ ឧបករណ៍ទាំងនេះអាចគ្រប់គ្រងបានតាមរយៈកម្មវិធីទូរស័ព្ទស្មាតហ្វូន ដែលអាចឱ្យអ្នកប្រើប្រាស់គ្រប់គ្រងពីចម្ងាយ និងរក្សាសុវត្ថិភាពដល់ទ្រព្យសម្បត្តិរបស់ពួកគេ។

ឧបករណ៍IoTថ្មីៗទាំងនេះត្រូវបានផលិតឡើងដើម្បីផ្តល់ជូនម្ចាស់ផ្ទះនូវសន្តិសុខ ការគ្រប់គ្រង និងភាពងាយស្រួលបន្ថែមទៀត។

ក្រុមហ៊ុនSmart Axiata បានដាក់លក់ឧបករណ៍IoT ថ្មីៗជាច្រើន ដូចជាម៉ាស៊ីនថតសុវត្ថិភាព ឧបករណ៍ចាប់ផ្សែង អំពូលភ្លើងប្រើជាមួយWi-Fi និងឧបករណ៍បញ្ជាWi-Fi ដោយសហការជាមួយក្រុមហ៊ុនផលិតឧបករណ៍អេឡិចត្រូនិចNINE។ បច្ចេកវិទ្យាថ្មីៗនេះនឹងអាចឱ្យអតិថិជនគ្រប់គ្រងឧបករណ៍អេឡិចត្រូនិចប្រចាំថ្ងៃរបស់ខ្លួនបានតាមរយៈកម្មវិធីទូរស័ព្ទដៃSmart Life។

លោកThomas Hundt នាយកប្រតិបត្ដិក្រុមហ៊ុនSmart Axiata បានថ្លែងថា៖ “ឧបករណ៍IoT ឬ Internet of Things ត្រូវបានរំពឹងថានឹងផ្លាស់ប្តូរជីវិតរបស់មនុស្ស និងរបៀបដែលពួកគេប្រើប្រាស់បច្ចេកវិទ្យា។ តាមរយៈការតភ្ជាប់ឧបករណ៍ប្រើប្រាស់ក្នុងផ្ទះប្រចាំថ្ងៃជាមួយអិុនធឺណិត អ្នកប្រើប្រាស់ឧបករណ៍ឆ្លាតវៃនៅថ្ងៃនេះនឹងមានការគ្រប់គ្រងកាន់តែខ្លាំងលើជីវិតប្រចាំថ្ងៃបែបទំនើប និងសន្តិសុខផ្ទះរបស់ពួកគេ”។

លោកបានបន្ថែមថា៖ “ផលិតផលIoT សម្រាប់គេហដ្ឋានថ្មីៗទាំងនេះបង្ហាញពីការអភិវឌ្ឍយ៉ាងឆាប់រហ័សរបស់កម្ពុជាខាងផ្នែកបច្ចេកវិទ្យាចល័ត និងត្រួសត្រាយផ្លូវឆ្ពោះទៅរកអនាគតនៃច្ចេកវិទ្យា 5G របស់ប្រទេសកម្ពុជា។ ខ្ញុំមានមោទនភាពជាខ្លាំងចំពោះតួនាទីដែលក្រុមហ៊ុនSmart Axiata កំពុងដើរតួរក្នុងកិច្ចប្រឹងប្រែងនេះ ដើម្បីធ្វើទំនើបកម្មឌីជីថលនៅកម្ពុជា”។

ក្រុមហ៊ុនSmart និងក្រុមហ៊ុនNINE កំពុងដាក់ដំណើរការគំនិតផ្តួចផ្តើមIoT នេះឡើង ដោយមានផលិតផលចំនួនពីរផ្នែកដោយផ្តោតលើសន្តិសុខ និងស្វ័យប្រវត្តិកម្ម។

ដើម្បីលើកកម្ពស់សន្តិសុខផ្ទះរបស់ពួកគេ អតិថិជនរបស់ក្រុមហ៊ុនSmart អាចទិញឧបករណ៍នានាដូចជា ឧបករណ៍ចាប់ផ្សែង សិនស័រទ្វា និងម៉ាស៊ីនថតសុវត្ថិភាព ដែលភ្ជាប់ទៅនឹងមណ្ឌលកណ្តាលមួយដែលគ្រប់គ្រងឧបករណ៍ទាំងអស់នោះ។

ក្រុមហ៊ុនSmart និងក្រុមហ៊ុនNINE កំពុងផ្តល់ជូនផលិតផលចំនួនបីផ្សេងទៀតដែលមានសក្តានុពលផ្លាស់ប្តូរជីវិតប្រចាំថ្ងៃរបស់អតិថិជន។ ឧបករណ៍NINE Smart Wi-Fi Socket Plug អាចជួយប្រើប្រាស់ឱ្យបិទនិងបើកឧបករណ៍ប្រើប្រាស់ក្នុងផ្ទះពីចម្ងាយ ខណៈដែលWi-Fi Bulb អាចឱ្យអ្នកប្រើប្រាស់គ្រប់គ្រងអំពូលភ្លើងពីចម្ងាយបានផងដែរ។ ទន្ទឹមនឹងនេះដែរ ឧបករណ៍បញ្ជាពីចម្ងាយWi-Fi IR Remote អាចឱ្យម្ចាស់ផ្ទះគ្រប់គ្រងពីចម្ងាយបាននូវឧបករណ៍ប្រើប្រាស់ក្នុងផ្ទះដូចជាម៉ាស៊ីនត្រជាក់ កង្ហារ ទូរទស្សន៍ និងឧបករណ៍ក្នុងផ្ទះផ្សេងទៀត។ ឧបករណ៍ទាំងអស់នេះអាចត្រូវបានគ្រប់គ្រងតាមរយៈកម្មវិធីSmart Life។ ឧបករណ៍ទាំងនេះក៏អាចត្រូវបានគ្រប់គ្រងដោយសំឡេងបានផងដែរនៅពេលដែលភ្ជាប់ទៅនឹងឧបករណ៍Google Homeឬឧបករណ៍Amazon Alexa។

លោក Kenny Yap នាយកគ្រប់គ្រងក្រុមហ៊ុនNINE Cambodia បានថ្លែងថា៖ “យើងយល់ច្បាស់ពីសារៈសំខាន់ដែលអតិថិជនរបស់ពួកយើងចាំបាច់ត្រូវមានក្នុងការរស់នៅប្រកបដោយផាសុខភាពនៅក្នុងផ្ទះរបស់ពួកគេ ហើយយើងត្រូវធ្វើឱ្យប្រាកដថា អតិថិជននិងគ្រួសាររបស់ពួកគាត់មានសុវត្ថិភាព។ តាមរយៈការចាប់ដៃគូជាមួយក្រុមហ៊ុនSmart Axiata ដើម្បីផ្តល់ជូនឧបករណ៍IoT សម្រាប់គេហដ្ឋាន ជាមួយនឹងបច្ចេកវិទ្យាបណ្តាញទំនើបរបស់ក្រុមហ៊ុនSmart យើងកំពុងផ្តល់ជូនអតិថិជនរបស់យើងនូវការគ្រប់គ្រងផ្ទះរបស់ពួកគេបន្ថែមទៀត ដែលធ្វើឱ្យវាមានភាពកក់ក្តៅ និងសន្តិសុខកាន់តែខ្លាំងឡើងថែមទៀត”។

ឧបករណ៍ថ្មីៗទាំងនេះមានដាក់បង្ហាញ និងអាចរកទិញបាននៅSmart IoT Cornersដែលស្ថិតនៅក្នុងហាងSmart Shop ចំនួន ៤៖ Smart Shopផ្សារអេអ៊នភ្នំពេញ Smart Shopផ្សារអេអ៊នសែនសុខ Smart Shop មជ្ឈមណ្ឌលភ្នំពេញ និងSmart Shopផ្សារទំនើបសូរិយាសេនធ័រភ័នធ៍។Smart IoT Corners ចំនួន២ បន្ថែមទៀតនឹងបើកដំណើរការក្នុងពេលឆាប់ៗនេះនៅហាងSmart Shop នៅផ្លូវមុនីវង្ស និងផ្លូវនេរុហ៍។ ផលិតផលទាំងនេះអាចទិញជាលក្ខណៈរាយនីមួយៗក៏បាន ឬជាកញ្ចប់ក៏បាន ហើយអតិថិជនអាចតម្លើងផលិតផលទាំងនេះបានដោយខ្លួនឯង ឬស្នើអ្នកជំនាញពីក្រុមហ៊ុនNINE ឱ្យជួយដំឡើងជូនក៏បាន។

សម្រាប់ព័ត៌មានបន្ថែម សូមតាមដានទំព័រហ្វេសប៊ុករបស់ក្រុមហ៊ុន Smartតាមរយៈ www.facebook.com/smartaxiataឬចូលទៅកាន់គេហទំព័រ www.smart.com.kh។ ឧបករណ៍IoT សម្រាប់គេហដ្ឋានអាចរកមើលបានតាមរយៈគេហទំព័រ www.smart.com.kh/get-smart/plans/smart-iot។

បុព្វលាភសរុបរបស់ទីផ្សារធានារ៉ាប់នៅកម្ពុជាក្នុងត្រីមាសទី១ កើនជាង ១៦ភាគរយ

Posted on June 29, 2021 by admin

ភ្នំពេញៈ បុព្វលាភសរុបរបស់ទីផ្សារធានារ៉ាប់នៅកម្ពុជាក្នុងត្រីមាសទី១ ឆ្នាំ២០២១ មានប្រមាណ ៨៥លានដុល្លារ កើនជាង ១៦ភាគរយបើធៀបនឹងរយៈពេលដូចគ្នាឆ្នាំ២០២០ ខណៈចំនួនអ្នកទទួលសេវាធានារ៉ាប់រងមានចំនួនជិត ១,២លាននាក់។ នេះបើយោងតាមសមាគមធានារ៉ាប់រងកម្ពុជា (Insurance Association of Cambodia)។

សេចក្តីប្រកាសព័ត៌មានរបស់សមាគមធានារ៉ាប់រងកម្ពុជា (IAC) ឱ្យដឹងថា ទីផ្សារធានានារ៉ាប់រងនៅកម្ពុជា ក្នុងត្រីមាសទី១ ឆ្នាំ២០២១ បានរក្សានូវភាពវិជ្ជមានរបស់ខ្លួន ដោយទទួលបានបុព្វលាភសរុបប្រមាណ ៨៥លានដុល្លារ កើនឡើង ១៦,៣ភាគរយធៀបនឹងរយៈពេលដូចគ្នាឆ្នាំ២០២០។ ក្នុងចំនួនទឹកប្រាក់នេះ គឺទីផ្សារធានារ៉ាប់រងទូទៅ មានចំណែកទីផ្សារប្រមាណ ៤៦ភាគរយ ទីផ្សារធានារ៉ាប់រងអាយុជីវិត មានជិត ៥៣ភាគរយ និងធានារ៉ាប់រងខ្នាតតូចមាន ១,៤ភាគរយ។

បើតាម IAC ទីផ្សារធានារ៉ាប់រងអាយុជីវិត មានទំហំ ៤៤,៦លានដុល្លារ កើនឡើង ១៥,៥ភាគរយ, ទីផ្សារធានារ៉ាប់រងទូទៅ មានទំហំ ៣៩,១លានដុល្លារ កើនឡើង ១៩,៥ភាគរយ និងទីផ្សារធានារ៉ាប់រងខ្នាតតូច មានទំហំ ១,២លានដុល្លារ ថយចុះ២៦,៧ភាគរយ។

នៅក្នុងត្រីមាសទី១ នេះផងដែរ ទឹកប្រាក់សំណងដែលវិស័យធានារ៉ាប់រងបានទូទាត់ទៅឱ្យអតិថិជនមានចំនួនសរុប ១១,៣លានដុល្លារ ក្នុងនោះសំណងទូទាត់ដោយក្រុមហ៊ុនធានារ៉ាប់រងទូទៅ មាន ៩,១លានដុល្លារ, ធានារ៉ាប់រងអាយុជីវិត ២,១លានដុល្លារ និងក្រុមហ៊ុនធានារ៉ាប់រងខ្នាតតូច ០,២លានដុល្លារ។

យោងតាម IAC គិតត្រឹមត្រីមាសទី១ ឆ្នាំ២០២១ នៅកម្ពុជាចំនួនអ្នកដែលត្រូវបានធានារ៉ាប់រង មានចំនួនសរុបជិត ១,២លាននាក់ ក្នុងនោះអ្នកទិញធានារ៉ាប់រងអាយុជីវិតមាន មាន ៣៨ម៉ឺននាក់, ធានារ៉ាប់រងទូទៅ (ធានារ៉ាប់រងសុខភាព និងគ្រោះថ្នាក់បុគ្គល) មាន ៥១ម៉ឺននាក់ និងធានារ៉ាប់រងខ្នាតតូចប្រមាណ ២៨ម៉ឺននាក់។

គិតរហូតមកដល់ពេលនេះសមាគមធានារ៉ាប់រងកម្ពុជាមានក្រុមហ៊ុនជាសមាជិកចំនួន ៣៣ ក្នុងនោះក្រុមហ៊ុនធានារ៉ាប់រងទូទៅមានចំនួន ១៦ ក្រុមហ៊ុនធានារ៉ាប់រងអាយុជីវិត ចំនួន ១១ ក្រុមហ៊ុនធានារ៉ាប់រងខ្នាតតូចចំនួន ៥ និងក្រុមហ៊ុនធានារ៉ាប់រងបន្តចំនួន ១៕

តិចអត់ដឹង! ថាមានអេស៊ីលីដាម៉ូបាលដូចមានកាបូបលុយអញ្ចឹង!

Posted on June 29, 2021 by admin

អត់ដែលដឹងសោះថាមានអេស៊ីលីដាម៉ូបាលក្នុងដៃ ហាក់ដូចជាកាបូបលុយដែលខ្ញុំចង់ទូទាត់ទំនិញឬសេវាកម្មផ្សេងៗបានយ៉ាងងាយស្រួល រហ័ស សុវត្ថិភាពនិងអត់ខ្វល់រឿងហានិភ័យឆ្លងមេរោគពីការកាន់ក្រដាសប្រាក់ទូទាត់នោះទេ។ ខ្ញុំចង់ទូទាត់ កម្មង់ទំនិញឬបង់សេវាទឹកភ្លើងផ្សេងៗពេលណាក៏បាន អត់ខ្វល់រឿងកាន់លុយតាមខ្លួន។

កាលពីមុនឃើញមិត្តភក្តិគាត់ប្រើប្រាស់ដើម្បីកម្មង់ទំនិញ និងទូទាត់សេវានានា អត់ដែលចាប់អារម្មណ៍សោះ ដល់តែទាញយកកម្មវិធីអេស៊ីលីដាម៉ូបាល មកប្រើប្រាស់ទើបដឹងថាយើងអាចទូទាត់បានទូលំលាយទូលាយ សម្បួរបែបចង់វេរប្រាក់ក៏បាន ហើយអ្វីដែលកាន់តែពិសេសទៀតនោះគឺទទួលបានការបញ្ចុះតម្លៃជាមួយហាងដែលជាដៃគូររបស់ធនាគារអេស៊ីលីដាយ៉ាងច្រើនទៀត។

ហើយសំខាន់កាលពីចុងសប្តាហ៍កន្លងទៅផ្សារទំនើបអ៊ីអនភ្នំពេញ ផ្សារទំនើបអ៊ីអនសែនសុខស៊ីធី និងអ៊ីអនម៉េកវែលយូ គឺខ្ញុំទូទាត់តាមឃ្យូអរកូដអេស៊ីលីដាម៉ូបាលបាយដោយងាយស្រួល។

តោះចូលទៅទាញយកកម្មវិធីអេស៊ីលីដាម៉ូបាលទាំងអស់គ្នាដើម្បីទទួលបានអត្ថប្រយោជន៍ទាំងនេះតាមរយៈApp Store, Play Store, App gallery ដូច្នេះយើងនឹងទទួលបានការប្រើប្រាស់សេវាកម្មយ៉ាងច្រើនតាមសេចក្តីត្រូវការ មិនអស់ថ្លៃសេវា៕
ប្រសិនបើលោកអ្នកមានចម្ងល់ ឬសំណូមពរផ្សេងៗ (បម្រើ២៤ម៉ោង) សូមទូរសព្ទទៅកាន់លេខ ៖ ០២៣ ៩៩៤ ៤៤៤, ០១៥ ៩៩៩ ២៣៣ ឬផ្ញើសារអ៊ីមែល ទៅកាន់ ៖ emailinquiry@acledabank.com.kh