Author: admin

ភ្នំពេញៈ កម្ពុជា​បាន​នាំ​ចេញ​ស្រូវ-អង្ករ ​ក្នុង​បរិមាណសរុប​ជាង ៣,៦​លាន​តោន ​នា​រយៈ​ពេល ​១១​ខែ​ឆ្នាំ​២០២១ ដោយ​មាន​តម្លៃ​សរុប​ ១ ០០១​លាន​ដុល្លារ។ នេះ​បើ​យោង​តាម​របាយការណ៍​ក្រសួង​កសិកម្ម រុក្ខា​ប្រមាញ់ និង​នេសាទ។

របាយការណ៍​ក្រសួង​កសិកម្ម រុក្ខា​ប្រមាញ់ និង​នេសាទ បាន​ឱ្យ​ដឹង​ថា ចាប់​ពី​ខែ​មករា ដល់​ខែ​វិច្ឆិកា ឆ្នាំ​២០២១ កម្ពុជា​​​នាំ​ចេញ​អង្ករ​ក្នុង​បរិមាណ​សរុប ៥៣២ ១៧៩តោន ថយ​ចុះ​ ១១,៤៦ភាគ​រយ​បើ​ធៀប​នឹង​រយៈ​ពេល ១១​ខែ​ឆ្នាំ​២០២០ ដែល​មាន​ចំនួន ៦០១ ០៤៥​តោន។ ​ប្រាក់​ដែល​ទទួល​បាន​ពី​ការ​នាំ​ចេញ​អង្ករ​មាន​ចំនួន ៤៥៤ ៤៨០ ៨៦៦ដុល្លារ។ ចំណែក​​ការ​នាំ​ចេញ​ស្រូវ ក្នុង​រយៈ​ពេល​ខាង​លើ​​សម្រេច​បាន​ ៣ ១២៣ ២៤២​តោន​(ទៅ​កាន់​ប្រទេស​វៀតណាម) កើន​ឡើង ៧៥,៧៥​ភាគ​រយ​​បើ​ធៀប​នឹង​រយៈពេល​ដូច​គ្នា​នៅ​ឆ្នាំ​២០២០។ ទឹក​ប្រាក់​ទទួល​បាន​ពី​ការ​នាំ​​ចេញ​ស្រូវ​ មាន​ចំនួន​ ៥៤៦ ៥៦៧ ៣៥០ដុល្លារ

សម្រាប់​ទីផ្សារ​ទទួល​ទិញ​អង្ករ​ពី​កម្ពុជា រួម​មាន ​សហភាព​អឺរ៉ុប​(​២២​ប្រទេស) ១៣៤ ៤៣៨​តោន ថយ​ចុះ ២៨,៦៦​ភាគ​រយ, ប្រទេស​ចិន ២៦៥ ២៤៤​តោន កើន​ឡើង ១២,៩០​ភាគ​រយ​, តំបន់​អាស៊ាន​(៧​ប្រទេស) ៥៤ ៣៥០​តោន​ ថយ​ចុះ ៣០,៥១​ភាគ​រយ និង​ទិសដៅ​ដទៃ​ទៀត​(២៤​ប្រទេស)​មាន​បរិមាណ ៧៨ ១៤៧​តោន ថយ​ចុះ ២១,៤៣​ភាគ​រយ​។​ ​អង្ករ​នាំ​ចេញ រួម​មាន ​អង្ករ​ក្រអូប​គ្រប់​ប្រភេទ​ ៣៨៩ ៩១២តោន ស្មើ​នឹង​៧៣,២៧​ភាគ​រយ អង្ករ​ស​គ្រប់​ប្រភេទ ១៣២ ៦៧៥​តោន ស្មើ​នឹង ២៤,៩៣​ភាគ​រយ​ និង​អង្ករ​ចំហុយ ៩ ៥៩២​តោន ស្មើ​នឹង ១,៨០​ភាគ​រយ។​

កាល​ពី​ឆ្នាំ​២០២០ កម្ពុជា​បាន​នាំចេញ​អង្ករ​សរុប ៦៩០ ៨២៩ តោន ដោយមាន​តម្លៃ​ជិត ៥៣៩ លាន​ដុល្លារ កើន​ឡើង ១១,៤០ ភាគរយ បើ​ធៀប​នឹង​ឆ្នាំ ២០១៩។ នេះ​បើតាម​ទិន្នន័យ​ក្រសួង​កសិកម្ម រុក្ខាប្រមាញ់ និង​នេសាទ៕

ភ្នំពេញ៖ សៀវភៅកេរ្ដិ៍ដំណែលស្នាដៃម្ហូបខ្មែរ (The Taste of Angkor)ត្រូវបានជ្រើសរើស​ជា​«សៀវភៅមុខ​ម្ហូបអាស៊ីដ៏ល្អផ្តាច់គេ» (The Best Asian Cookbook) ក្នុងកម្មវិធីតាំង​ពិព័រណ៍Gourmand World Cookbook Award 2021 ដែលប្រារព្ធឡើងចាប់ពីថ្ងៃទី២៩ ខែវិច្ឆិកា ដល់ថ្ងៃទី​០៦ ខែធ្នូ ឆ្នាំ២០២១។

សៀវភៅកេរ្ដិ៍ដំណែលស្នាដៃម្ហូបខ្មែរ ត្រូវបានរៀបចំឡើងដោយក្រសួងការបរទេស និង​សហប្រតិបត្តិការ​អន្តរជាតិ ក្រោមគំនិតផ្ដួចផ្ដើមរបស់ ឯកឧត្តមឧបនាយករដ្ឋមន្រ្តី ប្រាក់ សុខុនស្រប​តាមយុទ្ធសាស្រ្ត​ការទូតសេដ្ឋកិច្ចឆ្នាំ២០២១-២០២៣ ដែលបានប្រកាសដាក់ឱ្យអនុវត្តកាលពី​ថ្ងៃទី១៨ ខែមករា ឆ្នាំ​២០២១។ សៀវភៅនេះបានជ្រើសរើសសម្រិតសម្រាំង​យក​មុខម្ហូប និងបង្អែមខ្មែរចំនួន៣៨មុខ ដោយ​ណែនាំ​ពីវិធីចម្អិនងាយៗ និងបានបង្ហាញពីគន្លឹះនៃការជំនួសគ្រឿងផ្សំរបស់ខ្មែរ​មួយចំនួន​ដែល​ងាយស្រួល​រកនៅ​បរទេសព្រមទាំងបានរំលេច និងផ្សព្វផ្សាយពីផលិតផលកម្ពុជា ​ដូចជា ម្រេចកំពត អង្ករផ្កាម្លិះ និងស្ករត្នោត។  នេះបើយោងតាមសេចក្តីប្រកាសព័ត៌មានរបស់ក្រសួង ការបរទេស និង​សហប្រតិបត្តិ​ការអន្តរជាតិ។

ក្រសួងបានថ្លែងថា៖«ការទទួលបានពានរង្វាន់«សៀវភៅមុខម្ហូបអាស៊ីដ៏ល្អផ្តាច់គេ»នាពេលនេះគឺជា​​មោទន​ភាព​​ជាតិនិងជាសមិទ្ធផលដ៏ត្រចះត្រចង់ថ្មីមួយទៀតរបស់ព្រះរាជាណាចក្រកម្ពុជាដែល​បានឆ្លុះ​បញ្ចាំង​អំពី​កិច្ចខិតខំ​​ប្រឹងប្រែងរបស់រាជរដ្ឋាភិបាល ក្នុងការជំរុញវិស័យការទូតម្ហូបអាហារសំដៅ​ផ្សព្វផ្សាយឱ្យ​ពិភពលោក​បានស្គាល់កាន់តែច្បាស់ពីកេរ្ដិ៍ដំណែលនិងប្រណីតភាពនៃសិល្បៈម្ហូបខែ្មរដែលជាអត្តសញ្ញាណនៃអរិយធម៌ដ៏វិសេសវិសាលរបស់កម្ពុជា»។

ការលើកតម្កើងវិស័យការទូតម្ហូបអាហារនេះ ជាផ្នែកមួយដ៏សំខាន់នៃយុទ្ធសាស្រ្ត​ការទូតសេដ្ឋកិច្ច​ឆ្នាំ​២០២១-២០២៣ ដែលមានគោលដៅលើកស្ទួយកិត្យានុភាពជាតិ និងរួមចំណែកជាមួយរាជរដ្ឋាភិបាល​ក្នុង​ការឈានទៅសម្រេចចក្ខុវិស័យកម្ពុជាឆ្នាំ២០៣០ និងឆ្នាំ២០៥០។

កម្មវិធី Gourmand World Cookbook Awardត្រូវបានបង្កើតឡើងក្នុងឆ្នាំ១៩៩៥ ដោយ​លោកEdouard Cointreau ក្នុងគោលបំណងលើកស្ទួយ និងផ្សព្វផ្សាយវប្បធម៌​​​ម្ហូបអាហារ​ទូទាំង​សកលលោក។ នៅក្នុងឆ្នាំ២០២១នេះ មានការចូលរួមពីប្រទេសចំនួន១៩៨ដោយមាន​សៀវភៅ​សរុប​ចំនួន ៤០០០ក្បាល ដែលត្រូវបានជ្រើសរើសមកប្រកួតប្រជែងនៅក្នុងព្រឹត្តិការណ៍នេះ។ គួរបញ្ជាក់ថា ពានរង្វាន់ហ្គ័រម៉ង់ នេះត្រូវបានគេទទួលស្គាល់ថាជា ពានរង្វាន់អូស្ការ សម្រាប់វិស័យ​ម្ហូបអាហារ។

សៀវភៅមុខម្ហូបកេរ្ដិ៍ដំណែល​ស្នាដៃ​ម្ហូបខ្មែររួមជាមួយផលិតផល និងម្ហូបខ្មែរជាច្រើនមុខផ្សេងទៀតក៏ត្រូវ​បានដាក់បង្ហាញនិងដាក់ជាគំរូជូនអ្នកទស្សនាភ្លក់រសជាតិ នៅតាមបណ្ដាប្រទេសនានា​ទូទាំង​ពិភពលោក​ដោយស្ថានតំណាងកម្ពុជានៅបរទេស ក្នុងនោះរួមមាន ប្រទេសចិន ប្រទេសម៉ាឡេស៊ី ប្រទេសស៊ុយអែត ប្រទេសកូរ៉េ ជាដើម។ នេះបើយោងតាមសេចក្តីប្រកាសព័ត៌មានរបស់ក្រសួង៕

ភ្នំពេញ៖ ជាកិច្ចខិតខំប្រឹងប្រែងដើម្បីជម្រុញទំហំនៃការដោះដូរពាណិជ្ជកម្មទ្វេរភាគី កម្ពុជា-វៀតណាម​ គ្រោងនឹងចុះកិច្ច​ព្រមព្រៀង​​កិច្ចសហប្រតិបត្តិការ​លើ​វិស័យកសិកម្ម​​នៅក្នុងខែធ្នូនេះ សំដៅធ្វើយ៉ាងជំរុញ និងលើកកម្ពស់ការដាំដុះ និងនាំចេញទិន្នផលកសិកម្មឱ្យមានកម្រិតខ្ពស់។

លោក ហ៊ាន វណ្ណហន រដ្ឋលេខាធិការក្រសួងកសិកម្ម បានមានប្រសាសន៍ថា គម្រោងកិច្ចព្រមព្រៀងកិច្ចសហប្រតិបត្តិការ​លើ​វិស័យកសិកម្មនេះ គឺជាសំណើរបស់ឯកអគ្គរដ្ឋទូត​នៃ​សាធារណ​រដ្ឋសង្គមនិយមវៀតណាមថ្មី នៅក្នុងជំនួបជាមួយរដ្ឋមន្រ្តីកសិកម្មកម្ពុជា លោក វេង សាខុនកាលពីថ្ងៃទី៣០​ ខែវិច្ឆិកាកន្លងទៅ។

លោកបានបញ្ជាក់បន្ថែមថា ជាមួយនិងកិច្ចព្រមព្រៀងដែលមានស្រាប់ ប្រទេសទាំងពីរមានបំណងដើម្បីធ្វើយ៉ាង​ណាឱ្យកាន់តែមានភាពប្រសើរឡើងនៃទំនាក់ទំនងពាណិជ្ជកម្ម ការដោះដូរទំនិញជាពិសេសលើកសិក​ផល​កសិកម្ម និងបច្ចេទេសដាំដុះ។

លោកបានបន្ថែមថា ៖« ចំពោះផែនការនៃការចុះកិច្ចព្រមព្រៀងនេះ គឺយើងចង់បានគឺធ្វើម៉េចឲ្យ​មាន​ចំណូល​របស់កសិករ​មានកំណើន កាត់បន្ថយ​ភាពក្រីក្ររបស់ប្រជាជនយើង តាមរយៈលំហូររលូននៃទីផ្សារ​កសិផល ។តាមពិត​ទៅ​ វាមានលក្ខណៈ​ពិសេសដែរ ដែលប្រទេសវៀតណាម ជាប្រទេសជិតខាងរបស់យើងនេះ  ដូចនេះ​របស់ធ្ងន់​ៗ​ដែលយើង​ដឹកទៅឆ្ងាយ ហើយលក់ហ្នឹង វាមិនចំណេញដូចយើងដឹកទៅជិតទេ»។

លោកបានបន្តថា លោកត្រៀមនឹងកោះអញ្ជើញអ្នកជំនាញនៅតាមអង្គភាពពាក់ព័ន្ធ នៅក្នុងក្រសួង​កសិកម្ម​ដើម្បីពិគ្រោះយោបល់គ្នាមុននឹងឈានដល់ការចុះកិច្ចព្រមព្រៀង ជាពិសេសការស្វែងរកផល​ចំណេញឱ្យបានជា​អតិបរមាសម្រាប់ប្រជាជន និងសេដ្ឋកិច្ចកម្ពុជា។

យោងតាមប្រព័ន្ធទិន្នន័យគ្រឹះភូតគាមអនាម័យជាតិ (National Phytosanitary Database) ទទួល​បានពីអគ្គនាយកដ្ឋានកសិកម្ម បានឲ្យដឹងថា ក្នុងរយៈពេល១១ខែ ឆ្នាំ២០២១នេះ ការនាំចេញ​កសិផល​ទៅក្រៅប្រទេស មានបរិមាណសរុបចំនួន ៧ ១៣១ ៩១៥,០៤ តោន ទៅកាន់ទិសដៅ ៦៨ ប្រទេស គឺមានការកើនឡើងចំនួន ៣ ៤៤៤ ២៨៨,១៨ តោនស្មើនឹង ៨៧,៥៣% បើធៀបនឹងរយៈពេលដូចគ្នា​ក្នុងឆ្នាំ២០២០ ដែលទទួលបានត្រឹមតែ ៣ ៦៨៧ ៦២៦,៨៦ តោន៕

ភ្នំពេញ៖ ការបន្តអូសបន្លាយនៃការរីករាលដាលជំងឺកូវីដ១៩ បានធ្វើឱ្យប៉ះពាល់ដល់ការប្រកបរបស់រក​ស៊ី​ទទួល​ទាន​របស់ពលរដ្ឋគ្រប់រូប ប៉ុន្តែទន្ទឹមនិងនេះដែរយើងក៏ក្រឡេកឃើញមានការរីក​ចម្រើននៃ​ប្រព័ន្ធបច្ចេកវិទ្យា​ជាពិសេសការទូទាត់បែបឌីជីថលបានក្លាយទៅជាមធ្យោបាយដែលមិនអាចខ្វះបានក្នុង​ជិវភាពរស់​នៅប្រចាំ​ថ្ងៃរបស់បងប្អូនប្រជាពលរដ្ឋ ជាពិសេសការទូទាត់ក្នុងការទិញទំនិញ ឬសេវាកម្មតាមអណឡាញ។ ជាមួយគ្នានេះ ធនាគារអេស៊ីលីដា ដែលជាធនាគារពាណិជ្ជឈានមុខគេមួយនៅ​កម្ពុជា ក៏បានចូលរួមយ៉ាងសកម្មភាពក្នុង​ការបំពេញ​សេចក្ដីត្រូវការ​សម្រាប់របស់អ្នកប្រើប្រាស់សេវាធនាគារ​ឌីជីថល តាមរយៈ app អេស៊ីលីដា ម៉ូបាល ដែលមានមុខងារសម្បូរបែប ពិសេសការទូទាត់តាមរយៈ QR កូដ ដ៏លឿនរហ័ស និងសុវត្ថិភាពខ្ពស់។

នាពេលបច្ចុប្បន្ន អេស៊ីលីដាម៉ូបាល កំពុងផ្សាភ្ជាប់ខ្លួនជាមួយនឹងជីវភាពរស់ប្រចាំថ្ងៃ​របស់ពលរដ្ឋកាន់តែខ្លាំង​ឡើង ដោយចំនួនអ្នកប្រើប្រាស់បានកើនឡើងជារៀងរាល់ថ្ងៃ។ យើងអាចមើលឃើញជាក់ស្ដែង នៅតាមហាង​លក់ទំនិញ ភោជនីយដ្ឋាន ហាងកាហ្វេ និងអាជីវកម្មតូចធំៗជាច្រើនផ្សេងទៀត សុទ្ធតែបានដាក់ឲ្យមាន QR Code សម្រាប់ស្កែនក្នុងការទូទាត់ថ្លៃទំនិញ និងសេវាកម្ម ហើយអ្នកប្រើប្រាស់ក៏មានភាពងាយស្រួល និងពេញចិត្ត​ក្នុងការប្រើប្រាស់ផងដែរ ដ្បិតថា វាចំណេញពេលវេលា និងកាត់បន្ថយនូវការប្រើប្រាស់ក្រដាសប្រាក់ ដែលជាមានមេរោគ ពិសេសមេរោគកូវីដ១៩តែម្ដង។

ក្រុមយុវវ័យ បច្ចុប្បន្ននេះ ត្រូវបានគេមើលឃើញថា បានក្លាយជាអ្នកប្រើប្រាស់ច្រើនជាងគេ លើការទូទាត់តាម​ប្រព័ន្ធឌីជីថលនេះ ក្នុងនោះ ពួកគេបានលើកឡើងថា ការប្រើប្រាស់អេស៊ីលីដាម៉ូបាលដើម្បីទូទាត់ វាពិតជាមាន​ភាពងាយស្រួល លឿនរហ័ស និងស័ក្ដិសមសម្រាប់ការប្រើប្រាស់លើការទូទាត់នៅក្នុងយុគ្គសម័យបច្ចេកវិទ្យា។

មិនមែនតែក្រុមយុវវ័យទេ ដែលកំពុងនិយមប្រើប្រាស់ អេស៊ីលីដា ម៉ូបាល ពាណិជ្ជករ អាជីវករ មន្ត្រីរាជការ និងអ្នកធ្វើការតាមបណ្ដាក្រុមហ៊ុននានា ក៏កំពុងនិយមប្រើប្រាស់ អេស៊ីលីដាម៉ូបាល ដើម្បីទិញទំនិញ ការទូទាត់នានា ពិសេសគឺការទូទាត់ថ្លៃទឹកភ្លើង បង់ពន្ធ និងសេវាផ្សេងៗជាច្រើនទៀតផងដែរ។ ការប្រើប្រាស់​អេស៊ីលីដាម៉ូបាល ដើម្បីទូទាត់ គឺមានសុវត្ថិភាព និងទំនុកចិត្តខ្ពស់ ព្រមទាំងចំណេញពេលវេលាផងដែរ។

ប្រសិនបើលោកអ្នកចង់ប្រើប្រាស់អេស៊ីលីដាម៉ូបាល លោកអ្នកអាចស្វែងរកនិងទាញយក (Download) អេស៊ីលីដាម៉ូបាល តាមរយៈ App Store, Play Store និង App Gallery ។

ប្រសិនបើលោកអ្នកមានចម្ងល់ ឬសំណូមពរផ្សេងៗ (បម្រើ២៤ម៉ោង) សូមទូរសព្ទទៅកាន់លេខ ៖ ០២៣ ៩៩៤ ៤៤៤, ០១៥ ៩៩៩ ២៣៣ ឬផ្ញើសារអ៊ីមែល ទៅកាន់ ៖ emailinquiry@acledabank.com.kh ៕

ភ្នំពេញ៖ កម្ពុជាកំពុងធ្វើការរៀបចំតំបន់ តំបន់ទេសចរណ៍បាតសមុទ្រខេត្តព្រះសីហនុដែលនឹង​ក្លាយ​ទៅជា​ផលិតផលថ្មីដ៏ទាក់ទាញមួយសម្រាប់ ភ្ញៀវទេសចរជាតិ និងអន្តរជាតិមកកម្សាន្តមុជ​ទឹក​ និង ទស្សនានូវជីវៈចម្រុះដ៏ច្រើននៅបាត សមុទ្រកម្ពុជា ក្រៅពីគោលដៅទេសចរណ៍ផ្សេងៗទៀត ។

មន្ទីរបរិស្ថានខេត្តព្រះសីហនុ កាលពីថ្ងៃទី ២១ ខែវិច្ឆិកា ឆ្នាំ ២០២១  បានសរេសេរនៅលើហ្វេសបុកអម​ជាមួយនឹងរូបភាព ឱ្យដឹងថា  ក្រៅពីនៅលើដី កម្ពុជាក៏មានតំបន់ទេសចរណ៍បាតសមុទ្រដែលអាច ភ្ញៀវទេសចរ​អាចទស្សនាបាននូវជីវៈចម្រុះដ៏ច្រើននៅបាត សមុទ្រកម្ពុជា។

មន្ទីរបរិស្ថានខេត្តព្រះសីហនុបន្តថា  រូបភាពខាងក្រោមទាំងនេះ គឺជាសកម្មភាព​នៃការរៀប​ចំ​ដំណើរ​កម្សាន្ត​ជ្រមុជ​ទឹក​សម្រាប់​ភ្ញៀវ​ទេសចរ​ជាតិ​ និង​អន្តរជាតិ​ ដែល ខ្មែរ ដាហ្វ គ្រុប Khmer Dive Group បាន​ធ្វើ​ឡើងនៅ​តាម​ប្រជុំ​កោះតាង​ ដោយ​មាន​កម្មវិធី​ដូច​ជា​ ការ​ជ្រមុជ​ទឹក​ ការមុជទឹក​មើល​ផ្កា​ថ្ម​ បោះតង់​ អាំង​សាច់​ និង​ កម្មវិធី​វិធី​សប្បាយ​ៗ​ ជា​ច្រើន​ទៀត​។

លោក តាំង សុចិត្រក្រឹស្នា ប្រធានមន្ទីរទេសចរណ៍ខេត្តព្រះសីហនុ បានមានប្រសាសន៍​ឱ្យដឹងថា  តំបន់នេះ​ស្ថិតនៅក្រោមការគ្រប់គ្រងរបស់មន្ទីបរិស្ថានខេត្ត និងក្រសួងបរិស្ថាន​ ដោយមានគម្រោង អភិវឌ្ឍន៍ទៅជាតំបន់ទេសចរណ៍ក្រោមសមុទ្រ ។​

លោកបន្តថា ជាមួយគ្នានេះ មន្ទីរទេសចរណ៍ ខេត្ត តែងតែចូលរួមសហការជានិច្ច ប៉ុន្តែ សម្រាប់គម្រោងអភិវឌ្ឍន៍​ជាក់លាក់ គឺខាង មន្ទីរបរិស្ថាន និងក្រសួងបរិស្ថាន ជា អ្នកអនុវត្ត លើកិច្ចការងារ នេះ  ។

ការរៀបចំឱ្យមានទេសចរណ៍ក្រោមសមុទ្រនេះ គឺជាផលិតផលតថ្មី និង ពិតជាមានសារៈសំខាន់ខ្លាំងណាស់ សម្រាប់​ប្រទេសកម្ពុជា ជាពិសេស ខេត្តព្រះសីហនុ ដែលជាខេត្តគោលដៅទេសចរណ៍ និង មានឆ្នេរសមុទ្រដ៏​ស្រស់​ស្អាត  ត្រូវតែមានផលិតផលទេសចរណ៍ សម្បូរបែប ទាំងលើកគោក  និងទាំងក្នុងទឹកជាពិសេស គឺ  ធនធានធម្មជាតិបាតសមុទ្រដែលមានសក្តានុពល ខ្ពស់  ។

លោកថ្លែងថា៖ «នៅពេលដែលយើងអភិរក្សជីវៈចម្រុះ បានល្អ យើងរៀបចំ  ឱ្យមានសេវាកម្ម ដើម្បីឱ្យភ្ញៀវ អាច ទៅ  ទស្សនា បាន នឹងធ្វើឱ្យគោលដៅនោះ កាន់តែទាក់ទាញបន្ថែមទៀត។ គេចង់ទៅទស្សនា គេចង់ទៅលម្ហែ និងស្នាក់នៅបានយូ​វានឹងផ្តល់ផលប្រយោជន៍ដល់ប្រជាពលរដ្ឋ​ដែលរកស៊ីក្នុងវិស័យទេសចរណ៍ នេះ បាន​ច្រើនថែម​ទៀត»។​

លោក ស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា ប្រាប់ភ្នំពេញប៉ុស្តិ៍នៅថ្ងៃទី ២២ ខែវិច្ឆិកា ឆ្នាំ ២០២១ នេះ ឱ្យដឹងថា  ជុំវិញមានគម្រោង ក៏ដូចជាការផ្សព្វផ្សាយនូវផលិតផលទេសចរណ៍ក្រោមសមុទ្ររបស់រាជរដ្ឋាភិបាល គឺជាអ្វីដែលវិស័យឯកជនប្រថ្នាចង់បាន  សម្រាប់ដាក់បញ្ចូលទៅក្នុងផលិតផលកញ្ចប់ទស្សនកិច្ចសម្រាប់ទាក់ទាញភ្ញៀវទេសចរ។

លោកស្រីថ្លែងថា៖ «យើងចង់ឱ្យមានសេវាកម្មនាំភ្ញៀវឱ្យទៅដល់ក្រោមសមុទ្រ  ប៉ុន្តែ ជាមួយគ្នានោះ  ក៏គួតែគិតពីសុវត្ថិភាពជូនដល់ភ្ញៀវទេសចរផងដែរ  ពាក់ព័ន្ធនឹងការដឹកជញ្ជូននៅលើផ្ទៃទឹក ដើម្បីផ្តល់ទំនុកចិត្តដល់ភ្ញៀវទេសចរ»។

ទិន្នន័យ​ដែល​ផ្សព្វផ្សាយ​កាល​ពី​ថ្ងៃ​ទី​២២ ខែ​វិច្ឆិកា បង្ហាញ​ថា ចន្លោះ​ពី​ខែ​មករា ដល់​ខែ​កញ្ញា ឆ្នាំ​២០២១ កម្ពុជា​ទទួល​បាន​ភ្ញៀវ​ទេសចរ​ចំនួន ១៣១ ៦៧៤​នាក់ ធ្លាក់​ចុះ ៨៩,៤​ភាគ​រយ​បើ​ធៀប​នឹង​រយៈ​ពេល​ដូច​គ្នា​ឆ្នាំ​២០២០ ដែល​មាន​ចំនួន ១ ២៤៧ ៦៨០​នាក់។ ក្នុង​នោះ​ការ​ធ្វើ​ដំណើរ​តាម​ផ្លូវ​អាកាស​មាន​ចំនួន ៦៣ ០៥០នាក់ ស្មើ​នឹង ៤៧,៩​ភាគ​រយ និង​​ផ្លូវ​គោក-ទឹក ចំនួន ៦៨ ៦២៤​នាក់ ស្មើនឹង ៥២,១​ភាគ​រយ​។

បើ​យោង​តាម​ទិន្នន័យ​ខាង​លើ ​ភ្ញៀវ​ទេសចរ​ជន​ជាតិ​ថៃ បាន​ធ្វើ​ដំណើរ​មក​កម្ពុជា​ច្រើន​ជាង​គេ ដោយមាន​ចំនួន ៦៤ ៤៥៩​នាក់ ស្មើ​នឹង ៤៩​ភាគ​រយ​នៃ​ចំនួន​សរុប ជន​ជាតិ​ចិន ៣៧ ១៩៧​នាក់, វៀតណាម ៧ ៦៤៩​នាក់, ឥណ្ឌូនេស៊ី ៤ ២១១​នាក់, កូរ៉េ ២ ៩៨៩​នាក់, អាមេរិក ២ ៩៣៤​នាក់, ចិន​តៃប៉ិក ២ ៤៣៤​នាក់, បារាំង ១ ៦២៤​នាក់, ម៉ាឡេស៊ី ១ ៣៣៦​នាក់ និង​ជប៉ុន ១ ២២០​នាក់៕

ភ្នំពេញ៖ ដើម្បីជាការឆ្លើយតបទៅនឹងការរីកចម្រើននៃប្រព័ន្ធបច្ចេកវិទ្យាឌីជីថល និងតម្រូវការរបស់អតិថិជ ក៏ដូចជា សាធារណះជននិយមការបញ្ជាទិញតាមផ្សារអនឡាញ ធនាគារ អេស៊ីលីដា ភីអិលស៊ី ជា ធនាគារពាណិជ្ជ ទីមួយក្នុងប្រទេសកម្ពុជា ដែលបានបោះផ្សាយមូលបត្រកម្មសិទ្ធិជាសាធារណៈនៅ ក្រុមហ៊ុនផ្សារមូលបត្រកម្ពុជា (ផ.ម.ក) នៅថ្ងៃអង្គារ ទី៣០ វិច្ឆិកានេះបានដាក់ឲ្យដំណើរការជាផ្លូវការនូវអេស៊ីលីដា អ៊ីសប ដែលជា មធ្យោបាយទាន់សម័យសម្រា​ប់​ទិញ-លក់ទំនិញនិងទូទាត់អនឡាញតាមអេស៊ីលីដា ម៉ូបាល។

លោក បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា​ ភីអិលស៊ីបានមានប្រសាសន៍ថា​ផ្សារអនឡាញ​កំពុងមានប្រជាប្រិយភាពខ្លាំងនៅក្នុងពិភពលោក រួមទាំងព្រះរាជាណាចក្រកម្ពុជា។ មូលហេតុចម្បងដែលមនុស្សជាច្រើននិយមទិញ-លក់ ទំនិញ និងសេវកម្មផ្សេងៗ តាមផ្សារអនឡាញដោយសារ វាមានភាពងាយស្រួល ចំណេញពេលវេលា ជៀសផុតការឆ្លងមេរោគ ក្នុងបរិបទ នៃការរីករាលដាលជំងឺកូវីដ-១៩។

លោកបានមានប្រសាសន៍បញ្ជាក់យ៉ាងដូច្នេះថា៖«ដោយមើលឃើញឱកាស និងសក្តានុពលផ្សារអនឡាញ​នេះធនាគារ អេស៊ីលីដា បានអភិវឌ្ឍនិងដាក់ឲ្យដំណើរការជាផ្លូវការនូវអេស៊ីលីដា​អ៊ីសបជាផ្សារអនឡាញ ដើម្បីឲ្យដៃគូអាជីវកម្ម អាជីវករ និងអតិថិជនអាចទិញ-លក់ និងទូទាត់ទំនិញ និងសេវាកម្មផ្សេងៗ បានយ៉ាងឆាប់រហ័ស ងាយស្រួល ចំណេញពេលវេលា​ និងមានសុវត្ថិភាពខ្ពស់។ក្នុងនោះ The First Store ជាក្រុមហ៊ុនផ្គត់ផ្គង់ទំនិញដំបូងគេ ដែលបានដាក់លក់ទំនិញរាប់ម៉ឺនប្រភេទ នៅលើផ្សារអនឡាញ អេស៊ីលីដា អ៊ីសប» ។

លោក ប៊ុន​ ណារ៉ា អ្នកគ្រប់គ្រងទូទៅ the First Store The First Store បានមានប្រសាសន៍ថាបង្កើតឡើង​នៅឆ្នាំ២០១៣ដោយផ្តោតលើគុណភាព​តម្លៃ​និងសេវាកម្មដើម្បីបំពេញតម្រូវការប្រចាំថ្ងៃ។ The First Store ក៏មានទំនិញប្រហែល១២០០០មុខ​ទំនិញសម្រាប់ផ្គត់ផ្គង់ជូនអតិថិជនទូទាំងប្រទេស។

លោកថ្លែងថា៖« ​ក្នុងសម័យបច្ចេកវិទ្យានិងក្នុងបរិបទកូវីដ-១៩នេះផងដែរE-Shop ដើរតួនាទីដ៏សំខាន់​ក្នុងវិស័យអាជីវកម្ម។យើងខ្ញុំក៏មានមោទនភាពជាខ្លាំងដែលបានសហការជាមួយACLEDA E-Shop ដើម្បីមានភាពងាយស្រួលក្នុងការបញ្ជាទិញ។ The First Store រីករាយ​បម្រើលោកអ្នកដោយបេះដូង»។

បើយោងតាមលោក បណ្ឌិត អ៊ិន ចាន់នី បច្ចុប្បន្នធាគាររបស់លោកកំពុងធ្វើការជាមួយហាងធំៗចំនួន៤ទៀត​ដែលមានរាប់ម៉ឺនមុខទំនិញដើម្បីបម្រើសេចក្តីត្រូវការរបស់អតិថិជននិងសាធារណះជនកាន់តែមានភាពងាយស្រួល និងសម្បូរបែបបន្ថែមទៀត៕

ភ្នំពេញ៖ក្រោយធ្វើប្រតិបត្តិការអស់រយះពេលជិត៣០ឆ្នាំនិងបានក្លាយខ្លួនជាប្រជាធនាគារជាទីទុកចិត្តរបស់ប្រជាពលរដ្ឋ និងដៃគូរអាជីវកម្មនានា ធនាគារអេស៊ីលីដាតែងតែធ្វើការអភិវឌ្ឍឥតឈប់ឈរ​ជាពិសេសគឺការធ្វើបច្ចុប្បន្នភាពដោយបាននាំយកមកនូវប្រព័ន្ធបច្ចេកវិទ្យាទំនើបៗចុងក្រោយគេបង្អស់ដោយបានប្រែក្លាយខ្លួនពីការផ្តល់សេវាធនាគារបែបប្រពៃណីមកជាប្រព័ន្ធឌីជីថលដ៏សម្បូរបែប  រហ័ស មានសុវត្ថិភាព និងការធ្វើប្រតិបត្តិការស្វ័យសេវាធនាគារ គ្រប់ពេលវេលា និងប្រកបដោយសុវត្ថិភាព​ខ្ពស់ដែលជាការឆ្លើយតបទៅនឹងការរីកចម្រើននៃយុគ្គសម័យឌីជីថលនៅប្រទេសកម្ពុជា។

លោកស្រី សុខ សោភា នាយិកាប្រតិបត្តិជាន់ខ្ពស់ទីផ្សារធនាគារ អេស៊ីលីដា ភីអិលស៊ី បានមាន​ប្រសាសន៍ថា បច្ចុប្បន្ននេះ ធនាគារ អេស៊ីលីដា បានបន្តអភិវឌ្ឍឥតឈប់ឈរក្នុងការបង្កើតឲ្យ​មានហេដ្ឋារចនាសម្ព័ន្ធឌីជីថល ដើម្បីបម្រើដល់អតិថិជនឲ្យកាន់តែមានភាពងាយស្រួល និងផាសុកភាព ប្រកបដោយក្តីរីករាយ សប្បាយចិត្ត។

លោកស្រីបានបន្តថា«ធនាគារ អេស៊ីលីដា កំពុងបំពាក់បំពាក់ម៉ាស៊ីនទំនើបៗ ប្រកបដោយបច្ចេកវិទ្យា​ដោយបង្កើតនូវភាពលេចធ្លោ និងទាន់សម័យសម្រាប់អតិថិជន, សាធារណៈជន និងបណ្តាដៃគូ​ពាណិជ្ជកម្ម​​របស់យើង ដែលរួមមាន ម៉ាស៊ីនដាក់ប្រាក់-ដកប្រាក់, ម៉ាស៊ីនដកប្រាក់, ម៉ាស៊ីនបើក​គណនី, ម៉ាស៊ីនបើកគណនីមានកាលកំណត់ និងម៉ាស៊ីនដាក់កាបូបប្រាក់សម្រាប់ដៃគូ ដែលមានការ​ចរាចរ​ក្រដាសប្រាក់ច្រើនប្រភេទទៀត  ដើម្បីបង្កលក្ខណៈងាយស្រួលជូនដល់អតិថិជនសម្រាប់ការ​ប្រើប្រាស់សាច់ប្រាក់ទៅតាមតម្រូវការ បន្ថែមពីលើការប្រើប្រាស់តាម អេស៊ីលីដាម៉ូបាល។»

លោកស្រីនាយិកាបានបន្តថា «អតិថិជនអាចអញ្ជើញទៅដក-ដាក់ប្រាក់បើកគណនីធនាគារឬធ្វើ​វិនិយោគ​​ជាមួយធនាគារដោយខ្លួនឯងផ្ទាល់បាននៅតាមទូម៉ាស៊ីន នៅទូទាំងប្រទេសដោយក្តីរីករាយ​២៤ម៉ោងលើ២៤ម៉ោងដោយមិនចាំបាច់ធ្វើដំណើរទៅឆ្ងាយពីផ្ទះឡើយដោយអាចស្វែងរកទីតាំងទូម៉ាស៊ីនណាមួយដែលនៅជិតផ្ទះបានយ៉ាងងាយស្រួលនិងមិនជួបមនុស្សច្រើនដែលមានហានិភ័យខ្ពស់នៃការឆ្លងជំងឺកូវីដ១៩ ។»

ជាការឆ្លើយតបទៅនឹងតម្រូវការរបស់ប្រជាពលរដ្ឋ ជាពិសេសចូលរួមទប់ស្កាត់ការរីករាលនៃ​ជំងឺកូវីដ​១៩​ជាមួយរាជរដ្ឋាភិបាលនៃព្រះរាជាណាចក្រកម្ពុជា ធនាគារអេស៊ីលីដាបានដាក់ពង្រាយម៉ាស៊ីន​ស្វ័យប្រវត្តិមានបច្ចេកវិទ្យាជាច្រើនទីតាំង និងតែងតែធ្វើការអភិវឌ្ឍក្នុងការផ្តល់សេវាហិរញវត្ថុ​របស់ខ្លួនប្រកបដោយបរិយាប័ណ្ណ៕

ភ្នំពេញ៖ វ៉ាក់សាំងបង្ការជំងឺកូវីដ-១៩ «ម៉ូដឺណា (Moderna)» ដែលជាវ៉ាក់សាំងផលិតនៅសហរដ្ឋអាមេរិក ប្រមាណ ១៨៨,១៦០ដូស បានដឹកមកដល់ប្រទេសកម្ពុជាហើយកាលល្ងាចថ្ងៃអាទិត្យ ទី២៨ ខែវិច្ឆិកា ឆ្នាំ២០២១នេះ ។ នេះបើយោងតាមការសរសេររបស់សម្តេចនាយករដ្ឋមន្រ្តី ហ៊ុន សែនសរសេរកាលពីល្ងាចថ្ងៃដដែលនេះ។

បើយោងតាមការលើកឡើងរបស់លោកនាយករដ្ឋមន្រ្តី ហ៊ុន សែន វ៉ាក់សាំងនេះ គឺជាជំនួយ​របស់​មជ្ឈ​មណ្ឌល​កូវ៉ាក់ (COVAX Facility) ។ មជ្ឈមណ្ឌលកូវ៉ាក់ គឺជាយន្ត​ការអន្តរជាតិ​មួយ ត្រូវបានបង្កើត​ឡើង​ក្រោមកិច្ចសហប្រតិបត្តិការរវាងអង្គការសុខភាពពិភពលោក និង​អង្គការអភិវឌ្ឍន៍អន្តរជាតិនានា ដើម្បីស្វះស្វែងរកវ៉ាក់សាំងបង្ការជំងឺកូវីដ១៩ ជូនដល់ប្រទេសក្រីក្រ និងប្រទេសអភិវឌ្ឍន៍តិចតួច។

លោកនាយករដ្ឋមន្រ្តីបានលើកឡើងយ៉ាងដូច្នេះថា៖«ប្រទេសកម្ពុជា ក៏ជាប្រទេសមួយ ដែលត្រូវបាន​មជ្ឈមណ្ឌលកូវ៉ាក់កំណត់ជាប្រទេសត្រូវផ្តល់នូវជំនួយវ៉ាក់សាំង ដើម្បីចូលរួមប្រយុទ្ធប្រឆាំងនឹងជំងឺកូវីដ-១៩ផងដែរ។ មជ្ឈមណ្ឌលកូវ៉ាក់ បានកំណត់ផ្តល់វ៉ាក់សាំងបង្កាជំងឺកូវីដ-១៩ ប្រមាណ ៦.៦លានដូស​មកដល់ប្រទេសកម្ពុជាក្នុងជំហានដំបូង។ មកដល់ពេលនេះវ៉ាក់សាំងប្រមាណជិត ៣លានដូសហើយ ដែលកូវ៉ាក់ បានបញ្ជូនមកដល់ប្រទេសប្រទេសកម្ពុជា»។

ការចាក់វ៉ាក់សាំងជូនប្រជាពលរដ្ឋ គឺជាយុទ្ធសាស្ត្រចម្បងមួយ ដែលរាជរដ្ឋាភិបាលកម្ពុជា បានដាក់ចេញ ដើម្បីប្រយុទ្ធប្រឆាំងនឹងការរាតត្បាតជំងឺកូវីដ-១៩។ មកដល់ពេលបច្ចុប្បន្ននេះ កម្ពុជា រកបានវ៉ាក់សាំង​សរុបជាង ៤០លានដូស។ ក្នុងនោះជាង ៣០លានដូសជាវ៉ាក់សាំង ដែលកម្ពុជា បានបញ្ជាទិញពី​ប្រទេសចិន៕

ភ្នំពេញៈ កម្ពុជាបានស្វាគមន៍ភ្ញៀវទេចរ​ចំនួន ១៣១ ៦៧៤​នាក់ ធ្លាក់​ចុះ ៨៩,៤​ភាគ​រយ​បើ​ធៀប​នឹង​រយៈ​ពេល​ដូច​គ្នា​ឆ្នាំ​២០២០ ដែល​មាន​ចំនួន ១ ២៤៧ ៦៨០​នាក់ ដោយសារតែការបន្តអូសបន្លាយនៃការរីករាលដាល​ជំងឺកូវិដ១៩ ។

បើ​យោង​តាម​ទិន្នន័យពីក្រសួងទេចរណ៍ សម្រាប់ការ​ធ្វើ​ដំណើរ​តាម​ផ្លូវ​អាកាស​មាន​ចំនួន ៦៣ ០៥០នាក់ ស្មើ​នឹង ៤៧,៩​ភាគ​រយ និង​ផ្លូវ​គោក-ទឹក ចំនួន ៦៨ ៦២៤​នាក់ ស្មើនឹង ៥២,១​ភាគ​រយ។

​ភ្ញៀវ​ទេសចរ​ជន​ជាតិ​ថៃ បាន​ធ្វើ​ដំណើរ​មក​កម្ពុជា​ច្រើន​ជាង​គេ ដោយ​មាន​ចំនួន ៦៤ ៤៥៩​នាក់ ស្មើ​នឹង ៤៩​ភាគ​រយ​នៃ​ចំនួន​សរុប ជន​ជាតិ​ចិន ៣៧ ១៩៧​នាក់, វៀតណាម ៧ ៦៤៩​នាក់, ឥណ្ឌូនេស៊ី ៤ ២១១​នាក់, កូរ៉េ ២ ៩៨៩​នាក់, អាមេរិក ២ ៩៣៤​នាក់, ចិន​តៃប៉ិក ២ ៤៣៤​នាក់, បារាំង ១ ៦២៤​នាក់, ម៉ាឡេស៊ី ១ ៣៣៦​នាក់ និង​ជប៉ុន ១ ២២០​នាក់។

ដោយ​ឡែក​សម្រាប់​ខែ​កញ្ញា ភ្ញៀវ​ទេសចរ​បរទេស​ធ្វើ​ដំណើរ​មក​កម្ពុជា មាន​ចំនួន​សរុប ៩ ៩៦៧​នាក់ ធ្លាក់​ចុះ ៥២,៨​ភាគ​រយ​ធៀប​ខែ​កញ្ញា ឆ្នាំ​២០២០ ដែល​មាន​ចំនួន ២១ ១៣៧​នាក់។

លោក ហូ វណ្ឌី ទីប្រឹក្សា​សមាគមទីភ្នាក់ងារ​ទេសចរណ៍​កម្ពុជា បាន​មានប្រសាសន៍ថា ក្តី​បារម្ភ​ពី​ការ​ឆ្លង​រាល​ដាល​ជំងឺកូវីដ​១៩ គឺ​ជា​មូល​ហេតុ​តែ​មួយ​គត់​ដែល​ធ្វើ​ឱ្យ​ចំនួន​ភ្ញៀវ​ទេសចរធ្លាក់​ចុះ ប៉ុន្តែ​ចំនួន​នេះ​នឹង​មាន​សម្ទុះ​ឡើង​វិញជា​បណ្តើរៗ​បន្ទាប់​ពី​រដ្ឋាភិបាល​កម្ពុជា ​សម្រេច​ដក​ចេញ​នូវ​វិធាន​ការ​ធ្វើ​ចត្រាឡី​ស័ក​សម្រាប់​ភ្ញៀវ​បរទេស​ដែល​បាន​ចាក់​វ៉ាក់សាំង​រួច​រាល់។

លោក​បញ្ជាក់​ថា៖​«នេះ​គឺ​ជា​ពន្លឺ​ទាំង​សម្រាប់​ជន​បរទេស​ដែល​ចង់​ធ្វើ​ដំណើរ​មក​កម្ពុជា និង​សម្រាប់​អ្នក​នៅ​ក្នុង​វិស័យ​ទេសចរណ៍​ផង​ដែរ​»។

លោក​បន្ថែម​ទៀត​ថា ៖«​ដើម្បី​ឱ្យ​វិស័យ​នេះ​មាន​និរន្តរភាព​រឹង​មាំ ទាំង​រដ្ឋាភិបាល ក៏​ដូច​ជា​ប្រជាជន​ទាំង​អស់​ត្រូវ​តែ​ចូល​រួម​ឱ្យអនុវត្ត​ឱ្យ​បាន​ហ្មត់ចត់​នូវ​វិធានការ​នានា​ក្នុង​ការ​ប្រយុទ្ធ​ប្រឆាំង​នឹង​ជំងឺ​កូវីដ​១៩»​។

ក្នុង​ពិធី​សម្ពោធ​ដាក់​ឱ្យ​ប្រើ​ប្រាស់​ជា​ផ្លូវការ​ស្ពាន​ឆ្លង​ទន្លេ​មេគង្គ «ស្ពាន​មិត្ត​ភាព​កម្ពុជា-ចិន ស្ទឹង​ត្រង់-ក្រូចឆ្មារ» កាល​ពី​ថ្ងៃ​ទី​២៣ ខែ​វិច្ឆិកា លោក​ ហ៊ុន សែន បាន​និយាយ​​​ថា ការ​គ្រប់​គ្រង​ការ​ឆ្លង​រាល​ដាល​ជំងឺកូវីដ​១៩ ក្នុង​សហគមន៍ប្រកប​ដោយ​ប្រសិទ្ធភាព​ខ្ពស់​ក្នុង​​ពេល​នេះ គឺ​ជា​ផ្នែក​មួយ​ដ៏​សំខាន់​សម្រាប់​កម្ពុជា​ក្នុង​ការ​បើក​ទទួល​ភ្ញៀវ​ទេសចរបរទេស​ចាក់​វ៉ាក់សាំង​ចាប់​ពី​ចុង​ខែ​នេះ​តទៅ។ ​ការ​បើក​ប្រទេស​ឡើង​វិញ​នា​ពេល​ខាង​មុខ​ឆាប់ៗ នេះ(ថ្ងៃ​ទី​៣០ ខែ​វិច្ឆិកា) លោក​មាន​ជំនឿថា​នឹង​មិន​មាន​ការ​បោះ​ជំហ៊ាន​ថយ​ក្រោយ​វិញ​​ទេ​ ព្រោះ​បច្ចុប្បន្ន​អត្រា​នៃ​ចំនួន​ប្រជាជន​នៅ​កម្ពុជា​ចាប់​វ៉ាក់សាំង​បានគ្រប​ដណ្តប់​រហូត​ដល់​ជាង ៨៨​ភាគ​រយ​រួច​ទៅ​ហើយ​។​

លោក​បន្ថែម​ថា ជាក់​ស្តែង​ការ​បើក​ឱ្យ​ប្រជាជន​ក្នុង​ស្រុក​ដើរ​កម្សាន្ត​ក្នុង​ពិធី​បុណ្យ​ភ្ជំ​បិណ្ឌ និង​អុំ​ទូក នា​ពេល​ថ្មីៗ​នេះ គឺ​មិន​បាន​ធ្វើ​ឱ្យ​អត្រា​នៃ​ការ​ឆ្លង​ជំងឺកូវីដ​១៩ ហក់​ឡើង​នោះ​ទេ។

ក្នុង​ឆ្នាំ​២០២០ កម្ពុជា​ទទួល​បាន​ភ្ញៀវ​បរទេស​សរុប ១ ៣០៦ ១៤៣ នាក់​ធ្លាក់​ចុះ ៨០,២ ភាគរយ​បើ​ធៀប​ទៅ​នឹង​ឆ្នាំ​២០១៩ ដែល​មាន​ចំនួន ៦ ៦១០ ៥៩២​នាក់​។ នេះ​បើ​យោង​តាម​ទិន្នន័យ​ពី​ក្រសួង​ទេសចរណ៍៕

ភ្នំពេញៈ កម្ពុជានឹងរង់ចាំស្វាគមន៍ជានិច្ចចំពោះវិស័យឯកជនឥណ្តូនេស៊ី ដែលមានបំណងធ្វើការវិនិយោគលើវិស័យកសិកម្ម ខណៈបច្ចុប្បន្នវិស័យកសិកម្មនៅកម្ពុជាមិនត្រឹមតែមានលទ្ធភាពគ្រប់គ្រាន់ក្នុងការផ្គត់ផ្គង់ខ្លួនឯងប៉ុណ្ណោះទេ ប៉ុន្តែថែមទាំងបានធ្វើការនាំចេញទៅកាន់ទីផ្សារអន្តរជាតិ ក្នុងបរិមាណកើនឡើងជារៀងរាល់ឆ្នាំ។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន នៅក្នុងជំនួបជាមួយឯកអគ្គរដ្ឋទូតនៃសាធារណរដ្ឋឥណ្ឌូនេស៊ីប្រចាំកម្ពុជា លោក Sudirman Haseng កាលពីព្រឹកថ្ងៃសុក្រ ទី២៦ ខែវិច្ឆិកានេះ បានលើកឡើងថា ក្នុងរយៈពេលប៉ុន្មានឆ្នាំចុងក្រោយនេះ ដោយមានការយកចិត្តទុកដាក់ខ្ពស់ពីសំណាក់ប្រមុខរាជរដ្ឋាភិបាល វិស័យកសិកម្មកម្ពុជា បានក្លាយជាវិស័យអាទិភាពមួយ ហើយកម្ពុជាក៏បានប្រែក្លាយជាប្រទេសដែលមានលទ្ធភាពផ្គត់ផ្គង់ខ្លួនឯងផង និងធ្វើការនាំចេញកសិផលសំខាន់ផង។

លោកបន្ថែមថា ជាមួយនឹងកិច្ចសហប្រតិបត្តិការល្អរវាងកម្ពុជា និងឥណ្ឌូនេស៊ី លោកសង្ឃឹមថា ក្នុងពេលឆាប់ៗនេះនឹងមានវិនិយោគិនឥណ្ឌូនេស៊ី ចូលមកវិនិយោគលើវិស័យកសិកម្ម រួមទាំងការកែច្នៃកសិផល និងខ្សែច្រវាក់តម្លៃនៅកម្ពុជា។

លោកថ្លែងថា៖«ស្ថានភាពនៃវិស័យកសិកម្មនៅកម្ពុជាកំពុងមានការវិវត្តរីកចម្រើនយ៉ាងឆាប់រហ័ស ជាពិសេសក្នុងដំណាក់កាលនៃវិបត្តិជំងឺឆ្លងសកលកូវីដ១៩។ យើងរង់ចាំស្វាគមន៍ជានិច្ចចំពោះវិស័យឯកជនឥណ្ឌូនេស៊ីដែលមានបំណងធ្វើការវិនិយោគលើវិស័យកសិកម្មនាពេលអនាគត»។

យោងតាមលោក សាខុន ផលិតផលកសិកម្មកម្ពុជាដែលកំពុងមានសក្តានុពល មានជាអាទិ៍ ស្រូវ អង្ករ ចេក ដំឡូងមីស្រស់-ក្រៀម គ្រាប់ស្វាយចន្ទីស្រស់ និងកែច្នៃរួច និងស្វាយស្រស់ ជាដើម។

លោក Sudirman Haseng បានប្រាប់ថា លោកនឹងខិតខំពង្រឹង និងពង្រីកបន្ថែមទៀតក្នុងការផ្សព្វផ្សាយពីសក្តានុពលនៃវិស័យកសិកម្មកម្ពុជាទៅដល់វិនិយោគិនឥណ្ឌូនេស៊ី។
បន្ថែមពីលើនេះលោក Sudirman Haseng ក៏បានប្រាប់ថា ភាគីឥណ្ឌូនេស៊ីកំពុងរៀបចំសេចក្តីព្រាងអនុស្សរណៈនៃការយោគយល់គ្នាលើកិច្ចសហប្រតិបត្តិការលើវិស័យកសិកម្មរវាងប្រទេសទាំងពីរផងដែរ។

ទិន្នន័យក្រសួងកសិកម្ម រុក្ខាប្រមាញ់ និងនេសាទ ឱ្យដឹងថា ក្នុងរយៈពេល ១០ខែ ឆ្នាំ២០២១ នេះ ការនាំចេញកសិផលទៅក្រៅប្រទេស មានបរិមាណសរុប ៦ ៣៦៤ ៦០៧,២៤ តោន ទៅកាន់ទិសដៅ ៦៨ប្រទេស គឺមានការកើនឡើងចំនួន ២ ៩៧០ ៦៩១,៦០តោនស្មើនឹង ៨៧,៥៣ភាគរយ បើធៀបនឹងរយៈពេលដូចគ្នាក្នុងឆ្នាំ២០២០ ដែលទទួលបានត្រឹមតែ ៣ ៣៩៣ ៩១៥,៦៤តោន៕