Category: Economy

សៀមរាប៖ នៅព្រឹកថ្ងៃទី៥ ខែធ្នូ ឆ្នាំ២០២១ នេះ លោកជំទាវបណ្ឌិតសភាចារ្យ ភឿង សកុណា រដ្ឋ​មន្រ្តី​ក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា បានប្រគេន​នូវប្លង់ស្ថាបត្យកម្មនិងបច្ច័យសរុបចំនួន២ម៉ឺនដុល្លារ ដែលបានពីការចូលរួមរបស់លោកជំទាវផ្ទាល់ និងមន្រ្តីរាជការក្រោមឱវាទ ទៅព្រះមហាវិមលធម្ម ពិន សែម សិរីសុវណ្ណោ ព្រះរាជាគណៈថ្នាក់ទោ ឧត្តមទីប្រឹក្សាគណៈសង្ឃនាយកនៃព្រះរាជាណាចក្រកម្ពុជា និងជាព្រះគ្រូចៅអធិការវត្តរាជបូណ៌ ជាការរួមចំណែកកសាងសារមន្ទីរ និងដើម្បីព្រះអង្គចាប់ផ្តើមប្រមែប្រមូលនូវបច្ច័យសប្បុរសនានា​បន្ថែមទៀតក្នុងការកសាងសារមន្ទីរខាងលើ៕

​

​ភ្នំពេញ​៖ ក្រសួងពាណិជ្ជកម្ម​ដាក់​ឪ​សា​នុ​វាទ​ដល់​រយះពេល​៤​ខែ​ដល់​សហគ្រាស​ឯកបុគ្គល នីតិបុគ្គល និង​សាខា​ក្រុមហ៊ុន​បរទេស ដែល​ធ្វើ​អាជីវកម្ម​តាម​ប្រព័ន្ធ​អេឡិចត្រូនិក​ទាំងអស់​ដែល​មិនទាន់​ទទួល លិខិតអនុញ្ញាត ឬ​អាជ្ញា​បណ្ណ​ពាណិជ្ជកម្ម​តាម​ប្រព័ន្ធ​អេឡិចត្រូនិក​ត្រូវដាក់​ពាក្យស្នើសុំ ដើម្បី​ការពារ​អ្នកប្រើប្រាស់​។​

​ក្រសួងពាណិជ្ជកម្ម​កាល​ពីថ្ងៃ​ទី​០១ ខែធ្នូ ឆ្នាំ​២០២១ បាន​ជូនដំណឹង​ពី​ការពន្យា​ពេលនេះ ពី​ការដាក់​ពាក្យស្នើសុំ លិខិតអនុញ្ញាត ឬ​អាជ្ញា​បណ្ណ​ពាណិជ្ជកម្ម​តាម​ប្រព័ន្ធ​អេឡិចត្រូនិក​នេះ រហូតដល់​ថ្ងៃទី​១ មីនា ឆ្នាំ​២០២២ ដោយសារតែ​ក្រសួង​សង្កេតឃើញថា សហគ្រាស​-​ក្រុមហ៊ុន​ទាំងនោះ បាននិងកំពុង កំពុង​រៀបចំ​ឯកសារ​ជាមួយ​ក្រសួង​ប្រៃសណីយ៍ និង​ទូរគមនាគមន៍​។​

​បើតាម​ប្រធាន​នាយកដ្ឋាន​ចុះបញ្ជី​ពាណិជ្ជកម្ម​អះអាងថា នៅក្នុង​ករណី​ដែល​ក្រសួង​ពន្យា​ពេល​ដល់​ដើមខែ​មីនាឆ្នាំ​២០២២​ហើយ តែ​ក្រុមហ៊ុន និង​សហគ្រាស​ទាំងនោះ​នៅតែ​មិន​ព្រម​ដាក់ពាក្យ​ស្នើសុំ​ទៀត​នោះ​ក្រសួង​នឹង​ចាត់វិធានការ​តាមច្បាប់ ដោយ​នឹង​ផ្អាក​ប្រតិបត្តិការ​អាជីវកម្ម​តាម​ប្រព័ន្ធ​អេ​ឡិច​ត្រូ​និ​ច​(​ការលក់ដូរ​អន​ឡាញ​) ហើយនឹង​អាច​ពិន័យ​ជា​ប្រាក់​រហូតដល់​១០​លាន​រៀល សម្រាប់​អាជីវកម្ម​តាម​អន​ឡាញ​ណា ដែល​ធ្វើ​សកម្ម​លក់ដូរ​តាម​អន​ឡាញ​ដោយ​គ្មាន​ច្បាប់​អនុញ្ញាត​នេះ​។​

​កាលពី​០២ ខែ​វិ​ច្ឆ​កា ឆ្នាំ​២០១៩ ច្បាប់​ស្តីពី កិច្ចការពារ​អ្នកប្រើប្រាស់ មាន​១១​ជំពូក ៥១​មាត្រា ត្រូវបាន​ប្រកាស​ឲ្យ​ប្រើប្រាស់​ក្នុង​គោលដៅ​កំណត់​វិធាន និង​យន្តការ​ដើម្បី​រួមចំណែក​បង្កើត​បរិយាកាស​នៃ​ការធ្វើ​ពាណិជ្ជកម្ម និង​ផលប្រយោជន៍​អ្នកប្រើប្រាស់​ត្រូវ​បានការ​ពារ ការធ្វើ​ពាណិជ្ជកម្ម​មានការ​ប្រកួត​ប្រជែង​ដោយ​សុចរិត និង​អ្នកប្រើប្រាស់​ក៏ដូចជា​ពាណិជ្ជករ ធ្វើ​សកម្មភាព​ជាមួយគ្នា​ដោយមាន​ទំនុកចិត្ត​៕

​

​ហ្សឺ​ណែវ ប្រទេស​ស្វី​ស​៖ មន្ត្រីជាន់ខ្ពស់​នៃ​ក្រសួងពាណិជ្ជកម្ម​បានស្នើ​សុំ​ឲ្យ​អង្គការ UNCTAD បន្ត​ជួយ​ដល់​កម្ពុជា​ក្នុងការ​សិក្សា​ដើម្បី​រៀបចំ​យុទ្ធសាស្ត្រ​គ្រប់​ជ្រុងជ្រោយ​សម្រាប់​កម្ពុជា ស្ដីពី​ការចាកចេញ​ពី​ប្រទេស​អភិវឌ្ឍន៍​តិចតួច និង​ទីផ្សារ​នាំចេញ កសាង​សមត្ថភាព​របស់​សហគ្រាស​កម្ពុជា ការ​ប្រែក្លាយ​ឌីជីថល​។​
​លោក សុខ សុភ័ក្ត្រ រដ្ឋលេខាធិកា​ក្រសួងពាណិជ្ជកម្ម បាន​ជួបពិភាក្សា​ការងារ​ជាមួយ​លោកជំទាវ Rebeca Grynspan អគ្គលេខាធិការ​នៃ​សន្និសីទ​សហប្រជាជាតិ​ស្ដីពី​ពាណិជ្ជកម្ម និង​ការអភិវឌ្ឍន៍ (UNCTAD) នៅ​ថ្ងៃទី​៣ ខែធ្នូ ឆ្នាំ​២០២១ ។
​លោក សុភ័ក្ត្រ បាន​ថ្លែងអំណរគុណ​ចំពោះ​អង្គការ UNCTAD ដែល​បាន​ជួយ​គាំទ្រ​កម្ពុជា​កន្លងមក ជាពិសេស​ក្នុង​ដំណើរការ​នៃ​ការសុំ​ចូល​ជា​សមាជិក​អង្គការ​ពាណិជ្ជកម្ម​ពិភពលោក កាលពី​ឆ្នាំ​២០០៤​។ ការគាំទ្រ​របស់​អង្គការ UNCTAD ក្នុង​ការងារ​នេះ បានអនុញ្ញាត​ឲ្យ​កម្ពុជា​ទាញយក​ផលប្រយោជន៍​ជាច្រើន​ពី​ប្រព័ន្ធ​ពាណិជ្ជកម្ម​ពហុភាគី ដែល​រួមចំណែក​ដល់​ការអភិវឌ្ឍន៍​សេដ្ឋកិច្ចកម្ពុជា​។
​លោក​បាន​ជម្រាបជូន​លោកស្រី Rebeca​ផងដែរ​ថា​៖« កម្ពុជា​កំពុងតែ​ត្រៀមខ្លួន​សម្រាប់​ចាកចេញ​ពី​ប្រទេស​អភិ​វ្ឍ​ន៍​តិចតួច (LDC) កម្ពុជា​ចាំបាច់​ត្រូវ​រៀបចំ​ជា​យុទ្ធសាស្ត្រ និង​គោលនយោបាយ​សម្រាប់​ប្រទេស ដើម្បី​ធានាបាន​ការអភិវឌ្ឍន៍​ជា​បន្តបន្ទាប់ ក្រោយពី​បាត់បង់​ភាពអនុគ្រោះ​នានា​ដែល​កម្ពុជា​ធ្លាប់​ទទួលបាន​ក្នុងនាម​ជា​ប្រទេស​អភិវឌ្ឍន៍​តិចតួច​»​។
«​ក្នុងន័យនេះ កម្ពុជា​ស្នើសុំ​ឲ្យ​អង្គការ UNCTAD បន្ត​ជួយ​ដល់​កម្ពុជា​ក្នុងការ​សិក្សា​ដើម្បី​រៀបចំ​យុទ្ធសាស្ត្រ​គ្រប់​ជ្រុងជ្រោយ​សម្រាប់​កម្ពុជា ស្ដីពី​ការចាកចេញ​ពី​ប្រទេស​អភិវឌ្ឍន៍​តិចតួច រួមមាន​ការ​ប្រែក្លាយ​រចនាសម្ព័ន្ធ​សេដ្ឋកិច្ច (Structural Transformation) ការពង្រឹង​ភាព​ប្រកួតប្រជែង ពិពិធ​កម្ម​ទំនិញ​នាំចេញ និង​ទីផ្សារ​នាំចេញ កសាង​សមត្ថភាព​របស់​សហគ្រាស​កម្ពុជា ការ​ប្រែក្លាយ​ឌីជីថល ។​ល​។
​លោកស្រី​អគ្គលេខាធិការ បាន​ថ្លែង​ការកោតសរសើរ​ចំពោះ​កំណើនសេដ្ឋកិច្ច និង​ការអភិវឌ្ឍន៍​របស់​ក​ម្ពុ​ជា ហើយ​អង្គការ UNCTAD ពិត​ជាមាន​មោទនភាព​ដែល​បាន​ចូលរួម​វិភាគទាន​ដល់​ការអភិវឌ្ឍន៍​នេះ​។ លោកស្រី​បានទទួល​យក​សំណើរ​របស់​កម្ពុជា ព្រមទាំង​សន្យាថា​នឹង​ប្រឹងប្រែង​បន្ត​កិច្ចសហប្រតិបត្តិការ​ល្អ​រវាង​អង្គការ UNCTAD និង​កម្ពុជា​បន្តទៀត​៕

​

ភ្នំពេញ៖ពិតជារឿងមួយដ៏គួរឱ្យមានមោទកភាព ដែលKHQR Code របស់ធនាគារអេស៊ីលីដាអាចធ្វើ ការទូទាត់បាន យ៉ាងទូលំទូលាយនៅបណ្តាប្រទេសនានា។ ថ្មីៗនេះលោកជំទាវ ជា សិរី ដែលជាឧបការី ទេសាភិបាលនិងជាអគ្គនាយក បច្ចេកទេសនៃធនាគារជាតិនៃកម្ពុជាក្នុងអំឡុងពេលដែលលោកជំទាវបានអញ្ជើញទៅទស្សនកិច្ចនៅប្រទេសថៃ លោកជំទាវបានសរសើរចំពោះ KHQR Code របស់ធនាគាអេស៊ីលីដា ដែលអាចធ្វើការទូទាត់បានយ៉ាង ទូលំទូលាយនៅប្រទេសថៃ។

លោកជំទាវ ជា សិរីបានសរសេរសរសើរនៅលើបណ្តាយសង្គមហ្វេសប៊ុកផ្លូវការរបស់លោកជំទាវថា៖ «ទីបំផុតបានសាក ចាយលុយដោយប្រើ QR កូដ នៅប្រទេសថៃ ដោយប្រើ app ធនាគារ ACLEDA ។ បច្ចុប្បន្ន មានតែអ្នកប្រើ app ACLEDA ទេដែលអាចចាយបានជាមួយអ្នកលក់ដែលប្រើធនាគារ SCB ថៃ»។

លោកជំទាវបានសរសេរបន្តទៀតថា៖«ឆ្នាំក្រោយ នាពេលគ្រឹះស្ថានធនាគារ ទាំង២ប្រទេស ធ្វើបច្ចុប្បន្ន កម្មប្រព័ន្ធពត៌មាន វិទ្យារួច រាល់អ្នកប្រើប្រាស់ app ធនាគារនៅស្រុកខ្មែរនឹងអាចចាយ តាមគ្រប់អ្នកលក់ដែលប្រើធនាគារក្នុងស្រុកថៃ។ អគុណចំពោះការគាំទ្ររបស់ធនាគារកណ្តាលថៃ»។

ធនាគារ អេស៊ីលីដា ភីអិលស៊ី«ប្រជាធនាគារដែលលោកអ្នកជឿទុកចិត្ត» គឺជាធនាគារពាណិជ្ជ ទីមួយក្នុង ប្រទេសកម្ពុជា បានអភិវឌ្ឍ និងបានដាក់ឲ្យប្រើប្រាស់នូវសេវាទូទាត់តាមKHQR Codeក្រោមកិច្ច ផ្តួចផ្តើម និងដឹកនាំរបស់ធនាគារ ជាតិនៃកម្ពុជាកាលពីថ្ងៃទី២៥ ខែតុលាកន្លងមកនេះ។

យោងតាមលោកស្រី សុខ សោភា នាយិកាប្រតិបត្តិទីផ្សារ នៃធនាគារ អេស៊ីលីដាបានមានប្រសាសន៍ថា« តាមរយះការស្កែត KHQR Code នេះ ជាមួយនិងអេស៊ីលីដាម៉ូបាល អ្នកប្រើប្រាស់មិនត្រឹម តែធ្វើការទូរទាត់បាននូវទូទាំង ប្រទេសកម្ពុជា ប៉ុណ្ណោះទេ ប៉ុន្តែថែមទាំងអាចស្កេន KHQR Code នេះ សម្រាប់ការទូទាត់នៅក្រៅប្រទេស ដូចជាប្រទេសថៃជាដើម។ ហើយក៏អាចស្កេនជាមួយ Visa QR Code ជាអន្តរជាតិផងដែរ។

លោកស្រី សុខ សោភា បានថ្លែងបញ្ជាក់ទៀតថា៖«ខ្ញុំក៏ចង់បញ្ជាក់ជូនដែរតាមរយះ អេស៊ីលីដាម៉ូបាល និង អេស៊ីលីដា QR នេះ គឺសព្វថ្ងៃនេះយើងអាចស្កេនបាននៅប្រទេសថៃគឺយើងអាចស្កែនទៅវិញ ទៅមក បាននិងចាយជាលុយរៀល និងមួយ ទៀតគឺយើងអាចស្កេនបានជាមួយ Visa QR  និង Master QR ជាលក្ខណះអន្តរជាតិតែម្តង។ អញ្ចឹងមានតែអេស៊ីលី ដាម៉ូបាលមួយគឺគ្រប់គ្រាន់ក្នុង ការធ្វើដំណើរ ជុំវិញសកលលោកដោយរីករាយ»។

សម្រាប់អតិថិជននៅធនាគារឬស្ថាប័នណាក៏ដោយ គ្រាន់តែមាន KHQR Codeរបស់អេស៊ីលីដា ដែលជាស្តង់ដារ ឃ្យូអរកូដតែមួយ សម្រាប់គ្រឹះស្ថានធនាគារនិងហិរញ្ញវត្ថុ និងគ្រឹះស្ថាន ផ្តល់ សេវាទូទាត់សងប្រាក់ ដាក់ឲ្យអតិថិជនប្រើប្រាស់ដើម្បីការទូទាត់ថ្លៃទំនិញ និងសេវាកម្មផ្សេងៗ នៅក្នុងប្រទេសកម្ពុជា តាមរយៈអេស៊ីលីដាម៉ូបាល (ACLEDA Mobile) កម្មវិធីបាគង (Bakong App) និងអាចស្កែន KHQR Code របស់ធនាគារផ្សេងៗបាន៕

ហ្សឺណែវ ប្រទេសស្វីស៖ លោក ពេជ ឫទ្ធី រដ្ឋលេខាធិការក្រសួងពាណិជ្ជកម្មបានលើកឡើងថាមជ្ឈមណ្ឌលពាណិជ្ជកម្មអន្តរជាតិ (International Trade Centre–ICT)សន្យាបន្តកិច្ចសហប្រតិបត្តិការ​ជាមួយកម្ពុជាក្នុងវិស័យពាណិជ្ជកម្មតាមអេឡិចត្រូនិក និងជំរុញការនាំចេញ

កាលពីថ្ងៃទី៣០ ខែវិច្ឆិកា ឆ្នាំ២០២១ គណៈប្រតិភូកម្ពុជា ដឹកនាំដោយលោក ពេជ ឫទ្ធី រដ្ឋលេខាធិការ​ក្រសួងពាណិជ្ជកម្ម បានជួបប្រជុំពិភាក្សាការងារជាមួយ លោកស្រី Dorothy Tembo នាយកប្រតិបត្តិរង​នៃមជ្ឈមណ្ឌលពាណិជ្ជកម្មអន្តរជាតិ (International Trade Centre – ITC) នៅទីក្រុងហ្សឺណែវ ប្រទេសស្វីស។

លោក ពេជ ឬទ្ធីបានថ្លែងអំណរគុណចំពោះការគាំទ្ររបស់អង្គការ ITC ដល់កម្ពុជា ដែលកាលពីឆ្នាំ២០១៦ កន្លងមក អង្គការ ITC បានចូលរួមអនុវត្តគម្រោងសម្រាប់លើកកម្ពស់ និងអភិវឌ្ឍន៍ផលិតកម្មសូត្រនៅកម្ពុជា ដែលតាមរយៈគម្រោងនេះ អង្គការ ITC បានធ្វើការជាមួយសហគមន៍ផលិតសូត្រ និងក្រុមហ៊ុនលក់​ផលិត​ផលសូត្រមួយចំនួនចូលរួមក្នុងពិព័រណ៍អន្តរជាតិនានា ព្រមទាំងគាំទ្រដល់ការផ្គូផ្គងធុរកិច្ចផងដែរ។

លោកបានថ្លែងបន្តទៀតថា យោងតាមជំនាញរបស់អង្គការ ITC ទាក់ទងនឹងការអភិវឌ្ឍន៍សហគ្រាសធុនតូច និងមធ្យម និងជំរុញការនាំចេញ អង្គការ ITC អាចបន្តគាំទ្រដល់កម្ពុជា ជាពិសេសក្នុងវិស័យពាណិជ្ជកម្ម​តាមប្រព័ន្ធ​អេឡិចត្រូនិក វិស័យសេវា និងបណ្ដុះបណ្ដាលពីចំណេះដឹងទីផ្សារ និងតម្រូវការបច្ចេកទេស នៃ​ប្រទេសគោលដៅ ដល់សហគ្រាសធុនតូច និងមធ្យមកម្ពុជា។

លោកស្រីនាយកប្រតិបត្តិរង នៃអង្គការ ITC បានទទួលយកសំណើររបស់គណៈប្រតិភូកម្ពុជា ហើយបាន​សន្យាថានឹងធ្វើការស្អិតរមួតជាមួយកម្ពុជាបន្តទៀត ដើម្បីសិក្សា និងរៀបចំគម្រោងនានា តាមការស្នើសុំ​របស់គណៈប្រតិភូកម្ពុជា៕

ភ្នំពេញៈ កម្ពុជា-ហ្វីលីពិនបានចុះ​អនុស្សារណៈ​នៃ​ការ​យោគយល់​គ្នាដើម្បីជំរុញការដោះដូរពាណិជ្ជកម្ម និងបង្កើនទំហំនៃការវិនិយោគ​បន្ថែមទៀត។

កាល​ពី​ថ្ងៃទី២ ខែធ្នូ ឆ្នាំ​២០២១ លោក​ គិត ម៉េង ប្រធាន​សភា​ពាណិជ្ជ​កម្ម​កម្ពុជា និង​ លោក ​ Amb. Benedicto V. Yujuicoប្រធាន​សភា​ពាណិជ្ជកម្ម និងឧស្សាហ​កម្ម​ហ្វីលីពីនបានចុះ​អនុស្សារណៈ​នៃ​ការ​យោគ​យល់​គ្នា (MoU) តាម​ប្រព័ន្ធ​អនឡាញសំដៅបង្កើនទំនាក់​ទំនង​ពាណិជ្ជកម្ម និង​កិច្ច​សហ​ប្រតិបត្តិការ​អាជីវកម្ម និង​វិនិយោគ​រវាង​ ​ប្រទេស​ទាំង ២។

ការ​ចុះ​អនុស្សារណៈ​នៃ​ការ​យោគយល់​គ្នា​នេះ​ប្រព្រឹត្ត​ទៅ​ក្នុង​អំឡុង​ពេល​នៃ​កិច្ច​ប្រជុំ​គណៈ​កម្មាការ​ចម្រុះ​ស្តីពី​កិច្ច​សហ​ប្រតិបត្តិការ​ទ្វេ​ភាគី​កម្ពុជា-​ហ្វីលីពីនលើក​ទី៣ ក្រោម​អធិបតី​ភាពលោក ប្រាក់ សុខុន រដ្ឋមន្ត្រី​ក្រសួង​ការ​បរទេស និង​សហ​ប្រតិបត្តិការ​អន្តរជាតិ​នៃ​ព្រះ​រាជាណាចក្រ​កម្ពុជា និង​លោក Honorable Teodoro L. Locsin Jr រដ្ឋមន្ត្រី​ក្រសួង​ការ​បរទេស​នៃ​សាធារណរដ្ឋ​ហ្វីលីពីន។

យោង​តាម​សេចក្តីប្រកាស​ព័ត៌មាន​របស់​សភា​ពាណិជ្ជកម្ម​កម្ពុជា៖« MoU នេះ​ធ្វើ​ឡើង​ក្នុង​គោល​បំណង​ចូល​រួម​ជំរុញ និង​ពង្រឹង​កិច្ច​សហ​ប្រតិបត្តិការ​សេដ្ឋ​កិច្ច និងធុរកិច្ច​រវាង​កម្ពុជា និង សាធារណ​រដ្ឋ​ហ្វីលីពីន ក្នុង​វិស័យ​ជា​ច្រើន​ដូច​ជា បច្ចេក​វិទ្យា​ព័ត៌មាន និង​នវានុវត្តន៍ កសិកម្ម កម្មន្ត​សាលអាជីវ​កម្ម​សិទ្ធិ​ពិសេស ទេសចរណ៍ សេវា​កម្ម និង​ការ​អភិវឌ្ឍ​សហគ្រាស​ធុន​តូចនិង​មធ្យម»។

សភា​ពាណិជ្ជកម្ម​នៃ​ប្រទេស​ទាំង ២ ក៏​បាន​សន្យា​នឹង​ចែក​រំលែក​ព័ត៌មាន​ឱ្យ​គ្នា​ទៅ​វិញ​ទៅ​មក​ជា​ទៀង​ទាត់ ក៏​ដូច​ជា​រៀបចំ​បេសកកម្ម​ធុកិច្ច និង​វិនិយោគ សិក្ខា​សាលា សន្និសីទ ការ​តាំង​ពិព័រណ៍ និង​ជំនួប​ជាណិជ្ជកម្ម ជា​ដើម​។

បន្ថែម​ពី​លើ​នេះ ភាគី​ទាំង ២ ក៏​បាន​ឯកភាព​គ្នា​ក្នុង​ការ​បង្កើត​ក្រុម​ប្រឹក្សា​ធុរកិច្ច​ហ្វីលីពីន-កម្ពុជា ដែល​មាន​ទីស្នាក់​ការ​នៅ​សាធារណរដ្ឋ​ហ្វីលីពីន និង​ក្រុម​ប្រឹក្សា​ធុរ​កិច្ចកម្ពុជា- ហ្វីលីពីន ដែល​មាន​ទីស្នាក់​ការ​នៅកម្ពុជា ដើម្បី​ពិភាក្សា​រៀបចំ​ផែនការ​វិនិយោគ​នៅ​ពេល​អនាគត៕

ភ្នំពេញ៖ដើម្បីធ្វើឱ្យកាន់តែងាយស្រួលដល់អតិថិជនដែលនិយមចូលចិត្តការរស់នៅបែបស៊ីវីល័យ ការកម្មង់ទំនិញទំនើបៗ  ថ្មីៗនេះធនាគារអេស៊ីលីដាបានដាក់ឱ្យដំណើការ​ជាផ្លូវការនូវផ្សារអនឡាញនៅក្នុងកម្មវិធីអេបអេស៊ីលីដាម៉ូបាលរបស់ខ្លួន ដែល​អតិថិជន​អាចកម្មង់ទិញទំនិញ នៅហាងទំនិញទំនើបៗរាប់ពាន់កន្លែង ជាមួយនឹង​ការទទួលទំនិញទាន់ពេលវាលា ការបញ្ចុះតម្លៃនានា ភាពត្រឹមត្រូវតាមការបញ្ជាទិញ និង មានសុវត្ថិភាពទៀតផង។

លោកស្រី សុខ សោភា នាយិកាប្រតិបត្តិជាន់ខ្ពស់ទីផ្សារ បានមានប្រសាសន៍ថាដោយ​មើលឃើញពីការកើនឡើងនៃកម្រិតជីវភាពរបស់ប្រជាពលរដ្ឋ ជាពិសេសការរស់នៅ​បែបស៊ីវីល័យនិងកាន់តែទាន់សម័យ ការនិយមកម្មង់ទំនិញតាមទីផ្សារ​អនឡាញ​កាន់តែពេញនិយម  ធនាគារអេស៊ីលីដាបានខិតខំស្វែងរកនូវដំណោះស្រាយ​នៃបចេ្ចកវិទ្យាថ្មីៗដាក់ឪ្យដំណើការផ្សារអនឡាញអ៊ីសបក្នុងកម្មវិធីអេប អេស៊ីលីដាម៉ូ បាល អនុញ្ញាត្តិឱ្យអតិថិជនអាចធ្វើការបញ្ជាទិញទំនិញទំនើបៗបាន រាប់ម៉ឺនមុខ។

លោកស្រី ភាបានមានប្រសាសន៍ថា៖«ជាមួយមុខទំនិញរាប់ម៉ឺនមុខរបស់អ៊ីសបយើង នឹងឆ្លើយតបទៅនិងតម្រូវការ និងផ្តល់ភាពងាយស្រួលដល់អតិថិជនមិនចាំបាច់​ស្វែងរកហាងនានា។ មានតែផ្សារអនឡាញអ៊ីសបមួយរបស់អេស៊ីលីដាម៉ូបាលមួយ​គឺដូចជាមានផ្សារលក់ទំនិញទំនើបៗរាប់ម៉ឺនមុខនៅក្នុងដៃ»។

អតិថិជន និងសាធារណជន ចូលទៅទាញយកកម្មវិធីអេស៊ីលីដាម៉ូបាលនេះ តាមរយៈ App Store, Play Store, App gallery នោះអ្នកនឹងបានឃើញផ្សារអនឡាញដើម្បី​ប្រើប្រាស់​ទិញ​ទំនិញនានាតាមសេចក្តីត្រូវ ៕

ភ្នំពេញៈ កម្ពុជា​បាន​នាំ​ចេញ​ស្រូវ-អង្ករ ​ក្នុង​បរិមាណសរុប​ជាង ៣,៦​លាន​តោន ​នា​រយៈ​ពេល ​១១​ខែ​ឆ្នាំ​២០២១ ដោយ​មាន​តម្លៃ​សរុប​ ១ ០០១​លាន​ដុល្លារ។ នេះ​បើ​យោង​តាម​របាយការណ៍​ក្រសួង​កសិកម្ម រុក្ខា​ប្រមាញ់ និង​នេសាទ។

របាយការណ៍​ក្រសួង​កសិកម្ម រុក្ខា​ប្រមាញ់ និង​នេសាទ បាន​ឱ្យ​ដឹង​ថា ចាប់​ពី​ខែ​មករា ដល់​ខែ​វិច្ឆិកា ឆ្នាំ​២០២១ កម្ពុជា​​​នាំ​ចេញ​អង្ករ​ក្នុង​បរិមាណ​សរុប ៥៣២ ១៧៩តោន ថយ​ចុះ​ ១១,៤៦ភាគ​រយ​បើ​ធៀប​នឹង​រយៈ​ពេល ១១​ខែ​ឆ្នាំ​២០២០ ដែល​មាន​ចំនួន ៦០១ ០៤៥​តោន។ ​ប្រាក់​ដែល​ទទួល​បាន​ពី​ការ​នាំ​ចេញ​អង្ករ​មាន​ចំនួន ៤៥៤ ៤៨០ ៨៦៦ដុល្លារ។ ចំណែក​​ការ​នាំ​ចេញ​ស្រូវ ក្នុង​រយៈ​ពេល​ខាង​លើ​​សម្រេច​បាន​ ៣ ១២៣ ២៤២​តោន​(ទៅ​កាន់​ប្រទេស​វៀតណាម) កើន​ឡើង ៧៥,៧៥​ភាគ​រយ​​បើ​ធៀប​នឹង​រយៈពេល​ដូច​គ្នា​នៅ​ឆ្នាំ​២០២០។ ទឹក​ប្រាក់​ទទួល​បាន​ពី​ការ​នាំ​​ចេញ​ស្រូវ​ មាន​ចំនួន​ ៥៤៦ ៥៦៧ ៣៥០ដុល្លារ

សម្រាប់​ទីផ្សារ​ទទួល​ទិញ​អង្ករ​ពី​កម្ពុជា រួម​មាន ​សហភាព​អឺរ៉ុប​(​២២​ប្រទេស) ១៣៤ ៤៣៨​តោន ថយ​ចុះ ២៨,៦៦​ភាគ​រយ, ប្រទេស​ចិន ២៦៥ ២៤៤​តោន កើន​ឡើង ១២,៩០​ភាគ​រយ​, តំបន់​អាស៊ាន​(៧​ប្រទេស) ៥៤ ៣៥០​តោន​ ថយ​ចុះ ៣០,៥១​ភាគ​រយ និង​ទិសដៅ​ដទៃ​ទៀត​(២៤​ប្រទេស)​មាន​បរិមាណ ៧៨ ១៤៧​តោន ថយ​ចុះ ២១,៤៣​ភាគ​រយ​។​ ​អង្ករ​នាំ​ចេញ រួម​មាន ​អង្ករ​ក្រអូប​គ្រប់​ប្រភេទ​ ៣៨៩ ៩១២តោន ស្មើ​នឹង​៧៣,២៧​ភាគ​រយ អង្ករ​ស​គ្រប់​ប្រភេទ ១៣២ ៦៧៥​តោន ស្មើ​នឹង ២៤,៩៣​ភាគ​រយ​ និង​អង្ករ​ចំហុយ ៩ ៥៩២​តោន ស្មើ​នឹង ១,៨០​ភាគ​រយ។​

កាល​ពី​ឆ្នាំ​២០២០ កម្ពុជា​បាន​នាំចេញ​អង្ករ​សរុប ៦៩០ ៨២៩ តោន ដោយមាន​តម្លៃ​ជិត ៥៣៩ លាន​ដុល្លារ កើន​ឡើង ១១,៤០ ភាគរយ បើ​ធៀប​នឹង​ឆ្នាំ ២០១៩។ នេះ​បើតាម​ទិន្នន័យ​ក្រសួង​កសិកម្ម រុក្ខាប្រមាញ់ និង​នេសាទ៕

ភ្នំពេញ៖ សៀវភៅកេរ្ដិ៍ដំណែលស្នាដៃម្ហូបខ្មែរ (The Taste of Angkor)ត្រូវបានជ្រើសរើស​ជា​«សៀវភៅមុខ​ម្ហូបអាស៊ីដ៏ល្អផ្តាច់គេ» (The Best Asian Cookbook) ក្នុងកម្មវិធីតាំង​ពិព័រណ៍Gourmand World Cookbook Award 2021 ដែលប្រារព្ធឡើងចាប់ពីថ្ងៃទី២៩ ខែវិច្ឆិកា ដល់ថ្ងៃទី​០៦ ខែធ្នូ ឆ្នាំ២០២១។

សៀវភៅកេរ្ដិ៍ដំណែលស្នាដៃម្ហូបខ្មែរ ត្រូវបានរៀបចំឡើងដោយក្រសួងការបរទេស និង​សហប្រតិបត្តិការ​អន្តរជាតិ ក្រោមគំនិតផ្ដួចផ្ដើមរបស់ ឯកឧត្តមឧបនាយករដ្ឋមន្រ្តី ប្រាក់ សុខុនស្រប​តាមយុទ្ធសាស្រ្ត​ការទូតសេដ្ឋកិច្ចឆ្នាំ២០២១-២០២៣ ដែលបានប្រកាសដាក់ឱ្យអនុវត្តកាលពី​ថ្ងៃទី១៨ ខែមករា ឆ្នាំ​២០២១។ សៀវភៅនេះបានជ្រើសរើសសម្រិតសម្រាំង​យក​មុខម្ហូប និងបង្អែមខ្មែរចំនួន៣៨មុខ ដោយ​ណែនាំ​ពីវិធីចម្អិនងាយៗ និងបានបង្ហាញពីគន្លឹះនៃការជំនួសគ្រឿងផ្សំរបស់ខ្មែរ​មួយចំនួន​ដែល​ងាយស្រួល​រកនៅ​បរទេសព្រមទាំងបានរំលេច និងផ្សព្វផ្សាយពីផលិតផលកម្ពុជា ​ដូចជា ម្រេចកំពត អង្ករផ្កាម្លិះ និងស្ករត្នោត។  នេះបើយោងតាមសេចក្តីប្រកាសព័ត៌មានរបស់ក្រសួង ការបរទេស និង​សហប្រតិបត្តិ​ការអន្តរជាតិ។

ក្រសួងបានថ្លែងថា៖«ការទទួលបានពានរង្វាន់«សៀវភៅមុខម្ហូបអាស៊ីដ៏ល្អផ្តាច់គេ»នាពេលនេះគឺជា​​មោទន​ភាព​​ជាតិនិងជាសមិទ្ធផលដ៏ត្រចះត្រចង់ថ្មីមួយទៀតរបស់ព្រះរាជាណាចក្រកម្ពុជាដែល​បានឆ្លុះ​បញ្ចាំង​អំពី​កិច្ចខិតខំ​​ប្រឹងប្រែងរបស់រាជរដ្ឋាភិបាល ក្នុងការជំរុញវិស័យការទូតម្ហូបអាហារសំដៅ​ផ្សព្វផ្សាយឱ្យ​ពិភពលោក​បានស្គាល់កាន់តែច្បាស់ពីកេរ្ដិ៍ដំណែលនិងប្រណីតភាពនៃសិល្បៈម្ហូបខែ្មរដែលជាអត្តសញ្ញាណនៃអរិយធម៌ដ៏វិសេសវិសាលរបស់កម្ពុជា»។

ការលើកតម្កើងវិស័យការទូតម្ហូបអាហារនេះ ជាផ្នែកមួយដ៏សំខាន់នៃយុទ្ធសាស្រ្ត​ការទូតសេដ្ឋកិច្ច​ឆ្នាំ​២០២១-២០២៣ ដែលមានគោលដៅលើកស្ទួយកិត្យានុភាពជាតិ និងរួមចំណែកជាមួយរាជរដ្ឋាភិបាល​ក្នុង​ការឈានទៅសម្រេចចក្ខុវិស័យកម្ពុជាឆ្នាំ២០៣០ និងឆ្នាំ២០៥០។

កម្មវិធី Gourmand World Cookbook Awardត្រូវបានបង្កើតឡើងក្នុងឆ្នាំ១៩៩៥ ដោយ​លោកEdouard Cointreau ក្នុងគោលបំណងលើកស្ទួយ និងផ្សព្វផ្សាយវប្បធម៌​​​ម្ហូបអាហារ​ទូទាំង​សកលលោក។ នៅក្នុងឆ្នាំ២០២១នេះ មានការចូលរួមពីប្រទេសចំនួន១៩៨ដោយមាន​សៀវភៅ​សរុប​ចំនួន ៤០០០ក្បាល ដែលត្រូវបានជ្រើសរើសមកប្រកួតប្រជែងនៅក្នុងព្រឹត្តិការណ៍នេះ។ គួរបញ្ជាក់ថា ពានរង្វាន់ហ្គ័រម៉ង់ នេះត្រូវបានគេទទួលស្គាល់ថាជា ពានរង្វាន់អូស្ការ សម្រាប់វិស័យ​ម្ហូបអាហារ។

សៀវភៅមុខម្ហូបកេរ្ដិ៍ដំណែល​ស្នាដៃ​ម្ហូបខ្មែររួមជាមួយផលិតផល និងម្ហូបខ្មែរជាច្រើនមុខផ្សេងទៀតក៏ត្រូវ​បានដាក់បង្ហាញនិងដាក់ជាគំរូជូនអ្នកទស្សនាភ្លក់រសជាតិ នៅតាមបណ្ដាប្រទេសនានា​ទូទាំង​ពិភពលោក​ដោយស្ថានតំណាងកម្ពុជានៅបរទេស ក្នុងនោះរួមមាន ប្រទេសចិន ប្រទេសម៉ាឡេស៊ី ប្រទេសស៊ុយអែត ប្រទេសកូរ៉េ ជាដើម។ នេះបើយោងតាមសេចក្តីប្រកាសព័ត៌មានរបស់ក្រសួង៕

ភ្នំពេញ៖ ជាកិច្ចខិតខំប្រឹងប្រែងដើម្បីជម្រុញទំហំនៃការដោះដូរពាណិជ្ជកម្មទ្វេរភាគី កម្ពុជា-វៀតណាម​ គ្រោងនឹងចុះកិច្ច​ព្រមព្រៀង​​កិច្ចសហប្រតិបត្តិការ​លើ​វិស័យកសិកម្ម​​នៅក្នុងខែធ្នូនេះ សំដៅធ្វើយ៉ាងជំរុញ និងលើកកម្ពស់ការដាំដុះ និងនាំចេញទិន្នផលកសិកម្មឱ្យមានកម្រិតខ្ពស់។

លោក ហ៊ាន វណ្ណហន រដ្ឋលេខាធិការក្រសួងកសិកម្ម បានមានប្រសាសន៍ថា គម្រោងកិច្ចព្រមព្រៀងកិច្ចសហប្រតិបត្តិការ​លើ​វិស័យកសិកម្មនេះ គឺជាសំណើរបស់ឯកអគ្គរដ្ឋទូត​នៃ​សាធារណ​រដ្ឋសង្គមនិយមវៀតណាមថ្មី នៅក្នុងជំនួបជាមួយរដ្ឋមន្រ្តីកសិកម្មកម្ពុជា លោក វេង សាខុនកាលពីថ្ងៃទី៣០​ ខែវិច្ឆិកាកន្លងទៅ។

លោកបានបញ្ជាក់បន្ថែមថា ជាមួយនិងកិច្ចព្រមព្រៀងដែលមានស្រាប់ ប្រទេសទាំងពីរមានបំណងដើម្បីធ្វើយ៉ាង​ណាឱ្យកាន់តែមានភាពប្រសើរឡើងនៃទំនាក់ទំនងពាណិជ្ជកម្ម ការដោះដូរទំនិញជាពិសេសលើកសិក​ផល​កសិកម្ម និងបច្ចេទេសដាំដុះ។

លោកបានបន្ថែមថា ៖« ចំពោះផែនការនៃការចុះកិច្ចព្រមព្រៀងនេះ គឺយើងចង់បានគឺធ្វើម៉េចឲ្យ​មាន​ចំណូល​របស់កសិករ​មានកំណើន កាត់បន្ថយ​ភាពក្រីក្ររបស់ប្រជាជនយើង តាមរយៈលំហូររលូននៃទីផ្សារ​កសិផល ។តាមពិត​ទៅ​ វាមានលក្ខណៈ​ពិសេសដែរ ដែលប្រទេសវៀតណាម ជាប្រទេសជិតខាងរបស់យើងនេះ  ដូចនេះ​របស់ធ្ងន់​ៗ​ដែលយើង​ដឹកទៅឆ្ងាយ ហើយលក់ហ្នឹង វាមិនចំណេញដូចយើងដឹកទៅជិតទេ»។

លោកបានបន្តថា លោកត្រៀមនឹងកោះអញ្ជើញអ្នកជំនាញនៅតាមអង្គភាពពាក់ព័ន្ធ នៅក្នុងក្រសួង​កសិកម្ម​ដើម្បីពិគ្រោះយោបល់គ្នាមុននឹងឈានដល់ការចុះកិច្ចព្រមព្រៀង ជាពិសេសការស្វែងរកផល​ចំណេញឱ្យបានជា​អតិបរមាសម្រាប់ប្រជាជន និងសេដ្ឋកិច្ចកម្ពុជា។

យោងតាមប្រព័ន្ធទិន្នន័យគ្រឹះភូតគាមអនាម័យជាតិ (National Phytosanitary Database) ទទួល​បានពីអគ្គនាយកដ្ឋានកសិកម្ម បានឲ្យដឹងថា ក្នុងរយៈពេល១១ខែ ឆ្នាំ២០២១នេះ ការនាំចេញ​កសិផល​ទៅក្រៅប្រទេស មានបរិមាណសរុបចំនួន ៧ ១៣១ ៩១៥,០៤ តោន ទៅកាន់ទិសដៅ ៦៨ ប្រទេស គឺមានការកើនឡើងចំនួន ៣ ៤៤៤ ២៨៨,១៨ តោនស្មើនឹង ៨៧,៥៣% បើធៀបនឹងរយៈពេលដូចគ្នា​ក្នុងឆ្នាំ២០២០ ដែលទទួលបានត្រឹមតែ ៣ ៦៨៧ ៦២៦,៨៦ តោន៕